ਪਾਕਿਸਤਾਨ ਦੀ ਭੜਕਾਊ ਕੋਸ਼ਿਸ਼ ਨਾਕਾਮ, ਭਾਰਤ ਦਾ ਮਿਆਰੀ ਜਵਾਬ: ਆਪਰੇਸ਼ਨ ਸਿੰਦੂਰ
ਨਵੀਂ ਦਿੱਲੀ (8 ਮਈ, 2025): ਪਾਕਿਸਤਾਨ ਦੀਆਂ ਭੜਕਾਊ ਕਾਰਵਾਈਆਂ ਨੂੰ ਭਾਰਤ ਨੇ ਨਾਕਾਮ ਕਰ ਦਿੱਤਾ। ਆਪਰੇਸ਼ਨ ਸਿੰਦੂਰ ’ਤੇ 7 ਮਈ ਦੀ ਪ੍ਰੈੱਸ ਬ੍ਰੀਫਿੰਗ ’ਚ ਭਾਰਤ ਨੇ ਆਪਣੇ ਜਵਾਬ ਨੂੰ ਕੇਂਦਰਿਤ, ਸੰਜਮੀ, ਅਤੇ ਗੈਰ-ਭੜਕਾਊ ਦੱਸਿਆ ਸੀ। ਇਹ ਸਪੱਸ਼ਟ ਕੀਤਾ ਗਿਆ ਸੀ ਕਿ ਪਾਕਿਸਤਾਨੀ ਫੌਜੀ ਅਡਿਆਂ ਨੂੰ ਨਿਸ਼ਾਨਾ ਨਹੀਂ ਬਣਾਇਆ ਗਿਆ।
7-8 ਮਈ ਦੀ ਰਾਤ ਪਾਕਿਸਤਾਨ ਨੇ ਉੱਤਰੀ ਅਤੇ ਪੱਛਮੀ ਭਾਰਤ ’ਚ ਅਵੰਤੀਪੁਰਾ, ਸ੍ਰੀਨਗਰ, ਜੰਮੂ, ਪਠਾਨਕੋਟ, ਅੰਮ੍ਰਿਤਸਰ, ਕਪੂਰਥਲਾ, ਜਲੰਧਰ, ਲੁਧਿਆਣਾ, ਆਦਮਪੁਰ, ਬਠਿੰਡਾ, ਚੰਡੀਗੜ੍ਹ, ਨਾਲ, ਫਲੋਦੀ, ਉੱਤਰਲਾਈ, ਅਤੇ ਭੁਜ ਵਿਖੇ ਡਰੋਨ ਅਤੇ ਮਿਜ਼ਾਇਲਾਂ ਨਾਲ ਹਮਲੇ ਦੀ ਕੋਸ਼ਿਸ਼ ਕੀਤੀ, ਜਿਨ੍ਹਾਂ ਨੂੰ ਭਾਰਤੀ ਏਕੀਕ੍ਰਿਤ ਕਾਊਂਟਰ UAS ਗਰਿੱਡ ਅਤੇ ਏਅਰ ਡਿਫੈਂਸ ਸਿਸਟਮ ਨੇ ਨਾਕਾਮ ਕਰ ਦਿੱਤਾ। ਹਮਲਿਆਂ ਦਾ ਮਲਬਾ ਕਈ ਥਾਵਾਂ ’ਤੋਂ ਮਿਲਿਆ, ਜੋ ਪਾਕਿਸਤਾਨ ਦੀਆਂ ਕੋਸ਼ਿਸ਼ਾਂ ਦੀ ਪੁਸ਼ਟੀ ਕਰਦਾ ਹੈ।
ਅੱਜ ਸਵੇਰੇ ਭਾਰਤੀ ਫੌਜ ਨੇ ਪਾਕਿਸਤਾਨ ’ਚ ਕਈ ਥਾਵਾਂ ’ਤੇ ਏਅਰ ਡਿਫੈਂਸ ਰਾਡਾਰ ਅਤੇ ਸਿਸਟਮ ਨਿਸ਼ਾਨੇ ਬਣਾਏ। ਲਾਹੌਰ ’ਚ ਇੱਕ ਏਅਰ ਡਿਫੈਂਸ ਸਿਸਟਮ ਨੂੰ ਨਾਕਾਰਾ ਕਰ ਦਿੱਤਾ ਗਿਆ। ਪਾਕਿਸਤਾਨ ਨੇ ਲਾਈਨ ਆਫ ਕੰਟਰੋਲ ’ਤੇ ਕੁਪਵਾੜਾ, ਬਾਰਾਮੂਲਾ, ਉੜੀ, ਪੁੰਛ, ਮੇਂਧਰ, ਅਤੇ ਰਾਜੌਰੀ ਸੈਕਟਰਾਂ ’ਚ ਮੋਰਟਾਰ ਅਤੇ ਭਾਰੀ ਤੋਪਖਾਨੇ ਨਾਲ ਗੋਲੀਬਾਰੀ ਵਧਾ ਦਿੱਤੀ, ਜਿਸ ’ਚ 16 ਨਿਰਦੋਸ਼ ਜਾਨਾਂ ਗਈਆਂ, ਜਿਨ੍ਹਾਂ ’ਚ 3 ਔਰਤਾਂ ਅਤੇ 5 ਬੱਚੇ ਸ਼ਾਮਲ ਹਨ।
ਭਾਰਤ ਨੇ ਜਵਾਬੀ ਕਾਰਵਾਈ ਨਾਲ ਪਾਕਿਸਤਾਨ ਦੀ ਗੋਲੀਬਾਰੀ ਰੋਕੀ। ਭਾਰਤੀ ਫੌਜ ਨੇ ਨਾਨ-ਐਸਕੇਲੇਸ਼ਨ ਲਈ ਵਚਨਬੱਧਤਾ ਦੁਹਰਾਈ, ਬਸ਼ਰਤੇ ਪਾਕਿਸਤਾਨ ਇਸ ਦਾ ਸਤਿਕਾਰ ਕਰੇ।
