Havoc caused by heavy rain: 117 houses collapsed and 15 people died in UP

ਭਾਰੀ ਮੀਂਹ ਦਾ ਕਹਿਰ: UP ‘ਚ 117 ਮਕਾਨ ਡਿੱਗੇ, 15 ਲੋਕਾਂ ਦੀ ਮੌਤ

ਲਖਨਊ (ਆਵਾਜ਼ਿ ਕੌਮ ਬਿਊਰੋ)- ਉੱਤਰ ਪ੍ਰਦੇਸ਼ ਵਿੱਚ ਪਿਛਲੇ 48 ਘੰਟਿਆਂ ਤੋਂ ਹੋ ਰਹੀ ਭਾਰੀ ਬਾਰਿਸ਼ ਅਤੇ ਤੇਜ਼ ਹਵਾਵਾਂ ਨੇ ਵੱਡੇ ਪੱਧਰ ‘ਤੇ ਤਬਾਹੀ ਮਚਾਈ ਹੈ। ਸੂਬੇ ਵਿੱਚ ਮੀਂਹ ਨਾਲ ਸਬੰਧਤ ਵੱਖ-ਵੱਖ ਹਾਦਸਿਆਂ ਵਿੱਚ 15 ਲੋਕਾਂ ਦੀ ਮੌਤ ਹੋ ਗਈ ਹੈ, ਜਦਕਿ ਕੁੱਲ 117 ਮਕਾਨ ਢਹਿ ਗਏ ਹਨ। ਇਸ ਤੋਂ ਇਲਾਵਾ ਖੇਤਾਂ ਵਿੱਚ ਫਸਲਾਂ ਨੂੰ ਵੀ ਭਾਰੀ ਨੁਕਸਾਨ ਪਹੁੰਚਿਆ ਹੈ। ਲਖਨਊ ਵਿੱਚ ਪੁਰਾਣੇ ਸ਼ਹਿਰ ਦੇ ਹੁਸੈਨਾਬਾਦ ਸਥਿਤ ਇਤਿਹਾਸਕ ਗੇਟ ਦਾ ਇੱਕ ਹਿੱਸਾ ਡਿੱਗ ਗਿਆ। ਰਾਹਤ ਕਮਿਸ਼ਨਰ ਡਾ. ਹ੍ਰਿਸ਼ੀਕੇਸ਼ ਭਾਸਕਰ ਯਸ਼ੋਦ ਅਨੁਸਾਰ ਸੂਬੇ ਦੇ 63 ਜ਼ਿਲ੍ਹਿਆਂ ਵਿੱਚ ਆਮ ਨਾਲੋਂ ਵੱਧ ਮੀਂਹ ਦਰਜ ਕੀਤਾ ਗਿਆ ਹੈ ਅਤੇ ਪਿਛਲੇ 24 ਘੰਟਿਆਂ ਦੌਰਾਨ ਪੂਰੇ ਰਾਜ ਵਿੱਚ ਆਮ ਨਾਲੋਂ 19 ਗੁਣਾ ਵੱਧ ਮੀਂਹ ਪਿਆ ਹੈ। ਲਖੀਮਪੁਰ ਖੀਰੀ ਵਿੱਚ ਨੀਮਗਾਂਵ ਥਾਣਾ ਖੇਤਰ ਦੇ ਰਹਮਤ ਨਗਰ ਪਿੰਡ ਵਿੱਚ ਕੱਚੇ ਮਕਾਨ ਦੀ ਦੀਵਾਰ ਡਿੱਗਣ ਨਾਲ ਇੱਕੋ ਪਰਿਵਾਰ ਦੇ ਤਿੰਨ ਮੈਂਬਰਾਂ—ਮੋਹਨ ਕਸ਼ਯਪ (50), ਉਸ ਦੀ ਪਤਨੀ ਕਵਿਤਾ (45) ਅਤੇ ਬੇਟੇ ਅਨਿਲ (6) ਦੀ ਮਲਬੇ ਹੇਠ ਦਬਣ ਨਾਲ ਮੌਤ ਹੋ ਗਈ। ਅਮੇਠੀ ਵਿੱਚ ਜਾਮੋਂ ਥਾਣਾ ਖੇਤਰ ਦੇ ਬਲਭਦਰਪੁਰ ਵਿੱਚ ਕੱਚੇ ਘਰ ਦੀ ਦੀਵਾਰ ਡਿੱਗਣ ਨਾਲ ਊਸ਼ਾ ਦੇਵੀ ਨਾਮਕ ਔਰਤ ਦੀ ਮੌਤ ਹੋ ਗਈ। ਬਾਰਾਬੰਕੀ ਦੇ ਗੋਪਾਲਪੁਰ ਵਿੱਚ ਕੱਚੀ ਦੀਵਾਰ ਡਿੱਗਣ ਨਾਲ 38 ਸਾਲਾ ਸੁਨੀਤਾ ਦੇਵੀ ਦੀ ਜਾਨ ਚਲੀ ਗਈ। ਇਸ ਤੋਂ ਇਲਾਵਾ ਛੇਦਾ ਬਾਜ਼ਾਰ ਪਿੰਡ ਵਿੱਚ ਦੁੱਧ ਵੇਚ ਕੇ ਮੋਟਰਸਾਈਕਲ ‘ਤੇ ਵਾਪਸ ਆ ਰਹੇ 