Stop Threatening Punjabis Who Made Britain Their Home: IWA GB Appeals to UK Gov

ਜਿਨ੍ਹਾਂ ਲੋਕਾਂ ਨੇ ਬ੍ਰਿਟੇਨ ਨੂੰ ਆਪਣਾ ਘਰ ਬਣਾਇਆ — ਉਹਨਾਂ ਨੂੰ ਧਮਕਾਉਣਾ ਬੰਦ ਕਰੋ: IWA GB

ਲੰਡਨ, 21 ਅਕਤੂਬਰ 2025 (Awaze Qaum News Desk):ਇੰਡਿਅਨ ਵਰਕਰਜ਼ ਐਸੋਸੀਏਸ਼ਨ (ਗ੍ਰੇਟ ਬ੍ਰਿਟੇਨ) ਨੇ ਯੂ.ਕੇ. ਵਿੱਚ ਚੱਲ ਰਹੀ ਇਮੀਗ੍ਰੇਸ਼ਨ ਬਹਿਸ ’ਤੇ ਗੰਭੀਰ ਚਿੰਤਾ ਜਤਾਈ ਹੈ ਅਤੇ ਕਿਹਾ ਹੈ ਕਿ ਜੋ ਲੋਕ ਕਈ ਸਾਲਾਂ ਤੋਂ ਬ੍ਰਿਟੇਨ ਦੀ ਆਰਥਿਕਤਾ ਤੇ ਸਮਾਜਿਕ ਜੀਵਨ ਦਾ ਹਿੱਸਾ ਬਣੇ ਹੋਏ ਹਨ — ਉਹਨਾਂ ਨੂੰ ਅਣਸੁਰੱਖਿਅਤ ਮਹਿਸੂਸ ਕਰਵਾਉਣਾ ਅਨੁਚਿਤ ਹੈ।

ਸੰਗਠਨ ਦੇ ਜਨਰਲ ਸਕੱਤਰ ਸੀਤਲ ਸਿੰਘ ਗਿੱਲ ਨੇ ਕਿਹਾ ਕਿ ਕਈ ਮਾਈਗਰੈਂਟ, ਜਿਨ੍ਹਾਂ ਕੋਲ ਇਨਡੈਫਿਨਿਟ ਲੀਵ ਟੂ ਰੀਮੇਨ (ILR) ਹੈ ਅਤੇ ਜਿਨ੍ਹਾਂ ਨੇ ਦਹਾਕਿਆਂ ਤੱਕ ਇਸ ਦੇਸ਼ ਲਈ ਮਿਹਨਤ ਕੀਤੀ ਹੈ, ਉਹਨਾਂ ਨਾਲ ਅਜਿਹਾਂ ਵਿਹਾਰ ਕੀਤਾ ਜਾ ਰਿਹਾ ਹੈ ਜਿਵੇਂ ਉਹ ਬਾਹਰਲੇ ਹੋਣ।

“ਜੋ ਲੋਕ ਬ੍ਰਿਟੇਨ ਨੂੰ ਆਪਣਾ ਘਰ ਮੰਨਦੇ ਹਨ, ਮਿਹਨਤ ਕਰਦੇ ਹਨ, ਟੈਕਸ ਭਰਦੇ ਹਨ ਅਤੇ ਪਰਿਵਾਰ ਪਾਲਦੇ ਹਨ — ਉਹਨਾਂ ਨੂੰ ਡਰ ਵਿੱਚ ਜੀਣ ਲਈ ਮਜਬੂਰ ਨਹੀਂ ਕੀਤਾ ਜਾਣਾ ਚਾਹੀਦਾ,” ਗਿੱਲ ਨੇ ਕਿਹਾ।
“ਉਹ ਸਾਡੇ ਹਸਪਤਾਲਾਂ, ਕੇਅਰ ਹੋਮਾਂ, ਫੈਕਟਰੀਆਂ, ਟੈਕਸੀਆਂ ਅਤੇ ਦੁਕਾਨਾਂ ਵਿੱਚ ਕੰਮ ਕਰਦੇ ਹਨ। ਉਹਨਾਂ ਨੇ ਆਪਣੀ ਮਿਹਨਤ ਤੇ ਦਿਲ ਨਾਲ ਇਸ ਦੇਸ਼ ਦੀ ਨੀਂਹ ਮਜ਼ਬੂਤ ਕੀਤੀ ਹੈ।”

