Major incident in China: Massive fire breaks out in a 40-story building; 14 people dead

ਚੀਨ ‘ਚ ਵੱਡਾ ਹਾਦਸਾ: 40 ਮੰਜ਼ਿਲਾ ਇਮਾਰਤ ‘ਚ ਲੱਗੀ ਭਿਆਨਕ ਅੱਗ, 14 ਲੋਕਾਂ ਦੀ ਮੌਤ

ਬੀਜਿੰਗ (ਆਵਾਜ਼ਿ ਕੌਮ ਬਿਊਰੋ)- ਚੀਨ ਦੇ ਤਾਈਯੁਆਨ ਵਿੱਚ ਐਤਵਾਰ ਨੂੰ ਇੱਕ ਉੱਚੀ ਇਮਾਰਤ ਵਿੱਚ ਲੱਗੀ ਅੱਗ ਕਾਰਨ 14 ਲੋਕਾਂ ਦੀ ਮੌਤ ਹੋ ਗਈ। ਐਤਵਾਰ ਸ਼ਾਮ ਨੂੰ ਲੱਗੀ ਇਸ ਅੱਗ ਤੋਂ ਬਾਅਦ 25 ਲੋਕਾਂ ਨੂੰ ਹਸਪਤਾਲ ਵਿੱਚ ਦਾਖਲ ਕਰਵਾਇਆ ਗਿਆ ਹੈ, ਇਨ੍ਹਾਂ ਵਿੱਚੋਂ 9 ਲੋਕ ਗੰਭੀਰ ਰੂਪ ਵਿੱਚ ਜ਼ਖ਼ਮੀ ਹਨ। ਵੀਡੀਓ ਫੁਟੇਜ ਵਿੱਚ 40 ਮੰਜ਼ਿਲਾ ਇਮਾਰਤ ਵਿੱਚੋਂ ਧੂੰਆਂ ਨਿਕਲਦਾ ਦਿਖਾਈ ਦੇ ਰਿਹਾ ਹੈ। ਅੱਗ ਬੁਝਾਊ ਕਰਮਚਾਰੀ ਕ੍ਰੇਨਾਂ ਦੀ ਮਦਦ ਨਾਲ ਅੱਗ ‘ਤੇ ਕਾਬੂ ਪਾਉਣ ਦੀ ਕੋਸ਼ਿਸ਼ ਕਰਦੇ ਨਜ਼ਰ ਆਏ, ਕਿਉਂਕਿ ਅੱਗ ਇਮਾਰਤ ਦੇ ਹੇਠਲੇ ਹਿੱਸਿਆਂ ਤੋਂ ਉੱਪਰ ਵੱਲ ਫੈਲ ਰਹੀ ਸੀ। ਜਾਣਕਾਰੀ ਅਨੁਸਾਰ, ਅੱਗ ਇਮਾਰਤ ਦੇ ਹੇਠਲੇ ਹਿੱਸੇ ਵਿੱਚ ਲਗਭਗ ਚੌਥੀ ਮੰਜ਼ਿਲ ‘ਤੇ ਸ਼ੁਰੂ ਹੋਈ ਅਤੇ ਫਿਰ ਅੱਠਵੀਂ ਤੇ ਨੌਵੀਂ ਮੰਜ਼ਿਲ ਤੱਕ ਫੈਲ ਗਈ, ਜਿੱਥੇ ਇੱਕ ਹੋਟਲ ਸਥਿਤ ਹੈ। ਇਹ ਇਮਾਰਤ ਵਪਾਰਕ ਅਤੇ ਰਿਹਾਇਸ਼ੀ, ਦੋਵਾਂ ਉਦੇਸ਼ਾਂ ਲਈ ਵਰਤੀ ਜਾਂਦੀ ਹੈ। ਇਸ ਵਿੱਚ ਕਈ ਹੋਟਲ, ਥੋੜ੍ਹੇ ਸਮੇਂ ਲਈ ਕਿਰਾਏ ‘ਤੇ ਮਿਲਣ ਵਾਲੇ ਅਪਾਰਟਮੈਂਟ, ਛੋਟੇ ਸਮਾਗਮਾਂ ਲਈ ਥਾਵਾਂ ਅਤੇ ਕੋਚਿੰਗ ਸੈਂਟਰ ਮੌਜੂਦ ਹਨ। ਲਗਭਗ 2 ਘੰਟਿਆਂ ਦੀ ਜੱਦੋ-ਜਹਿਦ ਤੋਂ ਬਾਅਦ ਅੱਗ ‘ਤੇ ਕਾਬੂ ਪਾ ਲਿਆ ਗਿਆ। ਅਧਿਕਾਰੀਆਂ ਨੇ ਦੱਸਿਆ ਕਿ ਐਤਵਾਰ ਦੇਰ ਰਾਤ 12:30 ਵਜੇ ਤੱਕ ਬਚਾਅ ਕਾਰਜ ਪੂਰਾ ਕਰ ਲਿਆ ਗਿਆ ਸੀ।