Train will run between India and Russia! Talks are underway between the two countries

ਭਾਰਤ-ਰੂਸ ਵਿਚਾਲੇ ਚੱਲੇਗੀ ਟਰੇਨ ! ਦੋਵਾਂ ਦੇਸ਼ਾਂ ਵਿਚਾਲੇ ਚੱਲ ਰਹੀ ਗੱਲਬਾਤ

New Delhi, (ਆਵਾਜ਼ਿ ਕੌਮ ਬਿਊਰੋ)-ਰੂਸ ਵੱਲੋਂ ਹਿੰਦ ਮਹਾਂਸਾਗਰ ਤੱਕ ਇੱਕ ਰੇਲਵੇ ਰੂਟ ਬਣਾਉਣ ਦੀਆਂ ਸੰਭਾਵਨਾਵਾਂ ਤੇ ਵਿਚਾਰ ਕੀਤਾ ਜਾ ਰਿਹਾ ਹੈ। ਇਸ ਯੋਜਨਾ ਤਹਿਤ ਭਾਰਤ ਤੱਕ ਪਹੁੰਚ ਪ੍ਰਾਪਤ ਕਰਨ ਦਾ ਵਿਕਲਪ ਵੀ ਵਿਚਾਰ ਅਧੀਨ ਹੈ। ਰੂਸ ਦੇ ਉਪ ਪ੍ਰਧਾਨ ਮੰਤਰੀ ਮਾਰਾਤ ਖੁਸਨੁਲਿਨ ਨੇ ਰੂਸੀ ਨਿਊਜ਼ ਏਜੰਸੀ ‘ਤਾਸ’ (TASS) ਨੂੰ ਦਿੱਤੇ ਇੱਕ ਇੰਟਰਵਿਊ ਵਿੱਚ ਇਹ ਅਹਿਮ ਖੁਲਾਸਾ ਕੀਤਾ ਹੈ। ਉਪ ਪ੍ਰਧਾਨ ਮੰਤਰੀ ਖੁਸਨੁਲਿਨ ਨੇ ਦੱਸਿਆ ਕਿ ਇਹ ਪ੍ਰਸਤਾਵਿਤ ਰੇਲਵੇ ਲਿੰਕ ਬੋਸਫੋਰਸ ਅਤੇ ਹੋਰਮੁਜ਼ ਜਲਡਮਰੂ (Strait of Hormuz) ਨਾਲ ਜੁੜੇ ਸਮੁੰਦਰੀ ਖ਼ਤਰਿਆਂ ਨੂੰ ਘੱਟ ਕਰਨ ਵਿੱਚ ਮਦਦਗਾਰ ਸਾਬਤ ਹੋ ਸਕਦਾ ਹੈ। ਉਨ੍ਹਾਂ ਨੇ ਇਸ ਰੇਲ ਮਾਰਗ ਲਈ ਤੁਰਕਮੇਨਿਸਤਾਨ, ਇਰਾਨ, ਅਫ਼ਗਾਨਿਸਤਾਨ ਅਤੇ ਪਾਕਿਸਤਾਨ ਰਾਹੀਂ ਸੰਭਾਵਿਤ ਰੂਟਾਂ ਦਾ ਸੁਝਾਅ ਦਿੱਤਾ ਹੈ। ਉਨ੍ਹਾਂ ਸਪੱਸ਼ਟ ਸ਼ਬਦਾਂ ਵਿੱਚ ਕਿਹਾ ਕਿ, “ਭਾਰਤ ਤੱਕ ਪਹੁੰਚ ਪ੍ਰਦਾਨ ਕਰਨ ਵਾਲਾ ਕੋਈ ਵੀ ਵਿਕਲਪ ਸਾਡੇ ਲਈ ਪ੍ਰਵਾਨਯੋਗ ਹੈ”। ਰੂਸ ਵੱਲੋਂ ਇਹ ਕਦਮ ਅਮਰੀਕਾ ਅਤੇ ਇਰਾਨ ਦਰਮਿਆਨ ਚੱਲ ਰਹੇ ਟਕਰਾਅ ਦੇ ਮੱਦੇਨਜ਼ਰ ਚੁੱਕਿਆ ਜਾ ਰਿਹਾ ਹੈ, ਜਿਸ ਕਾਰਨ ਹੋਰਮੁਜ਼ ਜਲਡਮਰੂ ਰਾਹੀਂ ਹੋਣ ਵਾਲੇ ਸਮੁੰਦਰੀ ਵਪਾਰ ‘ਤੇ ਚਿੰਤਾਵਾਂ ਬਣੀਆਂ ਹੋਈਆਂ ਹਨ। ਜ਼ਿਕਰਯੋਗ ਹੈ ਕਿ ਵਿਸ਼ਵ ਦੇ ਲਗਭਗ 25 ਫ਼ੀਸਦੀ ਤੇਲ ਵਪਾਰ ਅਤੇ ਲਗਭਗ 20 ਫ਼ੀਸਦੀ ਐੱਲ.ਐੱਨ.ਜੀ. (LNG) ਦੀ ਖੇਪ ਹੋਰਮੁਜ਼ ਜਲਡਮਰੂ ਰਾਹੀਂ ਹੀ ਲੰਘਦੀ ਹੈ। ਦੂਜੇ ਪਾਸੇ, ਕਾਲੇ ਸਾਗਰ ਨੂੰ ਮਾਰਮਾਰਾ ਸਾਗਰ ਨਾਲ ਜੋੜਨ ਵਾਲੇ ਬੋਸਫੋਰਸ ਜਲਡਮਰੂ ਬਾਰੇ ਤੁਰਕੀ (ਜਿਸਦਾ ਇਸ ‘ਤੇ ਕੰਟਰੋਲ ਹੈ) ਨੇ ਕਿਹਾ ਹੈ ਕਿ ਵਧਦੀਆਂ ਚਿੰਤਾਵਾਂ ਦੇ ਬਾਵਜੂਦ ਇਹ ਲਾਂਘਾ ਖੁੱਲ੍ਹਾ ਰਹੇਗਾ। ਇਸ ਪ੍ਰਸਤਾਵ ਦੇ ਵਿਚਕਾਰ, ਬੀਤੀ 7 ਅਗਸਤ ਨੂੰ ਨਵੀਂ ਦਿੱਲੀ ਵਿਖੇ ਭਾਰਤ ਅਤੇ ਰੂਸ ਦੇ ਆਧੁਨਿਕੀਕਰਨ ਅਤੇ ਉਦਯੋਗਿਕ ਸਹਿਯੋਗ ਬਾਰੇ ਕਾਰਜ ਸਮੂਹ ਦੀ 12ਵੀਂ ਬੈਠਕ ਹੋਈ। ਇਸ ਬੈਠਕ ਵਿੱਚ ਦੋਵਾਂ ਦੇਸ਼ਾਂ ਨੇ ਰੇਲਵੇ ਖੇਤਰ ਵਿੱਚ ਸਹਿਯੋਗ ਦੇ ਨਵੇਂ ਮਾਰਗਾਂ, ਜਿਵੇਂ ਕਿ ਰੇਲਵੇ ਬੁਨਿਆਦੀ ਢਾਂਚਾ, ਵੰਦੇ ਭਾਰਤ ਰੇਲ ਪ੍ਰੋਜੈਕਟ ਅਤੇ ਸਿਗਨਲਿੰਗ ਉਪਕਰਨਾਂ ਸਮੇਤ ਕਈ ਅਹਿਮ ਖੇਤਰਾਂ ਵਿੱਚ ਆਪਸੀ ਸਾਂਝੇਦਾਰੀ ਦਾ ਸੁਆਗਤ ਕੀਤਾ ਹੈ।