ਗਿੱਲ ਨੇ ਚੇਤਾਵਨੀ ਦਿੱਤੀ ਕਿ ਸਰਕਾਰ ਵੱਲੋਂ ਲਿਆਂਦੇ ਜਾ ਰਹੇ ਨਵੇਂ ਵੀਜ਼ਾ ਨਿਯਮ — ਜਿਵੇਂ ਉੱਚੇ ਅੰਗਰੇਜ਼ੀ ਟੈਸਟ, ਵੱਧ ਤਨਖਾਹ ਦੀਆਂ ਸ਼ਰਤਾਂ ਅਤੇ ਪਰਿਵਾਰਾਂ ਲਈ ਕਠਿਨ ਪਾਬੰਦੀਆਂ — ਸਭ ਤੋਂ ਵੱਧ ਨੁਕਸਾਨ ਵਰਕਿੰਗ-ਕਲਾਸ ਪਰਿਵਾਰਾਂ ਨੂੰ ਪਹੁੰਚਾਉਣਗੇ।

ਉਨ੍ਹਾਂ ਕਿਹਾ ਕਿ ਬਹੁਤ ਸਾਰੇ ਮਾਈਗਰੈਂਟ ਪਹਿਲਾਂ ਹੀ ਘੱਟ ਤਨਖਾਹ ’ਤੇ ਲੰਮੇ ਘੰਟੇ ਕੰਮ ਕਰਦੇ ਹਨ ਅਤੇ ਮਹਿੰਗਾਈ ਨਾਲ ਜੂਝ ਰਹੇ ਹਨ, ਇਸ ਲਈ ਇਹ ਨਵੇਂ ਨਿਯਮ ਉਹਨਾਂ ਦੀ ਜ਼ਿੰਦਗੀ ਹੋਰ ਮੁਸ਼ਕਲ ਬਣਾਉਣਗੇ।

ਗਿੱਲ ਨੇ ਸਾਰੀਆਂ ਰਾਜਨੀਤਿਕ ਪਾਰਟੀਆਂ ਨੂੰ ਅਪੀਲ ਕੀਤੀ ਕਿ ਇਮੀਗ੍ਰੇਸ਼ਨ ਨੂੰ ਲੋਕਾਂ ਦੀ ਜ਼ਿੰਦਗੀ ਨਾਲ ਖੇਡ ਬਣਾਉਣਾ ਬੰਦ ਕੀਤਾ ਜਾਵੇ ਅਤੇ ਮਾਈਗਰੈਂਟਾਂ ਨਾਲ ਇਨਸਾਫ਼ ਤੇ ਆਦਰ ਦਾ ਸਲੂਕ ਕੀਤਾ ਜਾਵੇ।

“ਧਮਕੀਆਂ ਬੰਦ ਕਰੋ। ਫਰਕ ਪਾਉਣਾ ਬੰਦ ਕਰੋ। ਇਮੀਗ੍ਰੇਸ਼ਨ ਨੂੰ ਰਾਜਨੀਤਿਕ ਹਥਿਆਰ ਬਣਾਉਣਾ ਬੰਦ ਕਰੋ,” ਗਿੱਲ ਨੇ ਕਿਹਾ।
“ਬ੍ਰਿਟੇਨ ਉਹ ਦੇਸ਼ ਬਣਿਆ ਰਹੇ ਜੋ ਹਰ ਉਸ ਵਿਅਕਤੀ ਲਈ ਇਨਸਾਫ਼ੀ ਤੇ ਸੁਆਗਤੀ ਹੋਵੇ ਜੋ ਇਸ ਦੇਸ਼ ਲਈ ਯੋਗਦਾਨ ਪਾਉਂਦਾ ਹੈ।”

ਜਾਰੀ ਕਰਤਾ:
ਇੰਡਿਅਨ ਵਰਕਰਜ਼ ਐਸੋਸੀਏਸ਼ਨ (ਗ੍ਰੇਟ ਬ੍ਰਿਟੇਨ)