British MP Tanmanjit Singh Dhesi reminds Trump of the contribution of the UK and other NATO allies

ਬਰਤਾਨਵੀ ਸੰਸਦ ਮੈਂਬਰ ਤਨਮਨਜੀਤ ਸਿੰਘ ਢੇਸੀ ਨੇ ਟਰੰਪ ਨੂੰ ਯੂ.ਕੇ. ਤੇ ਹੋਰ ਨਾਟੋ ਸਹਿਯੋਗੀਆਂ ਦੇ ਯੋਗਦਾਨ ਦੀ ਕਰਵਾਈ ਯਾਦ

ਲੰਡਨ: ਬਰਤਾਨੀਆ ਦੇ ਸੰਸਦ ਮੈਂਬਰ ਅਤੇ ਲੇਬਰ ਪਾਰਟੀ ਦੇ ਪ੍ਰਮੁੱਖ ਆਗੂ ਤਨਮਨਜੀਤ ਸਿੰਘ ਢੇਸੀ ਨੇ ਅਮਰੀਕਾ ਦੇ ਰਾਸ਼ਟਰਪਤੀ ਡੋਨਾਲਡ ਟਰੰਪ ਵੱਲੋਂ ਨਾਟੋ (NATO) ਸਹਿਯੋਗੀ ਦੇਸ਼ਾਂ ਦੇ ਯੋਗਦਾਨ ’ਤੇ ਕੀਤੀਆਂ ਟਿੱਪਣੀਆਂ ਦੇ ਜਵਾਬ ਵਿੱਚ ਯੂਨਾਈਟਡ ਕਿੰਗਡਮ ਅਤੇ ਹੋਰ ਨਾਟੋ ਸਹਿਯੋਗੀਆਂ ਦੀ ਭੂਮਿਕਾ ਨੂੰ ਸਪਸ਼ਟ ਤੌਰ ’ਤੇ ਚੇਤੇ ਕਰਵਾਇਆ ਹੈ।

ਐੱਮਪੀ ਢੇਸੀ ਨੇ ਕਿਹਾ ਕਿ ਨਾਟੋ ਸਿਰਫ਼ ਇੱਕ ਸੈਣਿਕ ਗਠਜੋੜ ਨਹੀਂ, ਸਗੋਂ ਸਾਂਝੀ ਸੁਰੱਖਿਆ, ਆਪਸੀ ਭਰੋਸੇ ਅਤੇ ਜ਼ਿੰਮੇਵਾਰੀ ’ਤੇ ਆਧਾਰਿਤ ਇਕ ਅੰਤਰਰਾਸ਼ਟਰੀ ਸਾਂਝ ਹੈ, ਜਿਸ ਵਿੱਚ ਯੂ.ਕੇ. ਅਤੇ ਹੋਰ ਯੂਰਪੀ ਦੇਸ਼ਾਂ ਨੇ ਸਾਲਾਂ ਤੋਂ ਨਿਰੰਤਰ ਅਤੇ ਗੰਭੀਰ ਯੋਗਦਾਨ ਦਿੱਤਾ ਹੈ।

ਨਾਟੋ ਮਿਸ਼ਨਾਂ ’ਚ ਯੂ.ਕੇ. ਦੀ ਅਹੰਮ ਭੂਮਿਕਾ

ਤਨਮਨਜੀਤ ਸਿੰਘ ਢੇਸੀ ਨੇ ਯਾਦ ਦਿਵਾਇਆ ਕਿ ਅਫਗਾਨਿਸਤਾਨ, ਇਰਾਕ, ਕੋਸੋਵੋ ਅਤੇ ਹੋਰ ਅੰਤਰਰਾਸ਼ਟਰੀ ਨਾਟੋ ਮਿਸ਼ਨਾਂ ਦੌਰਾਨ ਬਰਤਾਨਵੀ ਫੌਜੀਆਂ ਨੇ ਵੱਡੀਆਂ ਕੁਰਬਾਨੀਆਂ ਦਿੱਤੀਆਂ ਹਨ। ਉਨ੍ਹਾਂ ਕਿਹਾ ਕਿ ਸੈਂਕੜੇ ਬਰਤਾਨਵੀ ਸੈਨਿਕ ਆਪਣੀਆਂ ਜਾਨਾਂ ਗੁਆ ਬੈਠੇ, ਜਦਕਿ ਹਜ਼ਾਰਾਂ ਜ਼ਖ਼ਮੀ ਹੋਏ—ਇਹ ਸਾਰੀਆਂ ਕੁਰਬਾਨੀਆਂ ਗਲੋਬਲ ਸੁਰੱਖਿਆ ਅਤੇ ਸਥਿਰਤਾ ਲਈ ਦਿੱਤੀਆਂ ਗਈਆਂ।

ਉਨ੍ਹਾਂ ਇਹ ਵੀ ਜ਼ੋਰ ਦਿੱਤਾ ਕਿ ਯੂ.ਕੇ. ਸਿਰਫ਼ ਸੈਣਿਕ ਤੌਰ ’ਤੇ ਹੀ ਨਹੀਂ, ਸਗੋਂ ਵਿੱਤੀ ਅਤੇ ਰਣਨੀਤਕ ਪੱਧਰ ’ਤੇ ਵੀ ਨਾਟੋ ਦਾ ਇੱਕ ਮੁੱਖ ਸਤੰਭ ਹੈ।

ਰੱਖਿਆ ਖਰਚ ਤੇ ਵਚਨਬੱਧਤਾ

ਐੱਮਪੀ ਢੇਸੀ ਨੇ ਦੱਸਿਆ ਕਿ ਯੂਨਾਈਟਡ ਕਿੰਗਡਮ ਉਹਨਾਂ ਗਿਣਤੀ ਦੇ ਨਾਟੋ ਦੇਸ਼ਾਂ ਵਿੱਚ ਸ਼ਾਮਲ ਹੈ ਜੋ ਲਗਾਤਾਰ ਨਾਟੋ ਵੱਲੋਂ ਨਿਰਧਾਰਤ GDP ਦਾ ਘੱਟੋ-ਘੱਟ 2 ਫ਼ੀਸਦੀ ਰੱਖਿਆ ਖਰਚ ਟੀਚਾ ਪੂਰਾ ਕਰਦਾ ਆ ਰਿਹਾ ਹੈ। ਇਸ ਦੇ ਨਾਲ ਹੀ ਕਈ ਹੋਰ ਯੂਰਪੀ ਦੇਸ਼ ਵੀ ਆਪਣੇ ਰੱਖਿਆ ਖਰਚੇ ਵਿੱਚ ਵਾਧਾ ਕਰ ਰਹੇ ਹਨ।

ਉਨ੍ਹਾਂ ਕਿਹਾ,
“ਨਾਟੋ ਦੀ ਤਾਕਤ ਇਸਦੀ ਏਕਤਾ ਵਿੱਚ ਹੈ। ਯੂ.ਕੇ. ਅਤੇ ਹੋਰ ਸਹਿਯੋਗੀ ਦੇਸ਼ਾਂ ਨੇ ਨਾ ਸਿਰਫ਼ ਪੈਸੇ, ਸਗੋਂ ਮਨੁੱਖੀ ਜਾਨਾਂ, ਸਾਲਾਂ ਦੀ ਸੇਵਾ ਅਤੇ ਲੰਬੇ ਸਮੇਂ ਦੀ ਸੁਰੱਖਿਆ ਵਚਨਬੱਧਤਾ ਰਾਹੀਂ ਆਪਣਾ ਯੋਗਦਾਨ ਦਿੱਤਾ ਹੈ।”

ਟਰੰਪ ਦੀਆਂ ਟਿੱਪਣੀਆਂ ਦੇ ਪਿੱਛੋਕੜ ਵਿੱਚ ਬਿਆਨ

ਰਾਜਨੀਤਿਕ ਵਿਸ਼ਲੇਸ਼ਕਾਂ ਅਨੁਸਾਰ, ਐੱਮਪੀ ਢੇਸੀ ਦਾ ਇਹ ਬਿਆਨ ਉਸ ਸਮੇਂ ਸਾਹਮਣੇ ਆਇਆ ਹੈ ਜਦੋਂ ਡੋਨਾਲਡ ਟਰੰਪ ਵੱਲੋਂ ਮੁੜ ਨਾਟੋ ਸਹਿਯੋਗੀ ਦੇਸ਼ਾਂ ’ਤੇ ਘੱਟ ਯੋਗਦਾਨ ਦੇ ਦੋਸ਼ ਲਗਾਏ ਜਾ ਰਹੇ ਹਨ। ਢੇਸੀ ਨੇ ਇਨ੍ਹਾਂ ਦਾਅਵਿਆਂ ਨੂੰ ਤੱਥਾਂ ਦੇ ਆਧਾਰ ’ਤੇ ਚੁਣੌਤੀ ਦਿੰਦਿਆਂ ਕਿਹਾ ਕਿ ਨਾਟੋ ਦੀ ਸਫਲਤਾ ਸਾਂਝੀ ਕੁਰਬਾਨੀ ਅਤੇ ਭਰੋਸੇ ’ਤੇ ਨਿਰਭਰ ਕਰਦੀ ਹੈ, ਨਾ ਕਿ ਇਕੱਲੇ ਕਿਸੇ ਦੇਸ਼ ਦੇ ਦਬਾਅ ’ਤੇ।

ਐੱਮਪੀ ਢੇਸੀ ਨੇ ਅੰਤ ਵਿੱਚ ਕਿਹਾ ਕਿ ਅਮਰੀਕਾ ਅਤੇ ਯੂਰਪ ਦੇ ਰਿਸ਼ਤੇ ਪਰਸਪਰ ਆਦਰ ਅਤੇ ਤੱਥਾਂ ’ਤੇ ਅਧਾਰਿਤ ਹੋਣੇ ਚਾਹੀਦੇ ਹਨ ਅਤੇ ਨਾਟੋ ਦੀ ਏਕਤਾ ਨੂੰ ਕਮਜ਼ੋਰ ਕਰਨ ਵਾਲੀ ਬਿਆਨਬਾਜ਼ੀ ਤੋਂ ਬਚਣਾ ਜ਼ਰੂਰੀ ਹੈ।