Massive violence in Bangladesh ahead of Hasina’s return: Over 50 homes set on fire, 2 leaders killed
ਹਸੀਨਾ ਦੀ ਵਾਪਸੀ ਤੋਂ ਪਹਿਲਾਂ ਬੰਗਲਾਦੇਸ਼ ‘ਚ ਭਾਰੀ ਹਿੰਸਾ: 50 ਤੋਂ ਵੱਧ ਘਰਾਂ ਨੂੰ ਲਾਈ ਅੱਗ, 2 ਨੇਤਾਵਾਂ ਦੀ ਮੌਤ
ਢਾਕਾ (ਆਵਾਜ਼ਿ ਕੌਮ ਬਿਊਰੋ)- ਬੰਗਲਾਦੇਸ਼ ਦੀ ਸਾਬਕਾ ਪ੍ਰਧਾਨ ਮੰਤਰੀ ਸ਼ੇਖ ਹਸੀਨਾ ਦੀ ਦਸੰਬਰ ਮਹੀਨੇ ਭਾਰਤ ਤੋਂ ਵਾਪਸੀ ਦੀਆਂ ਖ਼ਬਰਾਂ ਵਿਚਕਾਰ ਦੇਸ਼ ਅੰਦਰ ਸਿਆਸੀ ਤਣਾਅ ਅਤੇ ਹਿੰਸਾ ਮੁੜ ਭੜਕ ਉੱਠੀ ਹੈ। ਬੰਗਲਾਦੇਸ਼ ਦੇ ਨਾਰਾਇਲ ਜ਼ਿਲ੍ਹੇ ਵਿੱਚ ਕਾਲੀਆ ਨਗਰਪਾਲਿਕਾ ਦੇ ਬੇਂਦਰ ਚਾਰ ਪਿੰਡ ਵਿੱਚ ਭਾਰੀ ਅੱਗਜ਼ਨੀ ਅਤੇ ਭੰਨਤੋੜ ਦੀ ਘਟਨਾ ਸਾਹਮਣੇ ਆਈ ਹੈ। ਇਸ ਘਟਨਾ ਦੌਰਾਨ 50 ਤੋਂ ਵੱਧ ਘਰਾਂ ਅਤੇ ਕਈ ਦੁਕਾਨਾਂ ਨੂੰ ਅੱਗ ਦੇ ਹਵਾਲੇ ਕਰ ਦਿੱਤਾ ਗਿਆ। ਕਾਲੀਆ ਫਾਇਰ ਸਰਵਿਸ ਦੇ ਅਧਿਕਾਰੀ ਹੂਮਾਂਯੂ ਕਬੀਰ ਅਨੁਸਾਰ ਅੱਗ ਲੱਗਣ ਦੀ ਸੂਚਨਾ ਮਿਲਦਿਆਂ ਹੀ ਟੀਮਾਂ ਰਵਾਨਾ ਹੋਈਆਂ, ਪਰ ਪਿੰਡ ਨੂੰ ਜਾਂਦੇ ਮੁੱਖ ਰਸਤਿਆਂ ‘ਤੇ ਦਰੱਖਤ ਸੁੱਟ ਕੇ ਰਸਤੇ ਬੰਦ ਕੀਤੇ ਗਏ ਸਨ। ਇਸ ਕਾਰਨ ਫਾਇਰ ਬ੍ਰਿਗੇਡ ਦੀ ਟੀਮ ਨੂੰ ਮੌਕੇ ‘ਤੇ ਪਹੁੰਚਣ ਲਈ ਚਾਰ ਘੰਟੇ ਤੋਂ ਵੱਧ ਦਾ ਸਮਾਂ ਲੱਗ ਗਿਆ। ਉਦੋਂ ਤੱਕ 20 ਤੋਂ 25 ਪਰਿਵਾਰਾਂ ਦੇ 50 ਤੋਂ ਵੱਧ ਘਰ ਅਤੇ ਬਾਰਦਿਆ ਬਾਜ਼ਾਰ ਦੀਆਂ ਕਈ ਦੁਕਾਨਾਂ ਸੜ ਕੇ ਰਾਖ ਹੋ ਚੁੱਕੀਆਂ ਸਨ। ਦੂਜੇ ਪਾਸੇ, ਪ੍ਰਸ਼ਾਸਨਿਕ ਅਧਿਕਾਰੀ ਮੁਹੰਮਦ ਜਿੰਨਾਤੁਲ ਇਸਲਾਮ ਨੇ ਦੱਸਿਆ ਕਿ ਅਵਾਮੀ ਲੀਗ ਦੇ ਸਾਬਕਾ ਸੰਸਦ ਮੈਂਬਰ ਕਬੀਰੁਲ ਹੱਕ ਮੁਕਤੀ ਦੇ ਪੁਸ਼ਤੈਨੀ ਘਰ ਸਮੇਤ 15-20 ਘਰਾਂ ਵਿੱਚ ਤੋੜ-ਫੋੜ ਅਤੇ ਅੱਗਜ਼ਨੀ ਹੋਈ ਹੈ। ਮਿਲੀ ਜਾਣਕਾਰੀ ਮੁਤਾਬਕ, ਇਹ ਹਿੰਸਾ ਬੰਗਲਾਦੇਸ਼ ਨੈਸ਼ਨਲਿਸਟ ਪਾਰਟੀ (BNP) ਦੇ ਇੱਕ ਰੋਸ ਮਾਰਚ ‘ਤੇ ਹੋਏ ਹਮਲੇ ਤੋਂ ਬਾਅਦ ਸ਼ੁਰੂ ਹੋਈ। ਰੋਸ ਮਾਰਚ ਦੌਰਾਨ ਹੋਈ ਝੜਪ ਵਿੱਚ ਜ਼ਖ਼ਮੀ ਹੋਏ BNP ਦੇ ਦੋ ਨੇਤਾਵਾਂ ਸ਼ਾਹੀਨੂਰ ਮੋਲਾ ਅਤੇ ਸੋਹੇਲ ਮੋਲਾ ਦੀ ਖੁਲਨਾ ਇਲਾਜ ਲਈ ਲਿਜਾਂਦੇ ਸਮੇਂ ਮੌਤ ਹੋ ਗਈ। BNP ਨੇਤਾਵਾਂ ਨੇ ਇਸ ਹਮਲੇ ਲਈ ਅਵਾਮੀ ਲੀਗ ਦੇ ਸਮਰਥਕਾਂ ਨੂੰ ਜ਼ਿੰਮੇਵਾਰ ਠਹਿਰਾਇਆ ਹੈ। ਬੰਗਲਾਦੇਸ਼ ਸਟੂਡੈਂਟਸ ਲੀਗ ਦੇ ਪ੍ਰਧਾਨ ਹੁਸੈਨ ਸੱਦਾਮ ਨੇ ਦੋਸ਼ ਲਾਇਆ ਕਿ ਸਥਾਨਕ BNP ਕਰਮਚਾਰੀਆਂ ਨੇ ਅਵਾਮੀ ਲੀਗ ਦੇ ਸਮਰਥਕਾਂ ਅਤੇ ਹਿੰਦੂ ਘੱਟਗਿਣਤੀ ਭਾਈਚਾਰੇ ਦੇ ਘਰਾਂ ਵਿੱਚ ਲੁੱਟ-ਖੋਹ, ਤੋੜ-ਫੋੜ ਅਤੇ ਅੱਗਜ਼ਨੀ ਕੀਤੀ। ਉਨ੍ਹਾਂ ਨੇ ਇਹ ਵੀ ਦਾਅਵਾ ਕੀਤਾ ਕਿ ਇਹ ਹਮਲਾ BNP ਨੇਤਾ ਤਾਰਿਕ ਰਹਿਮਾਨ ਦੇ ਉਸ ਸੰਸਦੀ ਭਾਸ਼ਣ ਤੋਂ ਬਾਅਦ ਹੋਇਆ ਹੈ, ਜਿਸ ਵਿੱਚ ਉਨ੍ਹਾਂ ਨੇ ਅਵਾਮੀ ਲੀਗ ਨੂੰ ਦੁਬਾਰਾ ਉੱਠਣ ਤੋਂ ਪਹਿਲਾਂ ਕੁਚਲਣ ਦੀ ਗੱਲ ਕਹੀ ਸੀ। ਇਹ ਹਿੰਸਾ ਅਜਿਹੇ ਸਮੇਂ ਹੋ ਰਹੀ ਹੈ ਜਦੋਂ ਸ਼ੇਖ ਹਸੀਨਾ ਨੇ ਦਸੰਬਰ ਵਿੱਚ ਭਾਰਤ ਤੋਂ ਬੰਗਲਾਦੇਸ਼ ਵਾਪਸ ਜਾਣ ਦੀ ਇੱਛਾ ਜਤਾਈ ਹੈ ਅਤੇ ਨਵੇਂ ਯਾਤਰਾ ਦਸਤਾਵੇਜ਼ਾਂ ਦੀ ਮੰਗ ਕੀਤੀ ਹੈ। ਹਾਲਾਂਕਿ, BNP ਦੀ ਅਗਵਾਈ ਵਾਲੀ ਸਰਕਾਰ ਨੇ ਇਹ ਮੰਗ ਖਾਰਜ ਕਰਦਿਆਂ ਕਾਨੂੰਨੀ ਪ੍ਰਕਿਰਿਆ ਦਾ ਪਾਲਣ ਕਰਨ ਦੀ ਗੱਲ कही ਹੈ। ਪੁਲਸ ਨੇ ਸਾਰੇ ਮਾਮਲੇ ਦੀ ਜਾਂਚ ਸ਼ੁਰੂ ਕਰ ਦਿੱਤੀ ਹੈ।

