Military tension escalates between Pakistan and Afghanistan; bomb blasts occur

ਪਾਕਿ ਤੇ ਅਫਗਾਨਿਸਤਾਨ ਵਿਚਾਲੇ ਵਧਿਆ ਫੌਜੀ ਤਣਾਅ, ਕੀਤੇ ਬੰਬ ਧਮਾਕੇ

Kabul, (ਆਵਾਜ਼ਿ ਕੌਮ ਬਿਊਰੋ)-ਪਾਕਿਸਤਾਨ ਅਤੇ ਅਫਗਾਨਿਸਤਾਨ ਦੀ ਤਾਲਿਬਾਨ ਸਰਕਾਰ ਵਿਚਕਾਰ ਤਣਾਅ ਉੱਚ ਪੱਧਰ ‘ਤੇ ਹੈ। ਇਸ ਦੌਰਾਨ ਉਕਤ ਦੇਸ਼ਾਂ ਦੀਆਂ ਸਰਹੱਦਾਂ ‘ਤੇ ਹੋ ਰਹੀਆਂ ਫੌਜੀ ਝੜਪਾਂ ਅਤੇ ਕਾਬੁਲ ਸਣੇ ਸਰਹੱਦੀ ਇਲਾਕਿਆਂ ਵਿਚ ਕੀਤੀ ਜਾਣ ਵਾਲੀ ਏਅਰਸਟ੍ਰਾਈਕਾਂ ਨੇ ਵੱਡਾ ਸੰਕਟ ਖੜ੍ਹਾ ਕਰ ਦਿੱਤਾ। ਪਾਕਿਸਤਾਨ ਦਾ ਦੋਸ਼ ਹੈ ਕਿ ਤਹਿਰੀਕ-ਏ-ਤਾਲਿਬਾਨ ਪਾਕਿਸਤਾਨ (ਟੀਟੀਪੀ) ਵੱਲੋਂ ਅਫਗਾਨਿਸਤਾਨ ਦੀ ਧਰਤੀ ਤੋਂ ਅੱਤਵਾਦੀ ਹਮਲੇ ਕੀਤੇ ਜਾ ਰਹੇ ਹਨ, ਜਿਸ ਦੋਸ਼ ਨੂੰ ਕਾਬੁਲ ਇਨਕਾਰ ਕਰਦਾ ਹੈ। ਜੂਨ 2026 ਵਿੱਚ ਪਾਕਿਸਤਾਨ ਨੇ ਅਫਗਾਨਿਸਤਾਨ ਨਾਲ ਲੱਗਦੀ ਆਪਣੀ ਸਰਹੱਦ ‘ਤੇ ਇੱਕ ਹਵਾਈ ਹਮਲਾ ਕੀਤਾ, ਜਿਸ ਵਿਚ ਸਰਕਾਰ ਨੇ 26 ਅੱਤਵਾਦੀਆਂ ਨੂੰ ਮਾਰਨ ਦਾ ਦਾਅਵਾ ਕੀਤਾ ਹੈ। ਪਾਕਿਸਤਾਨ ਦਾ ਕਹਿਣਾ ਹੈ ਕਿ 2021 ਵਿੱਚ ਤਾਲਿਬਾਨ ਦੇ ਸੱਤਾ ਵਿੱਚ ਵਾਪਸ ਆਉਣ ਤੋਂ ਬਾਅਦ ਟੀਟੀਪੀ ਦੇ ਲੜਾਕੂ ਅਫਗਾਨਿਸਤਾਨ ਵਿੱਚ ਲੁਕੇ ਹੋਏ ਹਨ ਅਤੇ ਉੱਥੋਂ ਪਾਕਿਸਤਾਨ ਵਿੱਚ ਹਮਲੇ ਕਰ ਰਹੇ ਹਨ। ਇਸ ਕਾਰਨ ਪਾਕਿਸਤਾਨ ਨੇ ਕਾਬੁਲ, ਕੰਧਾਰ ਅਤੇ ਹੋਰ ਇਲਾਕਿਆਂ ਵਿੱਚ ਹਵਾਈ ਹਮਲੇ ਅਤੇ ਬੰਬ ਧਮਾਕੇ ਕੀਤੇ ਹਨ। ਅਫਗਾਨਿਸਤਾਨ ਤਾਲਿਬਾਨ ਸਰਕਾਰ ਮੁਤਾਬਕ ਰਿਹਾਇਸ਼ੀ ਇਲਾਕਿਆਂ ਵਿਚ ਹੋਏ ਇਸ ਹਮਲੇ ਵਿਚ 11 ਬੱਚਿਆਂ ਸਣੇ 13 ਲੋਕ ਮਾਰੇ ਗਏ। ਦੋਵਾਂ ਦੇਸ਼ਾਂ ਵਿਚਕਾਰ ਡੁਰੰਡ ਲਾਈਨ ਨੂੰ ਲੈ ਕੇ ਲੰਬੇ ਸਮੇਂ ਤੋਂ ਅਤੇ ਡੂੰਘਾ ਵਿਵਾਦ ਹੈ। ਫਰਵਰੀ 2026 ਵਿੱਚ ਸਰਹੱਦੀ ਝੜਪਾਂ ਤੋਂ ਬਾਅਦ ਪਾਕਿਸਤਾਨ ਦੇ ਰੱਖਿਆ ਮੰਤਰੀ ਨੇ ਇਸਨੂੰ “ਖੁੱਲ੍ਹਾ ਯੁੱਧ” ਕਰਾਰ ਦਿੱਤਾ ਅਤੇ ਦੋਵਾਂ ਪਾਸਿਆਂ ਤੋਂ ਫੌਜੀ ਕਾਰਵਾਈ ਜਾਰੀ ਹੈ। ਕਤਰ, ਤੁਰਕੀ ਅਤੇ ਸਾਊਦੀ ਅਰਬ ਸਮੇਤ ਹੋਰ ਦੇਸ਼ਾਂ ਨੇ ਕਈ ਵਾਰ ਜੰਗਬੰਦੀ ਦੀ ਕੋਸ਼ਿਸ਼ ਕੀਤੀ ਹੈ, ਪਰ ਇਹ ਸਮਝੌਤੇ ਅਸਥਾਈ ਸਾਬਤ ਹੋਏ ਹਨ। ਅਫਗਾਨਿਸਤਾਨ ‘ਤੇ ਦੋ ਦਹਾਕਿਆਂ ਤੋਂ ਚੱਲ ਰਹੇ ਅਮਰੀਕੀ ਕਬਜ਼ੇ ਦੌਰਾਨ ਪਾਕਿਸਤਾਨ ਨੂੰ ਵਿਆਪਕ ਤੌਰ ‘ਤੇ ਅਫਗਾਨ ਤਾਲਿਬਾਨ ਦਾ ਮੁੱਖ ਸਰਪ੍ਰਸਤ ਮੰਨਿਆ ਜਾਂਦਾ ਸੀ।