Alleged fraud of $800,000 in Canada: Toronto police searching for 29-year-old Indian tantrik Gangadhar Babu

ਕੈਨੇਡਾ ਵਿੱਚ 8 ਲੱਖ ਡਾਲਰ ਦੀ ਕਥਿਤ ਠੱਗੀ: 29 ਸਾਲਾ ਭਾਰਤੀ ਤਾਂਤਰਿਕ ਗੰਗਾਧਰ ਬਾਬੂ ਦੀ ਟੋਰਾਂਟੋ ਪੁਲਿਸ ਨੂੰ ਭਾਲ

ਟੋਰਾਂਟੋ/ਕੈਨੇਡਾ ਪਟਿਆਲਾ (ਆਵਾਜ਼ਿ ਕੌਮ ਬਿਊਰੋ)- ਕੈਨੇਡਾ ਦੇ ਟੋਰਾਂਟੋ ਸ਼ਹਿਰ ਵਿੱਚ ਕਥਿਤ ਰੂਪ ਵਿੱਚ ਲੋਕਾਂ ਨਾਲ ਕਰੀਬ 8 ਲੱਖ ਕੈਨੇਡੀਅਨ ਡਾਲਰ ਦੀ ਠੱਗੀ ਕਰਨ ਦੇ ਦੋਸ਼ਾਂ ਹੇਠ 29 ਸਾਲਾ ਭਾਰਤੀ ਮੂਲ ਦੇ ਤਾਂਤਰਿਕ ਗੰਗਾਧਰ ਬਾਬੂ ਦੀ ਟੋਰਾਂਟੋ ਪੁਲਿਸ ਵੱਲੋਂ ਭਾਲ ਕੀਤੀ ਜਾ ਰਹੀ ਹੈ। ਪੁਲਿਸ ਦਾ ਦਾਅਵਾ ਹੈ ਕਿ ਮੁਲਜ਼ਮ ਨੇ ਲੋਕਾਂ ਦੀਆਂ ਧਾਰਮਿਕ ਅਤੇ ਨਿੱਜੀ ਸਮੱਸਿਆਵਾਂ ਦਾ ਫਾਇਦਾ ਚੁੱਕਦੇ ਹੋਏ ਵੱਡੀ ਰਕਮ ਹਾਸਲ ਕੀਤੀ। ਪੁਲਿਸ ਮੁਤਾਬਕ ਇਹ ਕਥਿਤ ਠੱਗੀਆਂ ਅਪ੍ਰੈਲ 2024 ਤੋਂ ਸਤੰਬਰ 2025 ਦੇ ਦਰਮਿਆਨ ਹੋਈਆਂ। ਜਾਂਚ ਏਜੰਸੀਆਂ ਦਾ ਮੰਨਣਾ ਹੈ ਕਿ ਦੋਸ਼ੀ ਹੁਣ ਭਾਰਤ ਫਰਾਰ ਹੋ ਚੁੱਕਾ ਹੋ ਸਕਦਾ ਹੈ, ਜਿਸ ਕਾਰਨ ਉਸ ਦੀ ਗ੍ਰਿਫ਼ਤਾਰੀ ਲਈ ਯਤਨ ਜਾਰੀ ਹਨ।
ਲੋਕਾਂ ਨੂੰ ਡਰ ਦੇ ਕੇ ਕਰਦਾ ਸੀ ਪੈਸਿਆਂ ਦੀ ਮੰਗ-ਜਾਂਚ ਅਨੁਸਾਰ ਗੰਗਾਧਰ ਬਾਬੂ ਆਪਣੇ ਆਪ ਨੂੰ ਤਾਂਤਰਿਕ, ਜੋਤਸ਼ੀ, ਭਵਿੱਖ ਦੱਸਣ ਵਾਲਾ ਅਤੇ ਰੂਹਾਨੀ ਇਲਾਜ ਕਰਨ ਵਾਲਾ ਵਿਅਕਤੀ ਦੱਸ ਕੇ ਲੋਕਾਂ ਨਾਲ ਸੰਪਰਕ ਕਰਦਾ ਸੀ। ਜ਼ਿਆਦਾਤਰ ਲੋਕ ਆਪਣੀਆਂ ਨਿੱਜੀ, ਪਰਿਵਾਰਕ ਜਾਂ ਆਰਥਿਕ ਸਮੱਸਿਆਵਾਂ ਦਾ ਹੱਲ ਲੱਭਣ ਲਈ ਉਸ ਕੋਲ ਖੁਦ ਜਾਂਦੇ ਸਨ। ਪੁਲਿਸ ਦਾ ਦੋਸ਼ ਹੈ ਕਿ ਪਹਿਲਾਂ ਉਹ ਸਮੱਸਿਆ ਦਾ ਹੱਲ ਕਰਨ ਦੇ ਨਾਂ ’ਤੇ ਪੈਸੇ ਲੈ ਲੈਂਦਾ ਸੀ। ਇਸ ਤੋਂ ਬਾਅਦ ਉਹ ਪੀੜਤਾਂ ਨੂੰ ਡਰਾਉਂਦਾ ਕਿ ਜੇ ਹੋਰ ਪੈਸੇ ਨਾ ਦਿੱਤੇ ਗਏ ਤਾਂ ਉਨ੍ਹਾਂ ਦੇ ਪਰਿਵਾਰਕ ਮੈਂਬਰਾਂ ਦੀ ਮੌਤ ਹੋ ਸਕਦੀ ਹੈ ਜਾਂ ਕੋਈ ਵੱਡੀ ਅਣਹੋਣੀ ਵਾਪਰ ਸਕਦੀ ਹੈ। ਇਸ ਤਰ੍ਹਾਂ ਡਰ ਅਤੇ ਅੰਧਵਿਸ਼ਵਾਸ ਦਾ ਸਹਾਰਾ ਲੈ ਕੇ ਉਸ ਨੇ ਕਈ ਲੋਕਾਂ ਤੋਂ ਸੈਂਕੜਿਆਂ ਤੋਂ ਲੈ ਕੇ ਹਜ਼ਾਰਾਂ ਡਾਲਰ ਤੱਕ ਕਥਿਤ ਤੌਰ ’ਤੇ ਠੱਗੇ।
ਦੋਸ਼ੀ ਦਾ ਹੂਲੀਆ-ਟੋਰਾਂਟੋ ਪੁਲਿਸ ਵੱਲੋਂ ਜਾਰੀ ਕੀਤੀ ਜਾਣਕਾਰੀ ਅਨੁਸਾਰ ਗੰਗਾਧਰ ਬਾਬੂ ਦਾ ਹੂਲੀਆ ਹੇਠ ਲਿਖੇ ਅਨੁਸਾਰ ਹੈ:

• ਉਮਰ: 29 ਸਾਲ
• ਕੱਦ: 5 ਫੁੱਟ 6 ਇੰਚ
• ਸਰੀਰ: ਪਤਲਾ
• ਵਾਲ: ਕਾਲੇ ਅਤੇ ਘੁੰਗਰਾਲੇ
• ਅੱਖਾਂ: ਗੂੜ੍ਹੇ ਭੂਰੇ ਰੰਗ ਦੀਆਂ
• ਦਾੜ੍ਹੀ: ਛੋਟੀ ਕੱਟੀ ਹੋਈ
• ਖ਼ਾਸ ਪਛਾਣ: ਸਾਹਮਣੇ ਦੇ ਦੋ ਦੰਦਾਂ ਵਿਚਕਾਰ ਸਪੱਸ਼ਟ ਫ਼ਾਸਲਾ
  ਪੁਲਿਸ ਦੀ ਲੋਕਾਂ ਨੂੰ ਅਪੀਲ-ਟੋਰਾਂਟੋ ਪੁਲਿਸ ਨੇ ਆਮ ਲੋਕਾਂ ਨੂੰ ਅਪੀਲ ਕੀਤੀ ਹੈ ਕਿ ਜੇ ਕਿਸੇ ਕੋਲ ਗੰਗਾਧਰ ਬਾਬੂ ਬਾਰੇ ਕੋਈ ਵੀ ਜਾਣਕਾਰੀ ਹੋਵੇ ਤਾਂ ਉਹ 416-808-3200 ’ਤੇ ਪੁਲਿਸ ਨਾਲ ਤੁਰੰਤ ਸੰਪਰਕ ਕਰਨ। ਪੁਲਿਸ ਨੂੰ ਸ਼ੱਕ ਹੈ ਕਿ ਇਸ ਮਾਮਲੇ ਵਿੱਚ ਹੋਰ ਵੀ ਪੀੜਤ ਸਾਹਮਣੇ ਆ ਸਕਦੇ ਹਨ ਅਤੇ ਜਾਂਚ ਅਜੇ ਵੀ ਜਾਰੀ ਹੈ।
  ਇਹ ਮਾਮਲਾ ਇੱਕ ਵਾਰ ਫਿਰ ਲੋਕਾਂ ਨੂੰ ਅੰਧਵਿਸ਼ਵਾਸ, ਝੂਠੇ ਤਾਂਤਰਿਕਾਂ ਅਤੇ ਚਮਤਕਾਰਾਂ ਦੇ ਨਾਂ ’ਤੇ ਪੈਸੇ ਠੱਗਣ ਵਾਲੇ ਗਿਰੋਹਾਂ ਤੋਂ ਸਾਵਧਾਨ ਰਹਿਣ ਦੀ ਚੇਤਾਵਨੀ ਦਿੰਦਾ ਹੈ। ਮਾਹਿਰਾਂ ਦਾ ਕਹਿਣਾ ਹੈ ਕਿ ਕਿਸੇ ਵੀ ਵਿਅਕਤੀ ਵੱਲੋਂ ਡਰਾ-ਧਮਕਾ ਕੇ ਪੈਸੇ ਮੰਗਣ ਦੀ ਸਥਿਤੀ ਵਿੱਚ ਤੁਰੰਤ ਪੁਲਿਸ ਜਾਂ ਸੰਬੰਧਤ ਅਧਿਕਾਰੀਆਂ ਨੂੰ ਸੂਚਿਤ ਕਰਨਾ ਚਾਹੀਦਾ ਹੈ।