ਲੰਡਨ – ਸਰਬਜੀਤ ਸਿੰਘ ਬਨੂੜ – ਪੰਜਾਬ ਵਿੱਚ ਭਾਜਪਾ ਅਕਾਲੀ ਦਲ ਦੇ ਗੰਠਜੋੜ ਨੂੰ ਲੈ ਕੇ ਸ਼੍ਰੌਮਣੀ ਅਕਾਲੀ ਦਲ ਬਾਦਲ ਦਾ ਸਿਆਸੀ ਭੱਵਿੱਖ ਮੁੜ ਦਾਅ ‘ਤੇ ਲੱਗ ਗਿਆ ਹੈ।
ਪੰਜਾਬ ਵਿਧਾਨ ਸਭਾ ਚੌਣਾਂ ਵਿੱਚ ਸ਼੍ਰੌਮਣੀ ਅਕਾਲੀ ਦਲ ਬਾਦਲ ਤੇ ਭਾਜਪਾ ਦੀ ਹੋਈ ਜਬਰਦਸਤ ਹਾਰ, ਦੋਵਾਂ ਪਾਰਟੀਆਂ ਦਾ ਸਿਆਸੀ ਤੋੜ ਵਿਛੋੜਾ ‘ਤੇ ਮੁੜ ਸਿਆਸੀ ਕੁਰਸੀ ਦੀ ਲਾਲਸਾ ਨੇ ਦੋਵੇਂ ਪਾਰਟੀਆਂ ਨੂੰ ਮੁੜ ਇੱਕ ਦੂਜੇ ਦੇ ਨੇੜੇ ਲਿਆ ਖੜਾ ਕਰ ਦਿੱਤਾ ਹੈ ਪਰ ਦੇਸ਼ ਵਿੱਚ ਮੁੜ ਸ਼ੁਰੂ ਹੋ ਰਿਹਾ ਕਿਸਾਨ ਅੰਦੋਲਨ ਪੰਜਾਬ ਦੀ ਖੇਤਰੀ ਪਾਰਟੀ ਅਕਾਲੀ ਦਲ ਨੂੰ ਫਾਇਦਾ ਨਾ ਦੇ ਕੇ ਜ਼ਰੂਰ ਮੁੜ ਸਬਕ ਸਿਖਾਵੇਗਾ।
ਭਾਵੇਂ ਕਿ ਦੋਵਾਂ ਪਾਰਟੀਆਂ ਵਿਚਾਲੇ ਤੋੜ ਵਿਛੋੜੇ ਨੇ ਪੰਜਾਬ ਵਿੱਚ ਆਮ ਆਦਮੀ ਪਾਰਟੀ ਦੀ ਪੂਰਨ ਬਹੁਮਤ ਵਾਲੀ ਮਜ਼ਬੂਤ ਸਰਕਾਰ ਬਣਾ ਦਿੱਤੀ ਹੈ ‘ਤੇ ਪੰਜਾਬ ਦੀ ਹਿਤੈਸ਼ੀ ਪਾਰਟੀ ਵਿਰੋਧੀ ਧਿਰ ਵੀ ਨਾ ਬਣ ਗਿਣਤੀ ਦੇ ਮੈਂਬਰਾਂ ਨਾਲ ਸਬਰ ਕਰ ਬੈਠ ਗਈ ਤੇ ਪੰਜਾਬ ਵਿੱਚ ਪੰਜਾਬ ਬਚਾਉ ਦੇ ਨਾਅਰੇ ਨਾਲ ਸਿਆਸੀ ਹਲਚਲ ਸ਼ੁਰੂ ਕੀਤੀ ਪਰੰਤੂ ਉਹ ਵੀ ਕੁਝ ਸ਼ਹਿਰਾਂ ਤੱਕ ਸੀਮਿਤ ਰਹਿ ਗਈ ਤੇ ਲੋਕਾਂ ਵਿੱਚ ਅੱਜ ਵੀ ਅਕਾਲੀ ਭਾਜਪਾ ਸਰਕਾਰ ਸਮੇਂ ਹੋਈਆਂ ਅਣ ਗਿਣਤ ਗੁਰੂ ਗ੍ਰੰਥ ਸਾਹਿਬ ਦੀਆਂ ਬੇਅਦਬੀਆਂ ਨੂੰ ਲੋਕੀੰ ਨਾ ਭੁੱਲੇ ਸਕੇ। ਸਮੁੱਚੇ ਪੰਜਾਬ ਦੀਆਂ ਵੋਟਾਂ ਦੀ ਗਿਣਤੀ ਵੇਖੀ ਜਾਵੇ ਤਾਂ ਤੋੜ ਵਿਛੋੜੇ ਕਾਰਨ ਦੋਵੇਂ ਪਾਰਟੀਆਂ ਜਿੱਤ ਦੇ ਨਿਸ਼ਾਨ ਤੋਂ ਹੇਠਾਂ ਡਿੱਗ ਪਈਆਂ ਪਰ ਆਪਣੀ ਆਪਣੀ ਆਕੜ ਕਾਰਨ ਗਲਤੀਆਂ ਤੇ ਗਲਤੀਆਂ ਕਰਦੀਆਂ ਤੂੰ ਉੱਤਰ ਮੇਰੀ ਵਾਰੀ ਵਾਂਗ ਆਮ ਜਨਤਾ ਨੇ ਦੋਨੋ ਪਾਰਟੀਆਂ ਦਾ ਪੱਤਾ ਸਾਫ ਕਰ ਤੀਜੀ ਧਿਰ ਨੂੰ ਪੰਜਾਬ ਤੇ ਕਾਬਜ਼ ਕਰ ਦਿੱਤਾ। ਪੰਜਾਬ ਦੀ ਸੱਤਾ ਮਾਣਣ ਲਈ ਕਈ ਥਾਵਾਂ ਤੇ ਪੰਜਾਬ ਵਿੱਚ ਪੇਂਡੂ ਵੋਟ ਤੇ ਪੰਥ ਖਤਰੇ ਦੇ ਨਆਰਿਆ ਤੇ ਪੰਜਾਬ ਵਿੱਚ ਖਾੜਕੂ ਬਾਦ ਦਾ ਨਾਅਰਾ ਲਾ ਕੇ ਸੱਤਾ ਹਾਸਲ ਕਰਨ ਵਾਲੀਆਂ ਦੋਵੇਂ ਵੱਡੀਆਂ ਧਿਰਾਂ ਪੰਜਾਬ ਵਿੱਚ ਮੁੜ ਪੈਰ ਲਾਉਣ ਲਈ ਤਰਲੋ ਮੱਛੀ ਹੋਈਆਂ ਪਈਆਂ ਹਨ। ਸਰਕਾਰ ਹੋਣ ਵੇਲੇ ਸਿੱਖ ਮਸਲਿਆਂ , ਬੰਦੀ ਸਿੰਘਾਂ ਦੀ ਰਿਹਾਈ ਤੇ ਚੁੱਪੀ ‘ਤੇ ਸਿੱਖਾਂ ਦੇ ਕਾਤਲਾਂ ਨੂੰ ਸ਼੍ਰੌਮਣੀ ਅਕਾਲੀ ਦਲ ਬਾਦਲ ਦੀ ਸਰਪ੍ਰਸਤੀ ਹੇਠ ਉਚ ਅਹੁਦਿਆਂ ਤੇ ਨਿਵਾਜਣਾ ਸਿੱਖਾਂ ਦੇ ਖੁੱਲ੍ਹੇ ਜ਼ਖ਼ਮਾਂ ਤੇ ਲੂਣ ਪਾਉਣ ਬਰਾਬਰ ਸੀ ਤੇ ਕਿਸਾਨ ਅੰਦੋਲਨ ਦੌਰਾਨ ਭਾਜਪਾ ਦਾ ਕਿਸਾਨਾਂ ਪ੍ਰਤੀ ਵਿਹਾਰ ਤੇ ਮੁੜ ਸ਼ੁਰੂ ਹੋਣ ਜਾ ਰਹੇ ਕਿਸਾਨ ਅੰਦੋਲਨ ਤੇ ਸ਼੍ਰੌਮਣੀ ਅਕਾਲੀ ਦਲ ਬਾਦਲ ਤੇ ਭਾਜਪਾ ਵਿਚਕਾਰ ਗੰਠਜੋੜ ਦੀ ਅਵਾਜ ਪੰਜਾਬ ਵਿੱਚ ਮੁੜ ਤੋਂ ਸ਼੍ਰੌਮਣੀ ਅਕਾਲੀ ਦਲ ਬਾਦਲ ਲਈ ਚੰਗੇ ਸੰਕੇਤ ਨਹੀ ਹੋਣਗੇ।