45 ਸਾਲਾ ਸੰਜੇ ਵਰਮਾ ‘ਤੇ ਰੁੱਖ ਡਿੱਗਣ ਨਾਲ ਉਸ ਦੀ ਮੌਕੇ ‘ਤੇ ਹੀ ਮੌਤ ਹੋ ਗਈ। ਫਤੇਹਪੁਰ ਵਿੱਚ ਵੱਖ-ਵੱਖ ਥਾਵਾਂ ‘ਤੇ 10 ਕੱਚੇ ਮਕਾਨ ਡਿੱਗ ਗਏ, ਜਿੱਥੇ ਮਲਬੇ ਹੇਠ ਦਬਣ ਨਾਲ 8 ਸਾਲਾ ਮਾਸੂਮ ਦੀ ਮੌਤ ਹੋ ਗਈ ਅਤੇ ਉਸ ਦਾ 11 ਸਾਲਾ ਭਰਾ ਗੰਭੀਰ ਜ਼ਖਮੀ ਹੋ ਗਿਆ। ਮੌਸਮ ਵਿਭਾਗ ਦੇ ਅੰਕੜਿਆਂ ਅਨੁਸਾਰ ਲਖਨਊ ਵਿੱਚ 21 ਘੰਟਿਆਂ ਦੌਰਾਨ 125.8 ਮਿਲੀਮੀਟਰ ਬਾਰਿਸ਼ ਦਰਜ ਕੀਤੀ ਗਈ। ਫਰੁੱਖਾਬਾਦ ਵਿੱਚ ਆਮ ਨਾਲੋਂ 200 ਗੁਣਾ, ਕਾਨਪੁਰ ਨਗਰ ਵਿੱਚ 160 ਗੁਣਾ ਅਤੇ ਕਨੌਜ, ਕਾਨਪੁਰ ਦਿਹਾਤ ਤੇ ਹਰਦੋਈ ਵਿੱਚ ਆਮ ਨਾਲੋਂ 130 ਗੁਣਾ ਵੱਧ ਮੀਂਹ ਪਿਆ ਹੈ। ਉਨਾਂਵ ਵਿੱਚ ਗੰਗਾ ਐਕਸਪ੍ਰੈਸਵੇਅ ‘ਤੇ ਟੋਲ ਪਲਾਜ਼ਾ ਨੇੜੇ ਪਾਣੀ ਭਰਨ ਕਾਰਨ ਆਵਾਜਾਈ ਕਾਫ਼ੀ ਪ੍ਰਭਾਵਿਤ ਹੋਈ ਹੈ। ਲਖਨਊ ਨਗਰ ਨਿਗਮ ਨੇ ਬਾਰਿਸ਼ ਅਤੇ ਜਲ-ਭਰਾਅ ਨਾਲ ਜੁੜੀਆਂ ਸ਼ਿਕਾਇਤਾਂ ਦੇ ਨਿਪਟਾਰੇ ਲਈ ਕੰਟਰੋਲ ਰੂਮ ਦਾ ਟੋਲ-ਫ੍ਰੀ ਨੰਬਰ 1533 ਜਾਰੀ ਕੀਤਾ ਹੈ। ਇਸ ਤੋਂ ਇਲਾਵਾ ਨਾਗਰਿਕ 9219902911, 9219902912, 9219902913 ਅਤੇ 9219902914 ‘ਤੇ ਵੀ ਆਪਣੀ ਸ਼ਿਕਾਇਤ ਦਰਜ ਕਰਵਾ ਸਕਦੇ ਹਨ। ਮੁੱਖ ਮੰਤਰੀ ਯੋਗੀ ਆਦਿੱਤਿਆਨਾਥ ਨੇ ਪ੍ਰਭਾਵਿਤ ਜ਼ਿਲ੍ਹਿਆਂ ਦੇ ਜ਼ਿਲ੍ਹਾ ਅਧਿਕਾਰੀਆਂ ਨੂੰ ਵਿਸ਼ੇਸ਼ ਤੌਰ ‘ਤੇ ਅਲਰਟ ਰਹਿਣ, ਖੇਤਰਾਂ ਦਾ ਦੌਰਾ ਕਰਨ ਅਤੇ ਰਾਹਤ ਪ੍ਰਬੰਧਾਂ ਦੀ ਨਿਗਰਾਨੀ ਕਰਨ ਦੇ ਨਿਰਦੇਸ਼ ਦਿੱਤੇ ਹਨ। ਰੈੱਡ ਅਲਰਟ ਵਾਲੇ ਜ਼ਿਲ੍ਹਿਆਂ ਵਿੱਚ ਸਕੂਲ ਬੰਦ ਰੱਖਣ ਦੇ ਹੁਕਮ ਦਿੱਤੇ ਗਏ ਹਨ। ਪ੍ਰਸ਼ਾਸਨ ਨੇ ਆਜ਼ਮਗੜ੍ਹ, ਬਲੀਆ, ਗਾਜ਼ੀਪੁਰ, ਮਊ, ਗੋਰਖਪੁਰ, ਲਖਨਊ, ਕਾਨਪੁਰ ਸਮੇਤ ਕਈ ਜ਼ਿਲ੍ਹਿਆਂ ਨੂੰ ਫਲੈਸ਼ ਫਲੱਡ (ਅਚਾਨਕ ਹੜ੍ਹ) ਦੀ ਦ੍ਰਿਸ਼ਟੀ ਤੋਂ ਸੰਵੇਦਨਸ਼ੀਲ ਵਜੋਂ ਚਿੰਨ੍ਹਿਤ ਕੀਤਾ ਹੈ।