ਟੈਕਸਲਾ ਟੈਲੀਵਿਜ਼ਨ ਦੇ ਸੰਸਥਾਪਕ ਰਾਜਾ ਸਿੰਘ ਓਬਰਾਏ ਦਾ 90 ਸਾਲ ਦੀ ਉਮਰ ‘ਚ ਦੇਹਾਂਤ
04 ਮਾਰਚ 2026, ਨਵੀਂ ਦਿੱਲੀ – ਭਾਰਤੀ ਇਲੈਕਟ੍ਰਾਨਿਕਸ ਉਦਯੋਗ ਦੇ ਮਹੱਤਵਪੂਰਨ ਨਾਂ ਰਾਜਾ ਸਿੰਘ ਓਬਰਾਏ 90 ਸਾਲ ਦੀ ਉਮਰ ਵਿੱਚ ਅਕਾਲ ਚਲਾਣਾ ਹੋ ਗਿਆ ਹੈ। ਉਨ੍ਹਾਂ ਨੇ 1980 ਵਿੱਚ ਟੈਕਸਲਾ ਟੈਲੀਵਿਜ਼ਨ ਦੀ ਸਥਾਪਨਾ ਕੀਤੀ ਸੀ ਅਤੇ ਭਾਰਤ ਵਿੱਚ ਪਹਿਲੀ ਵਾਰ ਸਸਤੇ ਅਤੇ ਭਰੋਸੇਯੋਗ ਟੀਵੀ ਸੈੱਟ ਲਾਂਚ ਕੀਤੇ ਸਨ ਜਿਸ ਨਾਲ ਟੈਲੀਵਿਜ਼ਨ ਆਮ ਘਰਾਂ ਤੱਕ ਪਹੁੰਚਿਆ।
ਰਾਜਾ ਸਿੰਘ ਓਬਰਾਏ ਨੇ ਆਪਣੇ ਕਰੀਅਰ ਦੀ ਸ਼ੁਰੂਆਤ 1961 ਵਿੱਚ ਜੁਪੀਟਰ ਰੇਡੀਓ ਲਾਂਚ ਕਰਕੇ ਕੀਤੀ ਸੀ ਅਤੇ ਬਾਅਦ ਵਿੱਚ ਟੈਲੀਵਿਜ਼ਨ ਉਦਯੋਗ ਵਿੱਚ ਆ ਕੇ ਟੈਕਸਲਾ ਬ੍ਰਾਂਡ ਨੂੰ ਪ੍ਰਸਿੱਧੀ ਦਿੱਤੀ। ਉਨ੍ਹਾਂ ਦੀਆਂ ਟੀਵੀਆਂ ਨੇ ਉਸ ਸਮੇਂ ਦੇ ਮੱਧ ਵਰਗ ਨੂੰ ਘੱਟ ਕੀਮਤ ਵਿੱਚ ਟੈਕਨਾਲੋਜੀ ਪ੍ਰਦਾਨ ਕੀਤੀ ਅਤੇ ਭਾਰਤੀ ਬ੍ਰਾਂਡਾਂ ਨੂੰ ਵਿਦੇਸ਼ੀ ਬ੍ਰਾਂਡਾਂ ਨਾਲ ਮੁਕਾਬਲੇ ਯੋਗ ਬਣਾਇਆ। ਉਨ੍ਹਾਂ ਨੂੰ ਭਾਰਤੀ ਇਲੈਕਟ੍ਰਾਨਿਕਸ ਉਦਯੋਗ ਦਾ ਪਾਇਨੀਅਰ ਮੰਨਿਆ ਜਾਂਦਾ ਹੈ।
ਉਨ੍ਹਾਂ ਦੇ ਅਵਸਾਨ ਨਾਲ ਉਦਯੋਗ ਅਤੇ ਉਨ੍ਹਾਂ ਨਾਲ ਜੁੜੇ ਲੋਕਾਂ ਵਿੱਚ ਡੂੰਘਾ ਸੋਗ ਹੈ। ਉਨ੍ਹਾਂ ਨੇ ਆਪਣੇ ਪਿੱਛੇ ਇੱਕ ਵੱਡੀ ਵਿਰਾਸਤ ਛੱਡੀ ਹੈ ਜੋ ਭਾਰਤੀ ਟੈਕਨਾਲੋਜੀ ਅਤੇ ਮਨੋਰੰਜਨ ਖੇਤਰ ਵਿੱਚ ਅੱਜ ਵੀ ਜਿਉਂਦੀ ਹੈ। ਸੰਗਤ ਅਤੇ ਉਦਯੋਗ ਵੱਲੋਂ ਉਨ੍ਹਾਂ ਦੀ ਰੂਹ ਨੂੰ ਸ਼ਾਂਤੀ ਦੀ ਅਰਦਾਸ ਕੀਤੀ ਜਾ ਰਹੀ ਹੈ।
