Chembur: 28 tonnes of dangerous chemical benzene leaks from tanker, 500 meter area sealed

ਚੇਂਬੂਰ: ਟੈਂਕਰ ਤੋਂ 28 ਟਨ ਖ਼ਤਰਨਾਕ ਕੈਮੀਕਲ ਬੈਂਜੀਨ ਲੀਕ, 500 ਮੀਟਰ ਦਾ ਇਲਾਕਾ ਸੀਲ

ਮੁੰਬਈ (ਆਵਾਜ਼ਿ ਕੌਮ ਬਿਊਰੋ)- ਮਹਾਰਾਸ਼ਟਰ ਵਿੱਚ ਮੁੰਬਈ ਦੇ ਚੇਂਬੂਰ ਸਥਿਤ ਵਾਸ਼ੀਨਾਕਾ ਇਲਾਕੇ ਵਿੱਚ ਸੋਮਵਾਰ ਰਾਤ ਨੂੰ ਇੱਕ ਕੈਮੀਕਲ ਟੈਂਕਰ ਤੋਂ ਖ਼ਤਰਨਾਕ ਬੈਂਜੀਨ ਕੈਮੀਕਲ ਲੀਕ ਹੋਣ ਕਾਰਨ ਹੜਕੰਪ ਮਚ ਗਿਆ। ਇਹ ਘਟਨਾ ਮੈਸੂਰ ਕਲੋਨੀ ਦੇ ਕੋਲ ਮਾਹੁਲ ਰੋਡ ‘ਤੇ ਵਾਪਰੀ, ਜਿੱਥੇ ਬੈਂਜੀਨ ਲੈ ਕੇ ਜਾ ਰਹੇ ਇੱਕ ਟੈਂਕਰ ਵਿੱਚੋਂ ਅਚਾਨਕ ਕੈਮੀਕਲ ਦਾ ਰਿਸਾਅ (ਲੀਕ) ਹੋਣ ਲੱਗਾ. ਪ੍ਰਾਪਤ ਜਾਣਕਾਰੀ ਅਨੁਸਾਰ, ਇਸ ਟੈਂਕਰ ਵਿੱਚ ਲਗਭਗ 28 ਟਨ ਬੈਂਜੀਨ ਭਰੀ ਹੋਈ ਸੀ। ਗੈਸ ਲੀਕ ਹੋਣ ਦੀ ਖ਼ਬਰ ਮਿਲਦਿਆਂ ਹੀ ਇਲਾਕੇ ਵਿੱਚ ਭਾਜੜ ਦਾ ਮਾਹੌਲ ਬਣ ਗਿਆ ਅਤੇ ਆਸ-ਪਾਸ ਮੌਜੂਦ ਕੁਝ ਲੋਕਾਂ ਨੇ ਸਾਹ ਲੈਣ ਵਿੱਚ ਤਕਲੀਫ਼ ਹੋਣ ਦੀ ਸ਼ਿਕਾਇਤ ਕੀਤੀ। ਸੁਰੱਖਿਆ ਦੇ ਮੱਦੇਨਜ਼ਰ ਸਥਾਨਕ ਲੋਕਾਂ ਨੂੰ ਤੁਰੰਤ ਸੁਰੱਖਿਅਤ ਥਾਵਾਂ ‘ਤੇ ਭੇਜਿਆ ਗਿਆ। ਪ੍ਰਸ਼ਾਸਨ ਨੇ ਮੁਸਤੈਦੀ ਦਿਖਾਉਂਦੇ ਹੋਏ ਘਟਨਾ ਸਥਾਨ ਦੇ ਨੇੜੇ ਲਗਭਗ 500 ਮੀਟਰ ਖੇਤਰ ਨੂੰ ਪੂਰੀ ਤਰ੍ਹਾਂ ਸੀਲ ਕਰਕੇ ਲੋਕਾਂ ਦੀ ਆਵਾਜਾਈ ‘ਤੇ ਰੋਕ ਲਗਾ ਦਿੱਤੀ। ਇਸ ਦੇ ਨਾਲ ਹੀ ਮਾਹੁਲ ਰੋਡ ਅਤੇ ਨੇੜਲੇ ਰਸਤਿਆਂ ‘ਤੇ ਆਵਾਜਾਈ (ਟਰੈਫਿਕ) ਨੂੰ ਦੂਜੇ ਰਸਤਿਆਂ ਵੱਲ ਡਾਇਵਰਟ ਕੀਤਾ ਗਿਆ। ਸੂਚਨਾ ਮਿਲਦੇ ਹੀ ਮੁੰਬਈ ਫਾਇਰ ਬ੍ਰਿਗੇਡ ਦੀਆਂ ਟੀਮਾਂ ਅਤੇ ਕੈਮੀਕਲ ਲੀਕ ਨਾਲ ਨਜਿੱਠਣ ਵਾਲੇ ਮਾਹਰ ਮੌਕੇ ‘ਤੇ ਪਹੁੰਚੇ। ਸਥਿਤੀ ਨੂੰ ਗੰਭੀਰ ਦੇਖਦੇ ਹੋਏ ਟੈਂਕਰ ਵਿੱਚੋਂ ਬੈਂਜੀਨ ਨੂੰ ਦੂਜੇ ਖਾਲੀ ਟੈਂਕਰ ਵਿੱਚ ਸੁਰੱਖਿਅਤ ਤਰੀਕੇ ਨਾਲ ਟਰਾਂਸਫਰ ਕਰਨ ਦਾ ਆਪ੍ਰੇਸ਼ਨ ਸ਼ੁਰੂ ਕੀਤਾ ਗਿਆ। ਰਾਤ ਕਰੀਬ 10:20 ਵਜੇ ਤੱਕ ਬੈਂਜੀਨ ਨੂੰ ਦੂਜੇ ਟੈਂਕਰ ਵਿੱਚ ਟਰਾਂਸਫਰ ਕਰਨ ਦਾ ਕੰਮ ਮੁਕੰਮਲ ਕਰ ਲਿਆ ਗਿਆ, ਜਿਸ ਤੋਂ ਬਾਅਦ ਦੋਵਾਂ ਟੈਂਕਰਾਂ ਨੂੰ ਸੁਰੱਖਿਅਤ ਰੂਪ ਵਿੱਚ ਬੀ.ਪੀ.ਸੀ.ਐੱਲ. (BPCL) ਰਿਫਾਇਨਰੀ ਪਰਿਸਰ ਵੱਲ ਭੇਜ ਦਿੱਤਾ ਗਿਆ। ਬੈਂਜੀਨ ਇੱਕ ਰੰਗਹੀਣ ਅਤੇ ਬਹੁਤ ਜ਼ਿਆਦਾ ਜਲਣਸ਼ੀਲ ਗੈਸ ਹੈ, ਜਿਸ ਦੇ ਲੀਕ ਹੋਣ ਨਾਲ ਅੱਗ ਲੱਗਣ ਦਾ ਵੱਡਾ ਖ਼ਤਰਾ ਰਹਿੰਦਾ ਹੈ ਅਤੇ ਸਿਹਤ ‘ਤੇ ਵੀ ਗੰਭੀਰ ਅਸਰ ਪੈਂਦਾ ਹੈ। ਰਾਹਤ ਦੀ ਗੱਲ ਇਹ ਰਹੀ ਕਿ ਇਸ ਹਾਦਸੇ ਵਿੱਚ ਕਿਸੇ ਦੇ ਜ਼ਖਮੀ ਹੋਣ ਦੀ ਕੋਈ ਪੁਸ਼ਟੀ ਨਹੀਂ ਹੋਈ ਹੈ। ਫਿਲਹਾਲ ਪੁਲਸ, ਫਾਇਰ ਬ੍ਰਿਗੇਡ ਅਤੇ ਕੈਮੀਕਲ ਮਾਹਰ ਸਥਿਤੀ ‘ਤੇ ਲਗਾਤਾਰ ਨਜ਼ਰ ਰੱਖ ਰਹੇ ਹਨ।