Major accident due to avalanche on Manaslu; German mountaineer of Indian origin and Nepali guide killed

ਮਨਾਸਲੂ ‘ਚ ਬਰਫ਼ ਦਾ ਤੋਦਾ ਡਿੱਗਣ ਨਾਲ ਵੱਡਾ ਹਾਦਸਾ, ਭਾਰਤੀ ਮੂਲ ਦੇ ਜਰਮਨ ਪਰਬਤਾਰੋਹੀ ਤੇ ਨੇਪਾਲੀ ਗਾਈਡ ਦੀ ਮੌਤ

ਕਾਠਮੰਡੂ (ਆਵਾਜ਼ਿ ਕੌਮ ਬਿਊਰੋ)- ਦੁਨੀਆ ਦੀ ਅੱਠਵੀਂ ਸਭ ਤੋਂ ਉੱਚੀ ਚੋਟੀ ਮਾਊਂਟ ਮਨਾਸਲੂ ਦੇ ਕੈਂਪ 3 ‘ਤੇ ਬਰਫ਼ ਦਾ ਤੋਦਾ ਡਿੱਗਣ ਕਾਰਨ ਉਸ ਦੀ ਲਪੇਟ ਵਿੱਚ ਆਉਣ ਨਾਲ ਭਾਰਤੀ ਮੂਲ ਦੇ ਇੱਕ ਜਰਮਨ ਪਰਬਤਾਰੋਹੀ ਅਤੇ ਉਨ੍ਹਾਂ ਦੇ ਨੇਪਾਲੀ ਸ਼ੇਰਪਾ ਗਾਈਡ ਦੀ ਮੌਤ ਹੋ ਗਈ। ਇੱਕ ਕੰਪਨੀ ਦੇ ਅਧਿਕਾਰੀ ਨੇ ਐਤਵਾਰ ਨੂੰ ਇਹ ਜਾਣਕਾਰੀ ਦਿੱਤੀ। ਇਸ ਮੁਹਿੰਮ ਦਾ ਪ੍ਰਬੰਧ ਕਰਨ ਵਾਲੀ ਕੰਪਨੀ ‘ਮਕਾਲੂ ਐਡਵੈਂਚਰ’ ਦੇ ਮੈਨੇਜਿੰਗ ਡਾਇਰੈਕਟਰ ਮੋਹਨ ਲਾਮਸਾਲ ਨੇ ਦੱਸਿਆ ਕਿ ਖਰਾਬ ਮੌਸਮ ਦੇ ਬਾਵਜੂਦ ਧਰੁਵ ਜੋਤੀ ਗੁਹਾ ਅਤੇ ਫੁਰਸੇਂਬਾ ਸ਼ੇਰਪਾ ਕੈਂਪ 2 ਤੋਂ ਉੱਚੇ ਕੈਂਪ ਵੱਲ ਵਧੇ ਸਨ ਅਤੇ ਸ਼ਨੀਵਾਰ ਰਾਤ ਨੂੰ ਉਹ ਬਰਫ਼ ਦੇ ਤੋਦੇ ਦੀ ਲਪੇਟ ਵਿੱਚ ਆ ਗਏ। ਉਨ੍ਹਾਂ ਦੱਸਿਆ ਕਿ ਫੁਰਸੇਂਬਾ ਸ਼ੇਰਪਾ ਨੇਪਾਲ ਦੇ ਮਕਾਲੂ ਖੇਤਰ ਦੇ ਇੱਕ ਤਜਰਬੇਕਾਰ ਪਹਾੜੀ ਗਾਈਡ ਸਨ, ਜਦਕਿ ਗੁਹਾ ਜਰਮਨੀ ਦੇ ਰਹਿਣ ਵਾਲੇ ਸਨ। ਲਾਮਸਾਲ ਨੇ ਕਿਹਾ ਕਿ ਜਦੋਂ ਬਚਾਅ ਦਲ ਕੈਂਪ 3 ‘ਤੇ ਪਹੁੰਚਿਆ ਤਾਂ ਉਨ੍ਹਾਂ ਦੀਆਂ ਲਾਸ਼ਾਂ ਲਗਭਗ 7 ਫੁੱਟ ਬਰਫ਼ ਹੇਠ ਦੱਬੀਆਂ ਹੋਈਆਂ ਮਿਲੀਆਂ। ਉਨ੍ਹਾਂ ਕਿਹਾ, “ਬਰਫ਼ ਦੇ ਇੱਕ ਵੱਡੇ ਤੋਦੇ ਨੇ ਉਨ੍ਹਾਂ ਦੇ ਤੰਬੂ ਨੂੰ ਆਪਣੀ ਲਪੇਟ ਵਿੱਚ ਲੈ ਲਿਆ, ਜਿਸ ਨਾਲ ਦੋਵੇਂ ਪਰਬਤਾਰੋਹੀ ਬਰਫ਼ ਹੇਠ ਦੱਬੇ ਗਏ।” ਲਾਮਸਾਲ ਨੇ ਅੱਗੇ ਕਿਹਾ ਕਿ ਕੰਪਨੀ ਦੇ 6 ਹੋਰ ਪਰਬਤਾਰੋਹੀ, ਜਿਨ੍ਹਾਂ ਨੇ ਕੈਂਪ 2 ਤੋਂ ਵਾਪਸ ਆਉਣ ਦਾ ਫੈਸਲਾ ਕੀਤਾ ਸੀ, ਸੁਰੱਖਿਅਤ ਹਨ। ਹਾਲਾਂਕਿ, ਖਰਾਬ ਮੌਸਮ ਦੇ ਬਾਵਜੂਦ ਅੱਗੇ ਵਧਣ ਵਾਲੇ ਦੋ ਵਿਅਕਤੀ ਇਸ ਹਾਦਸੇ ਦਾ ਸ਼ਿਕਾਰ ਹੋ ਗਏ। ਲਾਮਸਾਲ ਅਨੁਸਾਰ, ਦੋਵਾਂ ਪਰਬਤਾਰੋਹੀਆਂ ਨਾਲ ਸੰਪਰਕ ਟੁੱਟਣ ਤੋਂ ਬਾਅਦ ਕੈਂਪ 3 ਲਈ ਇੱਕ ਬਚਾਅ ਦਲ ਭੇਜਿਆ ਗਿਆ ਸੀ। ਉਨ੍ਹਾਂ ਦੱਸਿਆ ਕਿ ਉਨ੍ਹਾਂ ਨਾਲ ਆਖਰੀ ਸੰਪਰਕ ਸ਼ਨੀਵਾਰ ਰਾਤ ਨੂੰ ਹੋਇਆ ਸੀ। ਲਾਸ਼ਾਂ ਨੂੰ ਬੇਸ ਕੈਂਪ ਤੱਕ ਲਿਆਉਣ ਦੀਆਂ ਕੋਸ਼ਿਸ਼ਾਂ ਜਾਰੀ ਹਨ, ਜਿੱਥੋਂ ਮੌਸਮ ਸਾਜ਼ਗਾਰ ਰਹਿਣ ‘ਤੇ ਉਨ੍ਹਾਂ ਨੂੰ ਹਵਾਈ ਜਹਾਜ਼ ਰਾਹੀਂ ਕਾਠਮੰਡੂ ਲਿਜਾਏ ਜਾਣ ਦੀ ਉਮੀਦ ਹੈ। ਇਨ੍ਹਾਂ ਮੌਤਾਂ ਨਾਲ ਇਸ ਚੜ੍ਹਾਈ ਸੀਜ਼ਨ ਦੌਰਾਨ ਮਾਊਂਟ ਮਨਾਸਲੂ ‘ਤੇ ਮਰਨ ਵਾਲਿਆਂ ਦੀ ਗਿਣਤੀ 4 ਹੋ ਗਈ ਹੈ। ਮੁਹਿੰਮ ਦੇ ਪ੍ਰਬੰਧਕ ਅਨੁਸਾਰ, ਇਸ ਤੋਂ ਪਹਿਲਾਂ ਵੱਖ-ਵੱਖ ਘਟਨਾਵਾਂ ਵਿੱਚ ਸਿੰਗਾਪੁਰ ਦੇ ਇੱਕ ਪਰਬਤਾਰੋਹੀ ਅਤੇ ਇੱਕ ਨੇਪਾਲੀ ਗਾਈਡ ਦੀ ਵੀ ਇਸ ਪਹਾੜ ‘ਤੇ ਮੌਤ ਹੋ ਚੁੱਕੀ ਹੈ।