ਭਾਰਤ ਤੋਂ ਪਰਤ ਰਹੇ ਈਰਾਨੀ ਜੰਗੀ ਜਹਾਜ਼ ‘ਤੇ ਅਮਰੀਕਾ ਵੱਲੋਂ ਹਮਲਾ, ਸ੍ਰੀਲੰਕਾ ਨੇੜੇ ਡੁੱਬਿਆ
04 ਮਾਰਚ 2026, ਸ੍ਰੀਲੰਕਾ – ਅਮਰੀਕੀ ਨੇਵੀ ਨੇ ਭਾਰਤ ਤੋਂ ਵਾਪਸ ਜਾ ਰਹੇ ਈਰਾਨੀ ਜੰਗੀ ਜਹਾਜ਼ ‘ਤੇ ਵੱਡਾ ਹਮਲਾ ਕੀਤਾ ਜਿਸ ਕਾਰਨ ਜਹਾਜ਼ ਸ੍ਰੀਲੰਕਾ ਦੇ ਤੱਟ ਨੇੜੇ ਸਮੁੰਦਰ ਵਿੱਚ ਡੁੱਬ ਗਿਆ ਹੈ। ਅਧਿਕਾਰਤ ਜਾਣਕਾਰੀ ਅਨੁਸਾਰ ਇਸ ਹਮਲੇ ਵਿੱਚ ਜਹਾਜ਼ ‘ਤੇ ਸਵਾਰ 80 ਈਰਾਨੀ ਸੈਨਿਕ ਮਾਰੇ ਗਏ ਹਨ ਜਦਕਿ ਸ੍ਰੀਲੰਕਾ ਜਲ ਸੈਨਾ ਨੇ ਘਟਨਾ ਸਥਾਨ ‘ਤੇ ਪਹੁੰਚ ਕੇ 32 ਜ਼ਖਮੀ ਸੈਨਿਕਾਂ ਨੂੰ ਬਚਾਇਆ ਅਤੇ ਤੁਰੰਤ ਹਸਪਤਾਲ ਵਿੱਚ ਭਰਤੀ ਕਰਵਾਇਆ ਹੈ।
ਅਮਰੀਕੀ ਰੱਖਿਆ ਵਿਭਾਗ ਨੇ ਇਸ ਹਮਲੇ ਨੂੰ ਆਪਣੇ ਪਿਛਲੇ ਹਮਲਿਆਂ ਦਾ ਜਵਾਬ ਅਤੇ ਈਰਾਨ ਵੱਲੋਂ ਖ਼ਤਰੇ ਨੂੰ ਰੋਕਣ ਵਾਲੀ ਕਾਰਵਾਈ ਦੱਸਿਆ ਹੈ। ਈਰਾਨ ਨੇ ਇਸ ਨੂੰ “ਜੰਗੀ ਅਪਰਾਧ” ਕਰਾਰ ਦਿੱਤਾ ਹੈ ਅਤੇ ਭਾਰੀ ਜਵਾਬੀ ਕਾਰਵਾਈ ਦਾ ਐਲਾਨ ਕੀਤਾ ਹੈ। ਇਹ ਘਟਨਾ ਭਾਰਤੀ ਮਹਾਸਾਗਰ ਵਿੱਚ ਵਧ ਰਹੇ ਤਣਾਅ ਨੂੰ ਹੋਰ ਵਧਾ ਰਹੀ ਹੈ ਅਤੇ ਅੰਤਰਰਾਸ਼ਟਰੀ ਸਮੁੰਦਰੀ ਰੂਟਾਂ ‘ਤੇ ਵਪਾਰ ਅਤੇ ਨੇਵੀਗੇਸ਼ਨ ਲਈ ਖ਼ਤਰਾ ਵਧ ਗਿਆ ਹੈ।
ਸ੍ਰੀਲੰਕਾ ਸਰਕਾਰ ਨੇ ਬਚਾਅ ਕਾਰਜਾਂ ਵਿੱਚ ਸਹਿਯੋਗ ਕੀਤਾ ਅਤੇ ਜ਼ਖਮੀ ਸੈਨਿਕਾਂ ਨੂੰ ਭਰਤੀ ਕਰਨ ਲਈ ਆਪਣੇ ਹਸਪਤਾਲਾਂ ਨੂੰ ਅਲਰਟ ਕੀਤਾ ਹੈ। ਅਮਰੀਕੀ ਅਤੇ ਈਰਾਨੀ ਧਿਰਾਂ ਵੱਲੋਂ ਅਜੇ ਤੱਕ ਵੱਡੇ ਪੱਧਰ ਦੇ ਬਿਆਨ ਆਉਣੇ ਬਾਕੀ ਹਨ ਪਰ ਇਹ ਘਟਨਾ ਮੱਧ ਪੂਰਬ ਅਤੇ ਭਾਰਤੀ ਮਹਾਸਾਗਰ ਵਿੱਚ ਸੰਘਰਸ਼ ਨੂੰ ਹੋਰ ਤੇਜ਼ ਕਰ ਸਕਦੀ ਹੈ।
