New hope emerges for the treatment of Gurmoh, who is of Punjabi origin; the Canadian government will provide ₹30 crore

ਪੰਜਾਬੀ ਮੂਲ ਦੇ ਗੁਰਮੋਹ ਦੇ ਇਲਾਜ ‘ਚ ਜਾਗੀ ਨਵੀਂ ਆਸ, ਕੈਨੇਡਾ ਸਰਕਾਰ ਦੇਵੇਗੀ 30 ਕਰੋੜ ਰੁਪਏ

Toranto, (ਆਵਾਜ਼ਿ ਕੌਮ ਬਿਊਰੋ)-ਪੰਜਾਬੀ ਮੂਲ ਦਾ ਤਿੰਨ ਸਾਲਾ ਗੁਰਮੋਹ ਗਿੱਲ ਇੱਕ ਬਹੁਤ ਹੀ ਦੁਰਲੱਭ ਜੈਨੇਟਿਕ ਪਰਿਵਰਤਨ ਨਾਲ ਸਬੰਧਤ ਬਿਮਾਰੀ ਤੋਂ ਪੀੜਤ ਹੈ। ਦੁਨੀਆ ਭਰ ਵਿੱਚ ਇਸ ਬਿਮਾਰੀ ਨਾਲ ਸਿਰਫ਼ ਦੋ ਜਾਂ ਤਿੰਨ ਲੋਕ ਹੀ ਪੀੜਤ ਹਨ। ਇਸ ਵੇਲੇ ਇਸਦਾ ਕੋਈ ਇਲਾਜ ਨਹੀਂ ਹੈ। ਗੁਰਮੋਹ ਦੇ ਇਲਾਜ ਦੀਆਂ ਉਮੀਦਾਂ ਹੁਣ ਜੀਨ-ਐਡੀਟਿੰਗ ਥੈਰੇਪੀ ‘ਤੇ ਟਿੱਕੀਆਂ ਹਨ। ਗੁਰਮੋਹ ਦੀ ਵਿਅਕਤੀਗਤ ਜੀਨ-ਐਡੀਟਿੰਗ ਥੈਰੇਪੀ ਵਿਕਸਤ ਕਰਨ ਦੇ ਪ੍ਰੋਜੈਕਟ ਲਈ ਲਗਭਗ 48 ਕਰੋੜ ਰੁਪਏ ਦੀ ਲੋੜ ਹੈ। ਕੈਨੇਡਾ ਸਰਕਾਰ ਦੇ ਸਹਿਯੋਗ ਨਾਲ ਗੁਰਮੋਹ ਦੇ ਇਲਾਜ ਵਿਚ ਨਵੀਂ ਆਸ ਜਾਗੀ ਹੈ। ਪੰਜਾਬ ਦੇ ਮੂਲ ਵਸਨੀਕ ਅਤੇ ਹੁਣ ਕੈਨੇਡਾ ਵਿੱਚ ਡੈਂਟਿਸਟ ਗੁਰਮੋਹ ਦੇ ਮਾਤਾ-ਪਿਤਾ ਨੇ ਪਿਛਲੇ ਮਹੀਨੇ ‘ਲੇਟਰ ਆਫ ਹੋਪ’ ਮੁਹਿੰਮ ਸ਼ੁਰੂ ਕੀਤੀ ਸੀ।ਇਸ ਵਿਚ ਦੁਰਲੱਭ ਬਿਮਾਰੀਆਂ ਨਾਲ ਜੂਝ ਰਹੇ ਹਜ਼ਾਰਾਂ ਪਰਿਵਾਰਾਂ ਨੇ ਕੈਨੇਡੀਅਨ ਪ੍ਰਧਾਨ ਮੰਤਰੀ ਨੂੰ ਪੱਤਰ ਲਿਖੇ। ਹੁਣ, ਕੈਨੇਡੀਅਨ ਸੂਬੇ ਬ੍ਰਿਟਿਸ਼ ਕੋਲੰਬੀਆ ਦੀ ਸਰਕਾਰ ਨੇ ਜੀਨ-ਸੰਪਾਦਨ ਪ੍ਰੋਜੈਕਟ ਲਈ ਲਗਭਗ 30 ਕਰੋੜ ਰੁਪਏ ਦੇ ਫੰਡਿੰਗ ਦਾ ਐਲਾਨ ਕੀਤਾ ਹੈ। ਪਰਿਵਾਰ ਅਤੇ ਭਾਈਚਾਰੇ ਨੇ ਪਹਿਲਾਂ ਹੀ ਲਗਭਗ 18 ਕਰੋੜ ਰੁਪਏ ਇਕੱਠੇ ਕਰ ਲਏ ਹਨ। ਗੁਰਮੋਹ ਦੇ ਮਾਪਿਆਂ ਨੇ ਅਪ੍ਰੈਲ ਵਿੱਚ ਫੰਡਿੰਗ ਮੁਹਿੰਮ ਸ਼ੁਰੂ ਕੀਤੀ ਸੀ। ਦੁਨੀਆ ਭਰ ਦੇ 14,200 ਤੋਂ ਵੱਧ ਲੋਕਾਂ ਨੇ ਇਸ ਮੁਹਿੰਮ ਵਿੱਚ ਵਿੱਤੀ ਯੋਗਦਾਨ ਪਾਇਆ। ਜ਼ਿਕਰਯੋਗ ਹੈ ਕਿ ਗੁਰਮੋਹ ਨੂੰ ਸਪੈਸਟਿਕ ਪੈਰਾਪਲੀਜੀਆ ਨਾਮਕ ਦੁਰਲੱਭ ਬਿਮਾਰੀ ਹੈ। ਇਹ ਬਿਮਾਰੀ ਰੀੜ੍ਹ ਦੀ ਹੱਡੀ ਨਾਲ ਜੁੜੀਆਂ ਉਨ੍ਹਾਂ ਨਸਾਂ ਨੂੰ ਪ੍ਰਭਾਵਿਤ ਕਰਦੀ ਹੈ ਜੋ ਸਰੀਰ ਦੀ ਹਿਲਜੁਲ ਨੂੰ ਕਾਬੂ ਕਰਦੀਆਂ ਹਨ। ਇਸ ਕਾਰਨ ਮਾਸਪੇਸ਼ੀਆਂ ਵਿੱਚ ਸਖ਼ਤੀ, ਲੱਤਾਂ ਵਿੱਚ ਕਮਜ਼ੋਰੀ ਅਤੇ ਬੋਲਣ ਸਮੇਤ ਹੋਰ ਸਰੀਰਕ ਮੁਸ਼ਕਲਾਂ ਵਧ ਸਕਦੀਆਂ ਹਨ। ਰਿਪੋਰਟਾਂ ਅਨੁਸਾਰ ਗੁਰਮੋਹ ਵਿੱਚ ਮਿਲਿਆ ਖਾਸ ਜੈਨੇਟਿਕ ਬਦਲਾਅ ਕੈਨੇਡਾ ਵਿੱਚ ਆਪਣੀ ਕਿਸਮ ਦਾ ਇਕੱਲਾ ਮਾਮਲਾ ਦੱਸਿਆ ਗਿਆ ਹੈ। ਗੁਰਮੋਹ ਦੇ ਮਾਪਿਆਂ ਨੇ ਕਿਹਾ ਕਿ ਦੁਨੀਆ ਭਰ ਤੋਂ ਮਿਲੇ ਸਮਰਥਨ ਨੇ ਉਨ੍ਹਾਂ ਨੂੰ ਵਿਸ਼ਵਾਸ ਦਿਵਾਇਆ ਹੈ ਕਿ ਗੁਰਮੋਹ ਇਸ ਲੜਾਈ ਵਿੱਚ ਇਕੱਲਾ ਨਹੀਂ ਹੈ। ਹਰ ਮਦਦ ਅਤੇ ਹਰ ਪ੍ਰਾਰਥਨਾ ਨੇ ਪਰਿਵਾਰ ਨੂੰ ਹਿੰਮਤ ਦਿੱਤੀ ਹੈ।ਪਰਿਵਾਰ ਨੇ ਦੁਰਲੱਭ ਬਿਮਾਰੀਆਂ ਨਾਲ ਪੀੜਤ ਬੱਚਿਆਂ ਬਾਰੇ ਜਾਗਰੂਕਤਾ ਪੈਦਾ ਕਰਨ ਲਈ ਵੈਨਕੂਵਰ ਤੋਂ ਵਿਕਟੋਰੀਆ ਤੱਕ ਪੈਦਲ ਯਾਤਰਾ ਵੀ ਕੀਤੀ ਸੀ