80 Isha Foundation devotees who went on Kailash Yatra were stranded at the Tibet border due to floods, Sadhguru was also present at the spot

ਕੈਲਾਸ਼ ਯਾਤਰਾ ‘ਤੇ ਗਏ ਈਸ਼ਾ ਫਾਊਂਡੇਸ਼ਨ ਦੇ 80 ਸ਼ਰਧਾਲੂ ਹੜ੍ਹ ਕਾਰਨ ਤਿੱਬਤ ਸਰਹੱਦ ‘ਤੇ ਫਸੇ, ਸਦਗੁਰੂ ਵੀ ਮੌਕੇ ‘ਤੇ ਮੌਜੂਦ

Kathmandu, (ਆਵਾਜ਼ਿ ਕੌਮ ਬਿਊਰੋ)-ਨੇਪਾਲ ਅਤੇ ਚੀਨ ਦੇ ਸਰਹੱਦੀ ਇਲਾਕੇ ਵਿੱਚ ਆਏ ਭਿਆਨਕ ਹੜ੍ਹਾਂ ਕਾਰਨ ਕੈਲਾਸ਼ ਮਾਨਸਰੋਵਰ ਯਾਤਰਾ ‘ਤੇ ਗਏ ਈਸ਼ਾ ਫਾਊਂਡੇਸ਼ਨ ਦੇ 80 ਸ਼ਰਧਾਲੂ ਤਿੱਬਤ ਦੇ ਗਿਰੋਂਗ (Gyirong) ਇਮੀਗ੍ਰੇਸ਼ਨ ਸੈਂਟਰ ਵਿੱਚ ਫਸ ਗਏ ਹਨ। ਇਸ ਔਖੀ ਘੜੀ ਵਿੱਚ ਫਾਊਂਡੇਸ਼ਨ ਦੇ ਸੰਸਥਾਪਕ ਸਦਗੁਰੂ ਵੀ ਸ਼ਰਧਾਲੂਆਂ ਦੇ ਨਾਲ ਉੱਥੇ ਹੀ ਮੌਜੂਦ ਹਨ। ਸਦਗੁਰੂ ਵੱਲੋਂ ਸਾਂਝੀ ਕੀਤੀ ਗਈ ਜਾਣਕਾਰੀ ਅਨੁਸਾਰ, ਚੀਨ ਦੇ ਤਿੱਬਤ ਖੇਤਰ ਵਿੱਚ ਸਥਿਤ ਗਿਰੋਂਗ ਦਾ ਇਮੀਗ੍ਰੇਸ਼ਨ ਦਫ਼ਤਰ ਅਚਾਨਕ ਆਏ ਭਿਆਨਕ ਹੜ੍ਹ ਦੀ ਲਪੇਟ ਵਿੱਚ ਆ ਗਿਆ ਹੈ। ਜਦੋਂ ਇਹ ਹਾਦਸਾ ਵਾਪਰਿਆ, ਤਾਂ ਈਸ਼ਾ ਫਾਊਂਡੇਸ਼ਨ ਦੇ ਸ਼ਰਧਾਲੂਆਂ ਦਾ ਇੱਕ ਗਰੁੱਪ ਵਾਪਸੀ ਦੌਰਾਨ ਉੱਥੇ ਮੌਜੂਦ ਸੀ। ਹੜ੍ਹ ਕਾਰਨ ਇਮੀਗ੍ਰੇਸ਼ਨ ਦਫ਼ਤਰ ਦੀ ਇਮਾਰਤ ਅਤੇ ਕਸਬੇ ਦਾ ਇੱਕ ਵੱਡਾ ਹਿੱਸਾ ਪਾਣੀ ਵਿੱਚ ਡੁੱਬ ਗਿਆ ਹੈ। ਹੜ੍ਹ ਪ੍ਰਭਾਵਿਤ ਖੇਤਰ ਵਿੱਚ ਖੁਦ ਮੌਜੂਦ ਸਦਗੁਰੂ ਨੇ ਫਸੇ ਹੋਏ ਸ਼ਰਧਾਲੂਆਂ ਦੇ ਪਰਿਵਾਰਾਂ ਨੂੰ ਹਰ ਸੰਭਵ ਮਦਦ ਅਤੇ ਸੁਰੱਖਿਅਤ ਨਿਕਾਸੀ (ਰੈਸਕਿਊ) ਦਾ ਪੂਰਾ ਭਰੋਸਾ ਦਿੱਤਾ ਹੈ। ਉਨ੍ਹਾਂ ਕਿਹਾ, “ਮੈਂ ਇਸ ਮੁਸ਼ਕਲ ਸਮੇਂ ਵਿੱਚ ਪ੍ਰਭਾਵਿਤ ਲੋਕਾਂ ਅਤੇ ਉਨ੍ਹਾਂ ਦੇ ਪਰਿਵਾਰਾਂ ਦੇ ਦਰਦ ਨੂੰ ਚੰਗੀ ਤਰ੍ਹਾਂ ਸਮਝਦਾ ਹਾਂ। ਅਸੀਂ ਇਸ ਬੇਹੱਦ ਨਾਜ਼ੁਕ ਘੜੀ ਵਿੱਚ ਰਾਹਤ ਕਾਰਜਾਂ ਲਈ ਕੋਈ ਕਸਰ ਨਹੀਂ ਛੱਡ ਰਹੇ ਹਾਂ। ਮੈਂ ਖੁਦ ਇੱਥੇ ਮੌਜੂਦ ਹਾਂ ਤਾਂ ਜੋ ਹਾਲਾਤ ਮੁਤਾਬਕ ਹਰ ਸੰਭਵ ਅਤੇ ਬਿਹਤਰ ਕਦਮ ਚੁੱਕਿਆ ਜਾ ਸਕੇ।” ਈਸ਼ਾ ਫਾਊਂਡੇਸ਼ਨ ਦੇ ਅੰਕੜਿਆਂ ਮੁਤਾਬਕ, ਇਸ ਸਾਲ ਕੈਲਾਸ਼ ਯਾਤਰਾ ਲਈ ਕੁੱਲ 21 ਗਰੁੱਪ ਗਏ ਹੋਏ ਸਨ। ਇਨ੍ਹਾਂ ਵਿੱਚੋਂ 495 ਲੋਕ ਸੁਰੱਖਿਅਤ ਵਾਪਸ ਪਰਤ ਚੁੱਕੇ ਹਨ, ਜਦੋਂ ਕਿ 743 ਲੋਕ ਇਸ ਸਮੇਂ ਤਿੱਬਤ ਵਿੱਚ ਅਤੇ 148 ਲੋਕ ਨੇਪਾਲ ਵਿੱਚ ਮੌਜੂਦ ਹਨ। ਇਸ ਦੇ ਨਾਲ ਹੀ 80 ਸ਼ਰਧਾਲੂ ਇਮੀਗ੍ਰੇਸ਼ਨ ਸੈਂਟਰ ਵਿੱਚ ਫਸੇ ਹੋਏ ਹਨ ਅਤੇ 3 ਵਲੰਟੀਅਰ ਤਿਮੁਰੇ (ਨੇਪਾਲ) ਵਿੱਚ ਮੌਜੂਦ ਹਨ। ਦੱਸਣਯੋਗ ਹੈ ਕਿ ਨੇਪਾਲ ਵਿੱਚ ਆਏ ਹੜ੍ਹ ਕਾਰਨ ਭਾਰੀ ਤਬਾਹੀ ਮਚੀ ਹੋਈ ਹੈ ਅਤੇ ਲਗਭਗ 133 ਭਾਰਤੀ ਸੈਲਾਨੀ ਲਾਪਤਾ ਦੱਸੇ ਜਾ ਰਹੇ ਹਨ, ਜਿਨ੍ਹਾਂ ਵਿੱਚੋਂ ਜ਼ਿਆਦਾਤਰ ਕੈਲਾਸ਼ ਯਾਤਰਾ ‘ਤੇ ਸਨ।