UPFSDA raids online food stores in UP; licenses of 4 stores, including Zepto, suspended
UP ‘ਚ ਆਨਲਾਈਨ ਫੂਡ ਸਟੋਰਾਂ ‘ਤੇ UPFSDA ਦੀ ਛਾਪੇਮਾਰੀ, ਜ਼ੈਪਟੋ ਸਣੇ 4 ਸਟੋਰਾਂ ਦੇ ਲਾਇਸੈਂਸ ਸਸਪੈਂਡ
ਲਖਨਊ (ਆਵਾਜ਼ਿ ਕੌਮ ਬਿਊਰੋ)- ਉੱਤਰ ਪ੍ਰਦੇਸ਼ ਵਿੱਚ ਆਨਲਾਈਨ ਫੂਡ ਡਿਲੀਵਰੀ ਜ਼ਰੀਏ ਘਰਾਂ ਤੱਕ ਪਹੁੰਚਣ ਵਾਲੇ ਖਾਣ-ਪੀਣ ਵਾਲੇ ਸਾਮਾਨ ਦੀ ਗੁਣਵੱਤਾ ਦੀ ਜਾਂਚ ਲਈ ਉੱਤਰ ਪ੍ਰਦੇਸ਼ ਫੂਡ ਸੇਫਟੀ ਐਂਡ ਡਰੱਗ ਐਡਮਿਨਿਸਟ੍ਰੇਸ਼ਨ (UPFSDA) ਵੱਲੋਂ ਇੱਕ ਵਿਸ਼ੇਸ਼ ਮੁਹਿੰਮ ਚਲਾਈ ਜਾ ਰਹੀ ਹੈ। ਇਸ ਜਾਂਚ ਦੌਰਾਨ ਖਾਧ ਸੁਰੱਖਿਆ ਨਾਲ ਜੁੜੀਆਂ ਕਈ ਵੱਡੀਆਂ ਖਾਮੀਆਂ ਸਾਹਮਣੇ ਆਉਣ ਤੋਂ ਬਾਅਦ ਵਿਭਾਗ ਨੇ 4 ਆਨਲਾਈਨ ਖਾਧ ਸਟੋਰਾਂ ਦੇ ਲਾਇਸੈਂਸ ਸਸਪੈਂਡ ਕਰਕੇ ਉਨ੍ਹਾਂ ਦਾ ਕਾਰੋਬਾਰ ਬੰਦ ਕਰਵਾ ਦਿੱਤਾ ਹੈ। ਵਿਭਾਗ ਵੱਲੋਂ ਇਹ ਕਾਰਵਾਈ ‘ਸ਼ੁੱਧ ਹੀ ਸ਼ੁਭ ਹੈ’ ਮੁਹਿੰਮ ਦੇ ਤਹਿਤ ਕੀਤੀ ਜਾ ਰਹੀ ਹੈ, ਜਿਸ ਵਿੱਚ ਬਲਿੰਕਿਟ, ਜ਼ੈਪਟੋ, ਅਮੇਜ਼ਨ, ਰਿਲਾਇੰਸ ਅਤੇ ਮੈਟਰੋ ਵਰਗੇ ਆਨਲਾਈਨ ਪਲੇਟਫਾਰਮਾਂ ਨਾਲ ਜੁੜੇ ਵੇਅਰਹਾਊਸਾਂ, ਡਾਰਕ ਸਟੋਰਾਂ ਅਤੇ ਸਪਲਾਈ ਕੇਂਦਰਾਂ ਦੀ ਚੈਕਿੰਗ ਕੀਤੀ ਜਾ ਰਹੀ ਹੈ। ਹੁਣ ਤੱਕ ਸੂਬੇ ਭਰ ਵਿੱਚ 149 ਨਿਰੀਖਣ ਕੀਤੇ ਜਾ ਚੁੱਕੇ ਹਨ। ਇਸ ਦੌਰਾਨ ਖਾਣ-ਪੀਣ ਵਾਲੀਆਂ ਵਸਤੂਆਂ ਦੇ 21 ਸੈਂਪਲ ਜਾਂਚ ਲਈ ਲਏ ਗਏ ਹਨ ਅਤੇ 79 ਮਾਮਲਿਆਂ ਵਿੱਚ ਸੁਧਾਰ ਲਈ ਨੋਟਿਸ ਜਾਰੀ ਕਰਨ ਦੀ ਸਿਫ਼ਾਰਸ਼ ਕੀਤੀ ਗਈ ਹੈ। ਗਾਜ਼ੀਆਬਾਦ ਵਿੱਚ ਆਰ.ਡੀ.ਐੱਲ. (RDL) ਨੇੜੇ ਸਥਿਤ ਜ਼ੈਪਟੋ (Zepto) ਵੇਅਰਹਾਊਸ ਦੀ ਜਾਂਚ ਦੌਰਾਨ ਭਾਰੀ ਗੰਦਗੀ ਪਾਈ ਗਈ। ਕੰਧਾਂ ‘ਤੇ ਜਾਲੇ ਲੱਗੇ ਹੋਏ ਸਨ, ਫਰਸ਼ ਟੁੱਟਿਆ ਹੋਇਆ ਸੀ ਅਤੇ ਜਿਸ ਥਾਂ ‘ਤੇ ਖਾਧ ਸਮੱਗਰੀ ਰੱਖੀ ਗਈ ਸੀ, ਉੱਥੇ ਕਾਕਰੋਚ ਵੀ ਮਿਲੇ। ਇਨ੍ਹਾਂ ਖਾਮੀਆਂ ਨੂੰ ਗੰਭੀਰਤਾ ਨਾਲ ਲੈਂਦਿਆਂ ਵਿਭਾਗ ਨੇ ਇਸ ਵੇਅਰਹਾਊਸ ਦਾ ਲਾਇਸੈਂਸ ਮੁਅੱਤਲ ਕਰ ਦਿੱਤਾ ਹੈ। ਕਾਨਪੁਰ ਵਿੱਚ ਰਿਲਾਇੰਸ ਮਾਰਟ, ਮੈਟਰੋ ਅਤੇ ਜ਼ੈਪਟੋ ਸਟੋਰਾਂ ਦੀ ਜਾਂਚ ਦੌਰਾਨ ਸਟੋਰੇਜ ਵਿਵਸਥਾ ਵਿੱਚ ਖਾਮੀਆਂ ਪਾਈਆਂ ਗਈਆਂ। ਲਾਇਸੈਂਸ ਮੁਤਾਬਕ ਨਿਯੰਤਰਿਤ ਵਾਤਾਵਰਣ ਅਤੇ ਕੋਲਡ ਸਟੋਰੇਜ ਦੀ ਲੋੜ ਸੀ, ਪਰ ਮੌਕੇ ‘ਤੇ ਜ਼ਰੂਰੀ ਚੈਂਬਰ ਗਾਇਬ ਸਨ। ਇਸ ਤੋਂ ਇਲਾਵਾ, ਕਰੀਬ ਦੋ ਸਾਲ ਪਹਿਲਾਂ ਅਸਤੀਫ਼ਾ ਦੇ ਚੁੱਕੇ ਨੋਮੀਨੀ ਦਾ ਨਾਂ ਹਾਲੇ ਵੀ ਲਾਇਸੈਂਸ ਵਿੱਚ ਦਰਜ ਸੀ। ਕੁਝ ਕਨਫੈਕਸ਼ਨਰੀ ਉਤਪਾਦਾਂ ‘ਤੇ ‘ਬੈਸਟ ਬਿਫੋਰ’ (Best Before) ਨਿਯਮਾਂ ਦੀ ਪਾਲਣਾ ਵੀ ਨਹੀਂ ਕੀਤੀ ਗਈ ਸੀ, ਜਿਸ ਕਾਰਨ ਲਾਇਸੈਂਸ ਸਸਪੈਂਡ ਕਰਕੇ ਕਾਰੋਬਾਰ ਰੋਕ ਦਿੱਤਾ ਗਿਆ ਹੈ। ਆਗਰਾ ਵਿੱਚ ਰਿਲਾਇੰਸ ਸਟੋਰ ‘ਤੇ ਕੀਤੀ ਗਈ ਕਾਰਵਾਈ ਦੌਰਾਨ ‘RAI LAIES’ ਬ੍ਰਾਂਡ ਦੇ ਮਖਾਣੇ ਦੇ 273 ਪੈਕੇਟ ਸੀਜ਼ ਕੀਤੇ ਗਏ ਹਨ, ਜਿਨ੍ਹਾਂ ਦੀ ਕੀਮਤ ਲਗਭਗ 68,000 ਰੁਪਏ ਦੱਸੀ ਗਈ ਹੈ। UPFSDA ਦੀਆਂ ਟੀਮਾਂ ਖਾਧ ਪਦਾਰਥਾਂ ਦੀ ਐਕਸਪਾਇਰੀ, ਪੈਕੇਜਿੰਗ, ਸੁਰੱਖਿਅਤ ਸਟੋਰੇਜ, ਤਾਪਮਾਨ ਨਿਯੰਤਰਣ, ਬਿਲਿੰਗ ਰਿਕਾਰਡ, ਕਰਮਚਾਰੀਆਂ ਦੀ ਸਫਾਈ, ਸਿਹਤ ਰਿਕਾਰਡ, ਪੈਸਟ ਕੰਟਰੋਲ ਅਤੇ ਐਕਸਪਾਇਰ ਹੋ ਚੁੱਕੇ ਸਮਾਨ ਦੇ ਨਿਪਟਾਰੇ ਦੇ ਪ੍ਰਬੰਧਾਂ ਦੀ ਬਾਰੀਕੀ ਨਾਲ ਪੜਤਾਲ ਕਰ ਰਹੀਆਂ ਹਨ। ਵਿਭਾਗ ਅਨੁਸਾਰ ਇਸ ਮੁਹਿੰਮ ਦਾ ਮੁੱਖ ਮਕਸਦ ਆਨਲਾਈਨ ਆਰਡਰਾਂ ਰਾਹੀਂ ਲੋਕਾਂ ਤੱਕ ਸੁਰੱਖਿਅਤ ਅਤੇ ਉੱਚ ਮਿਆਰੀ ਖਾਧ ਸਮੱਗਰੀ ਪਹੁੰਚਾਉਣਾ ਹੈ ਅਤੇ ਇਹ ਜਾਂਚ ਮੁਹਿੰਮ ਅੱਗੇ ਵੀ ਜਾਰੀ ਰਹੇਗੀ।
