Punjab: 3 individuals posing as police were conducting checks; they fled following an accident in which a driver died
ਪੰਜਾਬ: ਨਕਲੀ ਪੁਲਸ ਬਣ ਚੈਕਿੰਗ ਕਰ ਰਹੇ ਸਨ 3 ਵਿਅਕਤੀ, ਹਾਦਸੇ ’ਚ ਡਰਾਈਵਰ ਦੀ ਮੌਤ ਮਗਰੋਂ ਹੋਏ ਫਰਾਰ
ਬਠਿੰਡਾ (ਆਵਾਜ਼ਿ ਕੌਮ ਬਿਊਰੋ)-ਪੰਜਾਬ ਵਿੱਚ ਹੁਣ ਅਪਰਾਧੀਆਂ ਨੇ ਵਾਰਦਾਤਾਂ ਨੂੰ ਅੰਜਾਮ ਦੇਣ ਲਈ ਖਾਕੀ ਵਰਦੀ ਨੂੰ ਹੀ ਹਥਿਆਰ ਬਣਾਉਣਾ ਸ਼ੁਰੂ ਕਰ ਦਿੱਤਾ ਹੈ। ਪੁਲਸ ਦੀ ਵਰਦੀ ਪਾ ਕੇ ਹਾਈਵੇਅ ’ਤੇ ਵਾਹਨਾਂ ਦੀ ਚੈਕਿੰਗ ਦੇ ਨਾਂ ’ਤੇ ਟਰੱਕ ਚਾਲਕਾਂ ਨੂੰ ਰੋਕਣਾ ਅਤੇ ਫਿਰ ਆਪਣੀ ਮਨਮਰਜ਼ੀ ਕਰਨਾ ਕਿੰਨਾ ਖਤਰਨਾਕ ਸਾਬਤ ਹੋ ਸਕਦਾ ਹੈ, ਇਸ ਦੀ ਸਨਸਨੀਖੇਜ਼ ਮਿਸਾਲ ਬਠਿੰਡਾ-ਡੱਬਵਾਲੀ ਨੈਸ਼ਨਲ ਹਾਈਵੇਅ (ਭਾਰਤਮਾਲਾ ਰੋਡ) ’ਤੇ ਪਿੰਡ ਡੂੰਮਵਾਲੀ ਨੇੜੇ ਦੇਖਣ ਨੂੰ ਮਿਲੀ। ਇੱਥੇ ਬੀਤੀ ਅੱਧੀ ਰਾਤ ਨੂੰ ਪ੍ਰਾਈਵੇਟ ਕਾਰ ਵਿੱਚ ਸਵਾਰ ਤਿੰਨ ਵਰਦੀਧਾਰੀਆਂ ਨੇ ਕਥਿਤ ਤੌਰ ’ਤੇ ਹਾਈਵੇਅ ’ਤੇ ਨਾਕਾ ਲਗਾ ਕੇ ਤਿੰਨ ਟਰੱਕ ਰੁਕਵਾਏ ਹੋਏ ਸਨ। ਇਸੇ ਦੌਰਾਨ ਪਿੱਛੋਂ ਆ ਰਹੇ ਕੋਲੇ ਨਾਲ ਭਰੇ ਇੱਕ ਤੇਜ਼ ਰਫ਼ਤਾਰ ਟਰਾਲੇ ਦੀ ਖੜ੍ਹੇ ਟਰੱਕ ਨਾਲ ਜ਼ਬਰਦਸਤ ਟੱਕਰ ਹੋ ਗਈ, ਜਿਸ ਕਾਰਨ ਟਰਾਲਾ ਚਾਲਕ ਦੀ ਮੌਕੇ ’ਤੇ ਹੀ ਦਰਦਨਾਕ ਮੌਤ ਹੋ ਗਈ। ਸਭ ਤੋਂ ਹੈਰਾਨੀਜਨਕ ਗੱਲ ਇਹ ਰਹੀ ਕਿ ਹਾਦਸੇ ਤੋਂ ਬਾਅਦ ਮੌਕੇ ’ਤੇ ਮੌਜੂਦ ਤਿੰਨੇ ਵਰਦੀਧਾਰੀ ਆਪਣੀ ਪ੍ਰਾਈਵੇਟ ਕਾਰ ਸਮੇਤ ਉੱਥੋਂ ਫਰਾਰ ਹੋ ਗਏ। ਇਸ ਘਟਨਾ ਨੇ ਕਈ ਗੰਭੀਰ ਸਵਾਲ ਖੜ੍ਹੇ ਕਰ ਦਿੱਤੇ ਹਨ। ਆਖਰ ਅੱਧੀ ਰਾਤ ਨੂੰ ਪ੍ਰਾਈਵੇਟ ਕਾਰ ਵਿੱਚ ਸਵਾਰ ਹੋ ਕੇ ਹਾਈਵੇਅ ’ਤੇ ਟਰੱਕਾਂ ਦੀ ਚੈਕਿੰਗ ਕਰਨ ਵਾਲੇ ਇਹ ਲੋਕ ਕੌਣ ਸਨ? ਕੀ ਇਹ ਅਸਲ ਵਿੱਚ ਪੁਲਸ ਮੁਲਾਜ਼ਮ ਸਨ ਜਾਂ ਫਿਰ ਪੁਲਸ ਦੀ ਵਰਦੀ ਪਾ ਕੇ ਵਾਹਨ ਚਾਲਕਾਂ ਨੂੰ ਨਿਸ਼ਾਨਾ ਬਣਾਉਣ ਵਾਲੇ ਕਿਸੇ ਲੁਟੇਰਾ ਗਿਰੋਹ ਦੇ ਮੈਂਬਰ ਸਨ? ਜੇਕਰ ਇਹ ਪੁਲਸ ਮੁਲਾਜ਼ਮ ਸਨ ਤਾਂ ਹਾਦਸੇ ਤੋਂ ਬਾਅਦ ਮੌਕੇ ਤੋਂ ਭੱਜਣ ਦੀ ਕੀ ਮਜਬੂਰੀ ਸੀ? ਜੇਕਰ ਇਹ ਨਕਲੀ ਪੁਲਸ ਮੁਲਾਜ਼ਮ ਸਨ ਤਾਂ ਨੈਸ਼ਨਲ ਹਾਈਵੇਅ ’ਤੇ ਬੇਖੌਫ਼ ਹੋ ਕੇ ਨਾਕਾ ਲਗਾਉਣ ਅਤੇ ਭਾਰੀ ਵਾਹਨਾਂ ਨੂੰ ਰੋਕਣ ਦੀ ਹਿੰਮਤ ਕਿਵੇਂ ਕਰ ਰਹੇ ਸਨ? ਹਾਦਸੇ ਵਿੱਚ ਜਾਨ ਗਵਾਉਣ ਵਾਲੇ ਚਾਲਕ ਦੀ ਪਛਾਣ ਬਬਰ ਸਿੰਘ ਪੁੱਤਰ ਦੇਵੀ ਸਿੰਘ ਵਾਸੀ ਪਿੰਡ ਚਾਨੀ, ਤਹਿਸੀਲ ਕੋਲਾਇਤ, ਜ਼ਿਲ੍ਹਾ ਬੀਕਾਨੇਰ (ਰਾਜਸਥਾਨ) ਵਜੋਂ ਹੋਈ ਹੈ। ਜਾਣਕਾਰੀ ਅਨੁਸਾਰ ਬਬਰ ਸਿੰਘ ਆਪਣੇ ਟਰਾਲੇ ਵਿੱਚ ਰਾਜਸਥਾਨ ਤੋਂ ਕੋਲਾ ਲੱਦ ਕੇ ਪੰਜਾਬ ਦੇ ਨਕੋਦਰ ਜਾ ਰਹੇ ਸਨ। ਜਦੋਂ ਉਨ੍ਹਾਂ ਦਾ ਟਰਾਲਾ ਪਿੰਡ ਡੂੰਮਵਾਲੀ ਨੇੜੇ ਪਹੁੰਚਿਆ ਤਾਂ ਉੱਥੇ ਤਿੰਨ ਵਰਦੀਧਾਰੀਆਂ ਨੇ ਆਪਣੀ ਪ੍ਰਾਈਵੇਟ ਕਾਰ ਖੜ੍ਹੀ ਕਰਕੇ ਚੈਕਿੰਗ ਦੇ ਨਾਂ ’ਤੇ ਹਾਈਵੇਅ ’ਤੇ ਤਿੰਨ ਟਰੱਕ ਰੁਕਵਾਏ ਹੋਏ ਸਨ। ਚਸ਼ਮਦੀਦਾਂ ਅਨੁਸਾਰ ਵਰਦੀਧਾਰੀਆਂ ਨੇ ਬਬਰ ਸਿੰਘ ਨੂੰ ਵੀ ਟਰਾਲਾ ਰੋਕਣ ਦਾ ਇਸ਼ਾਰਾ ਕੀਤਾ। ਅਚਾਨਕ ਸਾਹਮਣੇ ਖੜ੍ਹੇ ਟਰੱਕਾਂ ਨੂੰ ਦੇਖ ਕੇ ਚਾਲਕ ਨੇ ਬ੍ਰੇਕ ਲਗਾਉਣ ਦੀ ਕੋਸ਼ਿਸ਼ ਕੀਤੀ, ਪਰ ਤੇਜ਼ ਰਫ਼ਤਾਰ ਅਤੇ ਭਾਰੀ ਲੋਡ ਹੋਣ ਕਾਰਨ ਟਰਾਲਾ ਕਾਬੂ ਵਿੱਚ ਨਹੀਂ ਆ ਸਕਿਆ ਅਤੇ ਅੱਗੇ ਖੜ੍ਹੇ ਟਰੱਕ ਦੇ ਪਿਛਲੇ ਹਿੱਸੇ ਵਿੱਚ ਜਾ ਵੱਜਿਆ। ਟੱਕਰ ਇੰਨੀ ਜ਼ਬਰਦਸਤ ਸੀ ਕਿ ਟਰਾਲੇ ਦਾ ਅਗਲਾ ਕੈਬਿਨ ਬੁਰੀ ਤਰ੍ਹਾਂ ਨੁਕਸਾਨਿਆ ਗਿਆ ਅਤੇ ਚਾਲਕ ਅੰਦਰ ਹੀ ਫਸ ਗਿਆ। ਹਾਦਸੇ ਦੀ ਆਵਾਜ਼ ਸੁਣ ਕੇ ਆਸ-ਪਾਸ ਦੇ ਲੋਕ ਮੌਕੇ ’ਤੇ ਪਹੁੰਚੇ, ਪਰ ਉਦੋਂ ਤੱਕ ਚਾਲਕ ਦੀ ਮੌਤ ਹੋ ਚੁੱਕੀ ਸੀ। ਹਾਦਸੇ ਤੋਂ ਬਾਅਦ ਤਿੰਨਾਂ ਵਰਦੀਧਾਰੀਆਂ ਦਾ ਆਪਣੀ ਪ੍ਰਾਈਵੇਟ ਕਾਰ ਵਿੱਚ ਬੈਠ ਕੇ ਮੌਕੇ ਤੋਂ ਫਰਾਰ ਹੋਣਾ ਪੂਰੇ ਮਾਮਲੇ ਨੂੰ ਹੋਰ ਵੀ ਸ਼ੱਕੀ ਬਣਾ ਰਿਹਾ ਹੈ। ਆਮ ਤੌਰ ’ਤੇ ਪੁਲਸ ਵੱਲੋਂ ਹਾਈਵੇਅ ’ਤੇ ਵਾਹਨਾਂ ਦੀ ਜਾਂਚ ਲਈ ਸਰਕਾਰੀ ਵਾਹਨ, ਸੁਰੱਖਿਆ ਪ੍ਰਬੰਧ, ਬੈਰੀਕੇਡਿੰਗ ਅਤੇ ਨਿਰਧਾਰਤ ਪ੍ਰਕਿਰਿਆ ਅਪਣਾਈ ਜਾਂਦੀ ਹੈ, ਪਰ ਇੱਥੇ ਕਥਿਤ ਤੌਰ ’ਤੇ ਬਿਨਾਂ ਕਿਸੇ ਬੈਰੀਕੇਡਿੰਗ ਅਤੇ ਸੁਰੱਖਿਆ ਪ੍ਰਬੰਧ ਦੇ ਟਰੱਕਾਂ ਨੂੰ ਰੋਕਿਆ ਜਾ ਰਿਹਾ ਸੀ। ਜੇਕਰ ਇਹ ਅਸਲ ਪੁਲਸ ਮੁਲਾਜ਼ਮ ਸਨ ਤਾਂ ਹਾਦਸੇ ਵਿੱਚ ਚਾਲਕ ਦੀ ਮੌਤ ਤੋਂ ਬਾਅਦ ਮੌਕੇ ਤੋਂ ਚਲੇ ਜਾਣ ਦਾ ਕੀ ਕਾਰਨ ਸੀ? ਕੀ ਉਨ੍ਹਾਂ ਕੋਲ ਵਾਹਨਾਂ ਦੀ ਜਾਂਚ ਕਰਨ ਦਾ ਕੋਈ ਅਧਿਕਾਰਤ ਹੁਕਮ ਸੀ? ਕੀ ਸਬੰਧਤ ਪੁਲਸ ਥਾਣੇ ਨੂੰ ਇਸ ਨਾਕੇ ਦੀ ਜਾਣਕਾਰੀ ਸੀ? ਅਤੇ ਜੇਕਰ ਇਹ ਨਕਲੀ ਪੁਲਸ ਮੁਲਾਜ਼ਮ ਸਨ ਤਾਂ ਕੀ ਇਨ੍ਹਾਂ ਦਾ ਮਕਸਦ ਟਰੱਕ ਚਾਲਕਾਂ ਤੋਂ ਨਾਜਾਇਜ਼ ਵਸੂਲੀ ਕਰਨਾ ਜਾਂ ਲੁੱਟ-ਖੋਹ ਕਰਨਾ ਸੀ? ਇਨ੍ਹਾਂ ਸਾਰੇ ਸਵਾਲਾਂ ਦੇ ਜਵਾਬ ਜਾਂਚ ਤੋਂ ਬਾਅਦ ਹੀ ਸਾਹਮਣੇ ਆਉਣਗੇ। ਹਾਈਵੇਅ ’ਤੇ ਸਫ਼ਰ ਕਰਨ ਵਾਲੇ ਟਰੱਕ ਚਾਲਕਾਂ ਲਈ ਇਹ ਘਟਨਾ ਵੱਡੀ ਚਿਤਾਵਨੀ ਬਣ ਕੇ ਸਾਹਮਣੇ ਆਈ ਹੈ। ਪੁਲਸ ਦੀ ਵਰਦੀ ਪਾ ਕੇ ਨਿੱਜੀ ਵਾਹਨ ਵਿੱਚ ਸਵਾਰ ਹੋ ਕੇ ਟਰੱਕਾਂ ਨੂੰ ਰੁਕਵਾਉਣਾ ਕਿਸੇ ਸੰਗਠਿਤ ਗਿਰੋਹ ਦੀ ਸਾਜ਼ਿਸ਼ ਵੀ ਹੋ ਸਕਦੀ ਹੈ। ਹਾਲਾਂਕਿ ਅਜੇ ਤੱਕ ਇਹ ਸਾਬਤ ਨਹੀਂ ਹੋਇਆ ਕਿ ਮੌਕੇ ’ਤੇ ਮੌਜੂਦ ਲੋਕ ਨਕਲੀ ਪੁਲਸ ਮੁਲਾਜ਼ਮ ਜਾਂ ਲੁਟੇਰੇ ਸਨ, ਪਰ ਹਾਦਸੇ ਤੋਂ ਬਾਅਦ ਉਨ੍ਹਾਂ ਦਾ ਫਰਾਰ ਹੋਣਾ ਸ਼ੱਕ ਜ਼ਰੂਰ ਪੈਦਾ ਕਰਦਾ ਹੈ। ਹੁਣ ਲੋੜ ਇਸ ਗੱਲ ਦੀ ਹੈ ਕਿ ਪੁਲਸ ਮੌਕੇ ਦੇ ਆਸ-ਪਾਸ ਲੱਗੇ ਸੀਸੀਟੀਵੀ ਕੈਮਰਿਆਂ, ਟੋਲ ਪਲਾਜ਼ਿਆਂ ਦੀ ਫੁਟੇਜ ਅਤੇ ਹੋਰ ਤਕਨੀਕੀ ਸਬੂਤਾਂ ਦੇ ਆਧਾਰ ’ਤੇ ਉਸ ਪ੍ਰਾਈਵੇਟ ਕਾਰ ਅਤੇ ਉਸ ਵਿੱਚ ਸਵਾਰ ਤਿੰਨਾਂ ਵਿਅਕਤੀਆਂ ਦੀ ਪਛਾਣ ਕਰੇ। ਘਟਨਾ ਦੀ ਸੂਚਨਾ ਮਿਲਦੇ ਹੀ ਪਥਰਾਲਾ ਪੁਲਸ ਚੌਕੀ ਦੀ ਟੀਮ ਮੌਕੇ ’ਤੇ ਪਹੁੰਚੀ ਅਤੇ ਲਾਸ਼ ਨੂੰ ਕਬਜ਼ੇ ਵਿੱਚ ਲੈ ਕੇ ਪੋਸਟਮਾਰਟਮ ਲਈ ਸਿਵਲ ਹਸਪਤਾਲ ਭੇਜ ਦਿੱਤਾ। ਚੌਕੀ ਇੰਚਾਰਜ ਧਰਮਵੀਰ ਸਿੰਘ ਨੇ ਦੱਸਿਆ ਕਿ ਹਾਦਸੇ ਵਿੱਚ ਇੱਕ ਟਰਾਲਾ ਚਾਲਕ ਦੀ ਮੌਤ ਹੋਈ ਹੈ। ਮ੍ਰਿਤਕ ਦੇ ਪਰਿਵਾਰਕ ਮੈਂਬਰਾਂ ਨੂੰ ਸੂਚਨਾ ਦੇ ਦਿੱਤੀ ਗਈ ਸੀ, ਜਿਸ ਤੋਂ ਬਾਅਦ ਦੋਵੇਂ ਧਿਰਾਂ ਦੇ ਲੋਕ ਮੌਕੇ ’ਤੇ ਪਹੁੰਚ ਗਏ ਹਨ। ਪਰਿਵਾਰਕ ਮੈਂਬਰਾਂ ਦੇ ਬਿਆਨ ਦਰਜ ਕੀਤੇ ਜਾ ਰਹੇ ਹਨ ਅਤੇ ਉਨ੍ਹਾਂ ਦੇ ਆਧਾਰ ’ਤੇ ਅਗਲੀ ਕਾਨੂੰਨੀ ਕਾਰਵਾਈ ਕੀਤੀ ਜਾਵੇਗੀ। ਉਨ੍ਹਾਂ ਦੱਸਿਆ ਕਿ ਪ੍ਰਾਈਵੇਟ ਗੱਡੀ ਵਿੱਚ ਨਾਕਾ ਲਗਾ ਕੇ ਵਾਹਨਾਂ ਨੂੰ ਰੋਕਣ ਵਾਲੇ ਵਰਦੀਧਾਰੀਆਂ ਸਬੰਧੀ ਵੀ ਜਾਂਚ ਕੀਤੀ ਜਾ ਰਹੀ ਹੈ। ਇਸ ਸਬੰਧੀ ਐੱਸਐੱਸਪੀ ਬਠਿੰਡਾ ਸੁਹੇਲ ਕਾਸਿਮ ਮੀਰ ਨੇ ਕਿਹਾ ਕਿ ਨਕਲੀ ਪੁਲਸ ਮੁਲਾਜ਼ਮ ਬਣ ਕੇ ਜਾਂ ਪ੍ਰਾਈਵੇਟ ਗੱਡੀ ਵਿੱਚ ਨਾਕਾ ਲਗਾ ਕੇ ਵਾਹਨਾਂ ਦੀ ਚੈਕਿੰਗ ਕਰਨ ਦਾ ਮਾਮਲਾ ਅਜੇ ਉਨ੍ਹਾਂ ਦੇ ਧਿਆਨ ਵਿੱਚ ਨਹੀਂ ਹੈ। ਉਹ ਸਬੰਧਤ ਡੀਐੱਸਪੀ ਅਤੇ ਥਾਣਾ ਇੰਚਾਰਜ ਤੋਂ ਪੂਰੇ ਘਟਨਾਕ੍ਰਮ ਦੀ ਵਿਸਥਾਰਪੂਰਵਕ ਰਿਪੋਰਟ ਮੰਗਵਾਉਣਗੇ। ਜਾਂਚ ਦੌਰਾਨ ਜੋ ਵੀ ਤੱਥ ਸਾਹਮਣੇ ਆਉਣਗੇ, ਉਨ੍ਹਾਂ ਦੇ ਆਧਾਰ ’ਤੇ ਸਖ਼ਤ ਕਾਰਵਾਈ ਕੀਤੀ ਜਾਵੇਗੀ।

