Fake army uniform racket busted in Rajasthan, 1000 meters of fake combat cloth seized

ਰਾਜਸਥਾਨ ‘ਚ ਫਰਜ਼ੀ ਫੌਜ ਵਰਦੀ ਰੈਕੇਟ ਦਾ ਪਰਦਾਫਾਸ਼, 1000 ਮੀਟਰ ਨਕਲੀ ਲੜਾਕੂ ਕੱਪੜਾ ਜ਼ਬਤ

New Delhi, (ਆਵਾਜ਼ਿ ਕੌਮ ਬਿਊਰੋ)-ਭਾਰਤੀ ਫੌਜ ਦੀ ਖੁਫੀਆ ਏਜੰਸੀ ਅਤੇ ਰਾਜਸਥਾਨ ਪੁਲਸ ਨੇ ਸ਼੍ਰੀਗੰਗਾਨਗਰ ਵਿੱਚ ਫੌਜ ਦੀਆਂ ਨਕਲੀ ਵਰਦੀਆਂ ਬਣਾਉਣ ਵਾਲੇ ਇੱਕ ਰੈਕੇਟ ਦਾ ਪਰਦਾਫਾਸ਼ ਕੀਤਾ ਹੈ। ਸੰਯੁਕਤ ਕਾਰਵਾਈ ਦੌਰਾਨ ਪੁਲਸ ਨੇ ਕਈ ਦੁਕਾਨਾਂ ਤੋਂ ਲਗਭਗ 1,000 ਮੀਟਰ ਅਣਅਧਿਕਾਰਤ ਫੌਜ ਦੇ ਪੈਟਰਨ ਵਾਲੇ ਲੜਾਕੂ ਕੱਪੜੇ ਜ਼ਬਤ ਕੀਤੇ ਹਨ ਹਨ। ਇਸ ਪੁਲਸ ਵਲੋਂ ਇਸ ਮਾਮਲੇ ਦੀ ਜਾਂਚ ਅਜੇ ਵੀ ਕੀਤੀ ਜਾ ਰਹੀ ਹੈ। ਸੂਤਰਾਂ ਮੁਤਾਬਕ ਇਹ ਕਾਰਵਾਈ ਜੂਨ ਵਿੱਚ ਬਰੇਲੀ ਵਿੱਚ ਨਕਲੀ ਲੜਾਕੂ ਵਰਦੀਆਂ ਜ਼ਬਤ ਕਰਨ ਨਾਲ ਸ਼ੁਰੂ ਹੋਈ ਸੀ, ਜਿਸਦਾ ਪਤਾ ਜਾਂਚਕਰਤਾਵਾਂ ਨੇ ਸ਼੍ਰੀ ਗੰਗਾਨਗਰ ਵਿੱਚ ਇੱਕ ਨਿਰਮਾਣ ਯੂਨਿਟ ਤੋਂ ਲਗਾਇਆ ਸੀ। ਭਾਰਤੀ ਫੌਜ ਦੇ ਖੁਫੀਆ ਕਰਮਚਾਰੀਆਂ ਵਲੋਂ ਗੁਪਤ ਜਾਂਚ ਕੀਤੀ ਗਈ। ਇਸ ਜਾਂਚ ਵਿੱਚ ਇੱਕ ਸਥਾਨਕ ਫਰਮ ਦੀ ਭੂਮਿਕਾ ਦਾ ਖੁਲਾਸਾ ਹੋਇਆ, ਜਿਸ ‘ਤੇ ਲਾਲਗੜ੍ਹ ਜੱਟਾਂ, ਸੂਰਤਗੜ੍ਹ ਅਤੇ ਨੇੜਲੇ ਬਾਜ਼ਾਰਾਂ ਤੋਂ ਇਲਾਵਾ ਸ਼੍ਰੀਗੰਗਾਨਗਰ ਸ਼ਹਿਰ ਦੀਆਂ ਦੁਕਾਨਾਂ ਨੂੰ ਨਕਲੀ ਫੌਜੀ ਪੈਟਰਨ ਦੇ ਲੜਾਕੂ ਕੱਪੜੇ ਸਪਲਾਈ ਕਰਨ ਦਾ ਦੋਸ਼ ਹੈ। ਫੌਜ ਨੇ ਜੁਲਾਈ ਵਿੱਚ ਰਾਜਸਥਾਨ ਪੁਲਸ ਨੂੰ ਆਪਣੀ ਅੰਤਰਿਮ ਜਾਂਚ ਰਿਪੋਰਟ ਸੌਂਪੀ, ਜਿਸ ਦੇ ਆਧਾਰ ‘ਤੇ 30 ਜੁਲਾਈ ਨੂੰ ਫੌਜ ਦੀਆਂ ਸੁਰੱਖਿਆ ਟੀਮਾਂ ਅਤੇ ਰਾਜਸਥਾਨ ਪੁਲਸ ਨੇ ਇੱਕ ਸਾਂਝਾ ਆਪ੍ਰੇਸ਼ਨ ਚਲਾਇਆ ਅਤੇ ਜ਼ਿਲ੍ਹੇ ਵਿੱਚ ਕਈ ਦੁਕਾਨਾਂ ਦੀ ਤਲਾਸ਼ੀ ਲਈ। ਤਲਾਸ਼ੀ ਦੌਰਾਨ ਲਗਭਗ 1,000 ਮੀਟਰ ਨਵੇਂ ਪੈਟਰਨ ਦਾ ਅਣਅਧਿਕਾਰਤ ਨਕਲੀ ਫੌਜੀ ਲੜਾਕੂ ਕੱਪੜਾ ਬਰਾਮਦ ਕੀਤਾ ਗਿਆ। ਫੌਜ ਦੇ ਅਨੁਸਾਰ, ਬਿਨਾਂ ਇਜਾਜ਼ਤ ਦੇ ਫੌਜੀ ਪੈਟਰਨ ਦੇ ਲੜਾਕੂ ਕੱਪੜੇ ਰੱਖਣਾ, ਵੇਚਣਾ ਜਾਂ ਵਰਤਣਾ ਇੱਕ ਸਜ਼ਾਯੋਗ ਅਪਰਾਧ ਹੈ। ਏਜੰਸੀਆਂ ਇਹ ਪਤਾ ਲਗਾਉਣ ਦੀ ਕੋਸ਼ਿਸ਼ ਕਰ ਰਹੀਆਂ ਹਨ ਕਿ ਇਸ ਨੈੱਟਵਰਕ ਵਿੱਚ ਹੋਰ ਕੌਣ-ਕੌਣ ਸ਼ਾਮਲ ਹੈ ਅਤੇ ਨਕਲੀ ਫੌਜੀ ਵਰਦੀਆਂ ਦਾ ਇਹ ਕਾਰੋਬਾਰ ਕਿਸ ਪੱਧਰ ‘ਤੇ ਚਲਾਇਆ ਜਾ ਰਿਹਾ ਸੀ।