The Ministry of External Affairs will present special gifts to journalists attending the 18th BRICS Summit

18ਵੇਂ ਬ੍ਰਿਕਸ ਸੰਮੇਲਨ ‘ਚ ਆਉਣ ਵਾਲੇ ਪੱਤਰਕਾਰਾਂ ਨੂੰ ਖ਼ਾਸ ਤੋਹਫੇ ਦੇਵੇਗਾ ਵਿਦੇਸ਼ ਮੰਤਰਾਲਾ

ਨਵੀਂ ਦਿੱਲੀ (ਆਵਾਜ਼ਿ ਕੌਮ ਬਿਊਰੋ)- ਦਿੱਲੀ ਦੇ ਭਾਰਤ ਮੰਡਪਮ ‘ਚ 12 ਅਤੇ 13 ਸਤੰਬਰ 2026 ਨੂੰ ਆਯੋਜਿਤ ਹੋ ਰਹੇ 18ਵੇਂ ਬ੍ਰਿਕਸ ਸੰਮੇਲਨ ‘ਚ ਆਉਣ ਵਾਲੇ ਘਰੇਲੂ ਅਤੇ ਅੰਤਰਰਾਸ਼ਟਰੀ ਪੱਤਰਕਾਰਾਂ ਲਈ ਭਾਰਤ ਦੇ ਵਿਦੇਸ਼ ਮੰਤਰਾਲਾ ਨੇ ਇਕ ਬੇਹੱਦ ਖਾਸ ‘ਵੋਕਲ ਫਾਰ ਲੋਕਲ’ ਮੀਡੀਆ ਕਿਟ ਤਿਆਰ ਕੀਤੀ ਹੈ। ਇਸ ਸੰਮੇਲਨ ‘ਚ ਕਵਰੇਜ਼ ਲਈ ਦੁਨੀਆ ਭਰ ਤੋਂ ਲਗਭਗ 1,200 ਤੋਂ 1,300 ਪੱਤਰਕਾਰ ਆ ਰਹੇ ਹਨ। ਇਨ੍ਹਾਂ ਸਾਰੇ ਮੀਡੀਆ ਪ੍ਰਤੀਨਿਧੀਆਂ ਨੂੰ ਭਾਰਤ ਦੀ ਸੱਭਿਆਚਾਰਕ ਵਿਰਾਸਤ, ਖਾਣ-ਪੀਣ ਅਤੇ ਬਿਹਤਰੀਨ ਹਸਤਸ਼ਿਲਪ ਨਾਲ ਰੂ-ਬ-ਰੂ ਕਰਵਾਉਣ ਲਈ ਇਕ ਖਾਸ ਗਿਫਟ ਹੈਂਪਰ ਤਿਆਰ ਕੀਤਾ ਗਿਆ ਹੈ। ਇਸ ‘ਵੋਕਲ ਫਾਰ ਲੋਕਲ’ ਕਿਟ ‘ਚ ਭਾਰਤ ਦੇ ਰਵਾਇਤੀ ਅਤੇ ਸਿਹਤਮੰਦ ਖਾਣ-ਪੀਣ ਨੂੰ ਉਤਸ਼ਾਹ ਦੇਣ ਲਈ ਬਿਹਾਰ ਦਾ ਮਸ਼ਹੂਰ ਸੱਤੂ ਅਤੇ ਮਖਾਨਾ ਇਸ ਬੈਗ ਦਾ ਹਿੱਸਾ ਬਣਾਇਆ ਗਿਆ ਹੈ। ਇਸ ਦੇ ਨਾਲ ਹੀ ਆਪਣੀ ਅਨੋਖੀ ਮਹਿਕ ਅਤੇ ਸਵਾਦ ਲਈ ਪਛਾਣੀ ਜਾਣ ਵਾਲੀ ਓਡੀਸ਼ਾ ਦੇ ਕੋਰਾਪੁਟ ਦੀ ਖ਼ਾਸ ਆਰਗੇਨਿਕ ਕੌਫੀ ਨੂੰ ਇਸ ‘ਚ ਜਗ੍ਹਾ ਮਿਲੀ ਹੈ। ਉੱਥੇ ਹੀ ਭਾਰਤ ਦੀ ਬਾਰੀਕ ਕਾਰੀਗਰੀ ਨੂੰ ਪ੍ਰਦਰਸ਼ਿਤ ਕਰਨ ਲਈ ਗੁਜਰਾਤ ਦੇ ਖੂਬਸੂਰਤ ਹਸਤਸ਼ਿਲਪ ਅਤੇ ਕਲਾਕ੍ਰਿਤੀਆਂ ਨੂੰ ਸ਼ਾਮਲ ਕੀਤਾ ਗਿਆ ਹੈ। ਪੱਤਰਕਾਰਾਂ ਲਈ ਤਿਆਰ ਕੀਤੇ ਗਏ ਇਸ ਸਪੈਸ਼ਲ ਬੈਗ ‘ਚ ਰੋਜ਼ਾਨਾ ਇਸਤੇਮਾਲ ਹੋਣ ਵਾਲੀਆਂ ਚੀਜ਼ਾਂ ਅਤੇ ਡਾਇਰੀ ਵੀ ਦਿੱਤੀ ਗਈ ਹੈ, ਜੋ ਭਾਰਤੀ ਲੁੱਕ ਅਤੇ ਸਥਿਰਤਾ ਨੂੰ ਦਰਸਾਉਂਦੀ ਹੈ। ਇਸ ਵਿਲੱਖਣ ਤੋਹਫ਼ੇ ਰਾਹੀਂ, ਭਾਰਤ ਸਰਕਾਰ ਵਿਸ਼ਵ ਪੱਧਰ ‘ਤੇ ਆਪਣੀਆਂ ਨੀਤੀਗਤ ਚਰਚਾਵਾਂ ਤੋਂ ਵੱਖ ਹਟ ਕੇ ਆਪਣੀ ਸਾਫ਼ਟ ਪਾਵਰ, ਸਥਾਨਕ ਕਾਰੀਗਰਾਂ ਦੇ ਹੁਨਰ ਅਤੇ ਭਾਰਤ ਦੀਆਂ ਵਿਭਿੰਨ ਪਰੰਪਰਾਵਾਂ ਦੀ ‘ਇੰਡੀਆ ਸਟੋਰੀ’ ਨੂੰ ਦੁਨੀਆ ਦੇ ਸਾਹਮਣੇ ਪੇਸ਼ ਕਰ ਰਹੀ ਹੈ।