ਜੇਕਰ ਅਜਿਹਾ ਹੋ ਗਿਆ ਤਾਂ ਪੰਜਾਬ ਵਿੱਚ ਪੰਜਾਬੀ ਸ਼੍ਰੌਮਣੀ ਅਕਾਲੀ ਦਲ ਬਾਦਲ ਦਾ ਸਿਆਸੀ ਰੁਤਬਾ ਖਤਮ ਹੋਣ ਦੇ ਨਾਲ ਪੰਜਾਬ ਵਿੱਚੋਂ ਖੇਤਰੀ ਪਾਰਟੀ ਦਾ ਇੱਕ ਵੀ ਐਮ ਪੀ ਤੇ ਪੰਜਾਬ ਵਿਧਾਨ ਸਭਾ ਵਿੱਚ ਮੁਕੰਮਲ ਮੈਂਬਰੀ ਖਤਮ ਹੋਣ ਦੇ ਅਸਾਰ ਬਣ ਜਾਣਗੇ ਤੇ ਪੁਰਾਤਨ ਅਕਾਲੀ ਦਲ ਇਕ ਪਰਿਵਾਰ ਦੇ ਕੁਰਸੀ ਦੀ ਲਾਲਸਾ ਕਾਰਨ ਵਜੂਦ ਖਤਮ ਕਰਨ ਵੱਲ ਇਕ ਹੋਰ ਕਦਮ ਵਧ ਜਾਵੇਗਾ ਜਿਸ ਦਾ ਅਸਰ ਕਈ ਸਾਲ ਤੱਕ ਸਿੱਖ ਕੋਮ ਨੂੰ ਝੱਲਣਾ ਪਵੇਗਾ।
ਪੰਜਾਬ ਚੋਣਾਂ ਵਿੱਚ ਅਕਾਲੀ ਦਲ ਦੀ ਸਰਮਨਾਕ ਹਾਰ ਤੋਂ ਬਾਦ 12 ਮਾਰਚ 2022 ਨੂੰ ਜਗਬਾਣੀ ਅਖਬਾਰ ਵਿੱਚ ਪ੍ਰਕਾਸਿਤ ਖ਼ਬਰ ਰਾਹੀਂ ਵਿਦੇਸ਼ੀ ਸਿੱਖਾਂ ਨੇ ਪੁਰਾਤਨ ਅਕਾਲੀ ਦਲ ਨੂੰ ਮੁੜ ਪੰਜਾਬ ਹਿਤੈਸ਼ੀ ਬਣਾਉਣ ਲਈ ਕਈ ਸੁਝਾਅ ਦਿੱਤੇ ਪਰੰਤੂ ਉਹ ਵੀ ਅੱਖੋ ਪਰੋਖੇ ਕਰ ਬਾਦਲ ਪਰਿਵਾਰ ਨੇ ਲਗਾਤਾਰ ਗੁਰਦਵਾਰਾ ਪ੍ਰਬੰਧ ਤੇ ਕਾਬਜ਼ ਹੋਣ ਦੇ ਬਾਵਜੂਦ ਸਿੱਖੀਂ ਦੇ ਪਸਾਰ ਤੇ ਪੰਜਾਬ ਦੀ ਸਿਆਸਤ ਵਿੱਚ ਕੋਈ ਮੱਲ ਨਾ ਮਾਰ ਸਕਿਆ ਪਰੰਤੂ ਕੋਈ ਵੀ ਪਾਰਟੀ ਵਿਦੇਸ਼ੀ ਸਿੱਖਾਂ ਨੂੰ ਨਜ਼ਰ ਅੰਦਾਜ਼ ਕਰ ਪੰਜਾਬ ਵਿੱਚ ਕਾਮਯਾਬ ਨਹੀਂ ਹੋ ਸਕਦੀ।
