Uproar in Pakistan! Part of Tarbela Dam collapses; workers evacuated

ਪਾਕਿਸਤਾਨ ‘ਚ ਮਚੀ ਹਾਹਾਕਾਰ! ਤਰਬੇਲਾ ਡੈਮ ਦਾ ਹਿੱਸਾ ਢਹਿ-ਢੇਰੀ, ਮਜ਼ਦੂਰਾਂ ਨੂੰ ਕੱਢਿਆ ਬਾਹਰ

Islamabad, (ਆਵਾਜ਼ਿ ਕੌਮ ਬਿਊਰੋ)-ਪਾਕਿਸਤਾਨ ਦੇ ਖੈਬਰ ਪਖਤੂਨਖਵਾ ਖੇਤਰ ਵਿੱਚ ਚੀਨੀ ਕੰਪਨੀ ਵੱਲੋਂ ਬਣਾਏ ਜਾ ਰਹੇ ਤਰਬੇਲਾ ਡੈਮ ਦੀ ਪੰਜਵੀਂ ਵਿਸਥਾਰ ਪਰਿਯੋਜਨਾ (T-5) ਦਾ ਇੱਕ ਹਿੱਸਾ ਚੱਟਾਨ ਖਿਸਕਣ ਕਾਰਨ ਢਹਿ ਗਿਆ, ਜਿਸ ਨਾਲ ਨਿਰਮਾਣ ਵਾਲੀ ਥਾਂ ‘ਤੇ ਪਾਣੀ ਦਾ ਤੇਜ਼ ਬਹਾਅ ਆ ਗਿਆ। ਵਾਟਰ ਐਂਡ ਪਾਵਰ ਡਿਵੈਲਪਮੈਂਟ ਅਥਾਰਟੀ (WAPDA) ਅਨੁਸਾਰ, ਟਨਲ ਦੀ ਖੁਦਾਈ ਦੌਰਾਨ ਕਮਜ਼ੋਰ ਚੱਟਾਨ ਡਿੱਗਣ ਕਾਰਨ ਪਾਣੀ ਨਿਰਮਾਣ ਅਧੀਨ ਪਾਵਰ ਹਾਊਸ ਅਤੇ ਟਨਲ ਦੇ ਅੰਦਰ ਵੜ ਗਿਆ। ਘਟਨਾ ਤੋਂ ਤੁਰੰਤ ਬਾਅਦ ਨਿਰਮਾਣ ਕਾਰਜ ਰੋਕ ਦਿੱਤਾ ਗਿਆ ਅਤੇ ਇਲਾਕੇ ਵਿੱਚ ਐਮਰਜੈਂਸੀ ਘੋਸ਼ਿਤ ਕਰ ਦਿੱਤੀ ਗਈ। ਵਾਪਡਾ (WAPDA) ਅਧਿਕਾਰੀਆਂ ਅਨੁਸਾਰ, ਮੌਕੇ ‘ਤੇ ਮੌਜੂਦ ਸਾਰੇ ਮਜ਼ਦੂਰਾਂ ਨੂੰ ਸੁਰੱਖਿਅਤ ਬਾਹਰ ਕੱਢ ਲਿਆ ਗਿਆ ਹੈ ਅਤੇ ਇੰਟੇਕ ਪਿੱਟ ਤੋਂ ਪਾਣੀ ਕੱਢਣ ਦੀ ਕਾਰਵਾਈ ਕੀਤੀ ਗਈ ਹੈ। ਸਵਾਬੀ ਦੇ ਡਿਪਟੀ ਕਮਿਸ਼ਨਰ ਨਸਰੁੱਲਾ ਖਾਨ ਨੇ ਦੱਸਿਆ ਕਿ ਜ਼ਰੂਰੀ ਕਾਰਨਾਂ ਕਰਕੇ ਡੈਮ ਤੋਂ ਵਾਧੂ ਪਾਣੀ ਛੱਡਿਆ ਗਿਆ ਹੈ, ਜਿਸ ਨਾਲ ਸਿੰਧੂ ਨਦੀ ਵਿੱਚ ਪਾਣੀ ਦਾ ਬਹਾਅ ਅਤੇ ਪੱਧਰ ਕਾਫ਼ੀ ਵਧ ਸਕਦਾ ਹੈ। ਪ੍ਰਸ਼ਾਸਨ ਨੇ ਆਮ ਲੋਕਾਂ ਨੂੰ ਸਿੰਧੂ ਨਦੀ ਵਿੱਚ ਨਹਾਉਣ, ਤੈਰਨ ਜਾਂ ਕਿਸ਼ਤੀ ਚਲਾਉਣ ਤੋਂ ਪੂਰੀ ਤਰ੍ਹਾਂ ਪਰਹੇਜ਼ ਕਰਨ ਦੀ ਅਪੀਲ ਕੀਤੀ ਹੈ। ਇਹ 1,530 ਮੈਗਾਵਾਟ ਸਮਰੱਥਾ ਵਾਲਾ ਤਰਬੇਲਾ ਟੀ-5 ਪ੍ਰੋਜੈਕਟ ਚੀਨ ਦੀ ਕੰਪਨੀ ਪਾਵਰ ਕੰਸਟ੍ਰਕਸ਼ਨ ਕਾਰਪੋਰੇਸ਼ਨ ਆਫ ਚਾਈਨਾ ਲਿਮਟਿਡ (PCCCL) ਵੱਲੋਂ ਤਿਆਰ ਕੀਤਾ ਜਾ ਰਿਹਾ ਹੈ। ਇਸ ਪ੍ਰੋਜੈਕਟ ਲਈ ਵਿਸ਼ਵ ਬੈਂਕ ਅਤੇ ਏਸ਼ੀਅਨ ਇਨਫਰਾਸਟ੍ਰਕਚਰ ਇਨਵੈਸਟਮੈਂਟ ਬੈਂਕ ਵੱਲੋਂ ਫੰਡ ਦਿੱਤਾ ਜਾ ਰਿਹਾ ਹੈ। ਪ੍ਰੋਜੈਕਟ ਦੀ ਲਾਗਤ 82 ਅਰਬ ਰੁਪਏ ਤੋਂ ਵਧ ਕੇ 317 ਅਰਬ ਰੁਪਏ ਹੋ ਗਈ ਹੈ ਅਤੇ ਇਸ ਦਾ ਨਿਰਮਾਣ ਕਾਰਜ ਜੂਨ 2028 ਤੱਕ ਪੂਰਾ ਹੋਣ ਦੀ ਉਮੀਦ ਹੈ।