Vrindavan Ashram Incident: Case regarding the death of Premanand’s disciple reaches NHRC; Agra ADG ordered to investigate

ਵ੍ਰਿੰਦਾਵਨ ਆਸ਼ਰਮ ਕਾਂਡ: ਪ੍ਰੇਮਾਨੰਦ ਦੇ ਚੇਲੇ ਦੀ ਮੌਤ ਦਾ ਮਾਮਲਾ NHRC ਕੋਲ ਪੁੱਜਾ, ਆਗਰਾ ਦੇ ADG ਨੂੰ ਜਾਂਚ ਦੇ ਹੁਕਮ

ਮਥੁਰਾ/ਵ੍ਰਿੰਦਾਵਨ (ਆਵਾਜ਼ਿ ਕੌਮ ਬਿਊਰੋ)- ਵ੍ਰਿੰਦਾਵਨ ਦੇ ਮਸ਼ਹੂਰ ਸੰਤ ਪ੍ਰੇਮਾਨੰਦ ਮਹਾਰਾਜ ਦੇ ਚੇਲੇ ਰਸਿਕ ਦੁਲਾਰੀ ਉਰਫ਼ ਦੀਪਕ ਪਟੇਲ ਲੋਧੀ ਦੀ ਭੇਦਭਰੇ ਹਾਲਾਤਾਂ ਵਿੱਚ ਹੋਈ ਮੌਤ ਦਾ ਮਾਮਲਾ ਹੁਣ ਰਾਸ਼ਟਰੀ ਮਨੁੱਖੀ ਅਧਿਕਾਰ ਕਮਿਸ਼ਨ (NHRC) ਕੋਲ ਪਹੁੰਚ ਗਿਆ ਹੈ। ਮਾਮਲੇ ਦੀ ਗੰਭੀਰਤਾ ਨੂੰ ਦੇਖਦਿਆਂ ਮਨੁੱਖੀ ਅਧਿਕਾਰ ਕਮਿਸ਼ਨ ਨੇ ਆਗਰਾ ਜ਼ੋਨ ਦੇ ਅਪਰ ਪੁਲਸ ਮਹਾਨਿਰਦੇਸ਼ਕ (ADG) ਨੂੰ ਨਿਰਪੱਖ ਜਾਂਚ ਅਤੇ ਜ਼ਰੂਰੀ ਕਾਰਵਾਈ ਕਰਨ ਦੇ ਨਿਰਦੇਸ਼ ਦਿੱਤੇ ਹਨ। ਇਹ ਕਾਰਵਾਈ ਦਿੱਲੀ ਦੀ ਸਮਾਜਿਕ ਕਰਮਚਾਰੀ ਕ੍ਰਿਸ਼ਨਾ ਰਾਜਪੂਤ ਦੀ ਸ਼ਿਕਾਇਤ ਤੋਂ ਬਾਅਦ ਕੀਤੀ ਗਈ ਹੈ। ਸ਼ਿਕਾਇਤਕਰਤਾ ਨੇ ਮ੍ਰਿਤਕ ਦੇ ਜੀਵਨ ਅਤੇ ਗਰਿਮਾ ਨਾਲ ਜਿਊਣ ਦੇ ਅਧਿਕਾਰ ਦਾ ਹਵਾਲਾ ਦਿੰਦਿਆਂ ਘਟਨਾ ਨਾਲ ਜੁੜੇ ਸਾਰੇ ਸੀਸੀਟੀਵੀ (CCTV) ਫੁਟੇਜ, ਫੋਰੈਂਸਿਕ ਸਬੂਤਾਂ ਅਤੇ ਮ੍ਰਿਤਕ ਦੇ ਕਮਰੇ ਦੀਆਂ ਪਰਿਸਥਿਤੀਆਂ ਦੀ ਸੁਤੰਤਰ ਅਤੇ ਪਾਰਦਰਸ਼ੀ ਜਾਂਚ ਦੀ ਮੰਗ ਕੀਤੀ ਹੈ। ਰਸਿਕ ਦੁਲਾਰੀ ਨੇ 25 ਸਤੰਬਰ ਨੂੰ ਵ੍ਰਿੰਦਾਵਨ ਦੇ ਗੁਰੂ ਕ੍ਰਿਪਾ ਕੁੰਜ ਆਸ਼ਰਮ ਦੀ ਚੌਥੀ ਮੰਜ਼ਿਲ ਤੋਂ ਛਾਲ ਮਾਰ ਕੇ ਆਪਣੀ ਜਾਨ ਦੇ ਦਿੱਤੀ ਸੀ। ਹਾਲਾਂਕਿ, ਪੋਸਟਮਾਰਟਮ ਰਿਪੋਰਟ ਵਿੱਚ ਉਨ੍ਹਾਂ ਦੇ ਗੁਪਤ ਅੰਗ ‘ਤੇ ਗੰਭੀਰ ਸੱਟ ਦੇ ਨਿਸ਼ਾਨ ਸਮੇਤ ਸਰੀਰ ‘ਤੇ 7 ਥਾਵਾਂ ‘ਤੇ ਸੱਟਾਂ ਪਾਈਆਂ ਗਈਆਂ ਹਨ, ਜਿਸ ਨੇ ਮਾਮਲੇ ਨੂੰ ਬੇਹੱਦ ਸ਼ੱਕੀ ਬਣਾ ਦਿੱਤਾ ਹੈ। ਹਾਲ ਹੀ ਵਿੱਚ ਸਾਹਮਣੇ ਆਈ ਸੀਸੀਟੀਵੀ ਫੁਟੇਜ ਵਿੱਚ ਰਸਿਕ ਦੁਲਾਰੀ ਖੂਨ ਨਾਲ ਲੱਥਪੱਥ ਅਤੇ ਬਦਹਵਾਸ ਹਾਲਤ ਵਿੱਚ ਕਮਰੇ ਤੋਂ ਬਾਹਰ ਆ ਕੇ ਪੌੜੀਆਂ ਰਾਹੀਂ ਛੱਤ ਵੱਲ ਜਾਂਦੇ ਦਿਖਾਈ ਦਿੱਤੇ ਸਨ। ਰਸਿਕ ਦੁਲਾਰੀ ਦੇ ਪਰਿਵਾਰ ਨੇ ਦੋਸ਼ ਲਗਾਇਆ ਹੈ ਕਿ ਆਸ਼ਰਮ ਵਿੱਚ ਦੀਕਸ਼ਾ ਲੈਣ ਤੋਂ ਬਾਅਦ ਪਿਛਲੇ ਦੋ ਸਾਲਾਂ ਤੋਂ ਉਨ੍ਹਾਂ ਨੂੰ ਆਪਣੇ ਬੇਟੇ ਨਾਲ ਮਿਲਣ ਜਾਂ ਫੋਨ ‘ਤੇ ਗੱਲ ਨਹੀਂ ਕਰਨ ਦਿੱਤੀ ਗਈ। ਪਰਿਵਾਰਕ ਮੈਂਬਰਾਂ ਅਨੁਸਾਰ ਆਸ਼ਰਮ ਦੇ ਲੋਕਾਂ ਨੇ ਜਲਦਬਾਜ਼ੀ ਵਿੱਚ ਹੀ ਉਸ ਦਾ ਅੰਤਿਮ ਸੰਸਕਾਰ ਵੀ ਕਰ ਦਿੱਤਾ। ਉਨ੍ਹਾਂ ਨੇ ਉੱਤਰ ਪ੍ਰਦੇਸ਼ ਦੇ ਮੁੱਖ ਮੰਤਰੀ ਯੋਗੀ ਆਦਿੱਤਿਆਨਾਥ ਤੋਂ ਇਸ ਪੂਰੇ ਮਾਮਲੇ ਦੀ ਸੀ.ਬੀ.ਆਈ. (CBI) ਜਾਂਚ ਕਰਵਾਉਣ ਦੀ ਗੁਹਾਰ ਲਗਾਈ ਹੈ। ਪੁਲਸ ਇਸ ਗੱਲ ਦੀ ਵੀ ਜਾਂਚ ਕਰ ਰਹੀ ਹੈ ਕਿ ਆਸ਼ਰਮ ਵਿੱਚ ਚੇਲਿਆਂ ਦੇ ਮੋਬਾਈਲ ਦੀ ਵਰਤੋਂ ਅਤੇ ਬਾਹਰੀ ਦੁਨੀਆ ਨਾਲ ਸੰਪਰਕ ‘ਤੇ ਕਿਸ ਤਰ੍ਹਾਂ ਦੀਆਂ ਪਾਬੰਦੀਆਂ ਸਨ। ਕਮਰੇ ਤੋਂ ਮਿਲੇ ਖੂਨ ਨਾਲ ਲੱਥਪੱਥ ਗ੍ਰਾਈਂਡਰ ਅਤੇ ਨਸ਼ੀਲੇ ਪਦਾਰਥਾਂ ਦੇ ਕਿਸੇ ਵੀ ਐਂਗਲ ਦਾ ਪਤਾ ਲਗਾਉਣ ਲਈ ਖੂਨ ਦੇ ਨਮੂਨਿਆਂ ਦੀ ਫੋਰੈਂਸਿਕ ਅਤੇ ਟਾਕਸੀਕੋਲੋਜੀ (toxicology) ਜਾਂਚ ਕਰਵਾਈ ਜਾ ਰਹੀ ਹੈ। ਦੂਜੇ ਪਾਸੇ, ਪ੍ਰੇਮਾਨੰਦ ਮਹਾਰਾਜ ਦੇ ‘ਸ਼੍ਰੀ ਰਾਧਾ ਕੇਲੀਕੁੰਜ ਟਰੱਸਟ’ ਨੇ ਬਿਆਨ ਜਾਰੀ ਕਰਕੇ ਪੁਲਸ ਜਾਂਚ ਵਿੱਚ ਪੂਰਾ ਸਹਿਯੋਗ ਦੇਣ ਦਾ ਭਰੋਸਾ ਦਿੱਤਾ ਹੈ।