ਅਮਰੀਕੀ ਟੈਕ ਕਾਰੋਬਾਰੀ ਬ੍ਰਾਇਨ ਜੌਨਸਨ ਦਾ ਵੱਡਾ ਦਾਅਵਾ: ‘2039 ਤੱਕ ਅਮਰਤਾ ਹਾਸਲ ਕਰ ਲਵਾਂਗਾ – ਸਰੀਰ ਨੂੰ 18 ਸਾਲ ਦੇ ਨੌਜਵਾਨ ਵਾਂਗ ਬਣਾਇਆ, AI ਤੇ ਅੰਗਾਂ ਦੇ ਕਲੋਨ ਨਾਲ ਕੰਮ ਜਾਰੀ’
19 ਦਸੰਬਰ 2025, ਨਵੀਂ ਦਿੱਲੀ – ਅਮਰੀਕੀ ਟੈਕ ਕਾਰੋਬਾਰੀ ਤੇ ਅਰਬਪਤੀ ਬ੍ਰਾਇਨ ਜੌਨਸਨ ਨੇ ਵੱਡਾ ਦਾਅਵਾ ਕੀਤਾ ਹੈ ਕਿ ਉਹ 2039 ਤੱਕ ਅਮਰਤਾ ਹਾਸਲ ਕਰ ਲੈਣਗੇ। 48 ਸਾਲਾ ਜੌਨਸਨ ਹਰ ਸਾਲ ਐਂਟੀ-ਏਜਿੰਗ ‘ਤੇ ਲਗਭਗ 17 ਕਰੋੜ ਰੁਪਏ ਖਰਚ ਕਰਦੇ ਹਨ ਤੇ ਮੰਨਦੇ ਹਨ ਕਿ ਅਮਰਤਾ ਕੋਈ ਚਮਤਕਾਰ ਨਹੀਂ ਸਗੋਂ ਬਾਇਓਲੌਜੀਕਲ ਇੰਜੀਨੀਅਰਿੰਗ ਦੀ ਸਮੱਸਿਆ ਹੈ ਜਿਸ ਨੂੰ ਹੱਲ ਕੀਤਾ ਜਾ ਸਕਦਾ ਹੈ।
ਜੌਨਸਨ ਨੇ ਕਿਹਾ ਕਿ 6 ਸਾਲਾਂ ਦੇ ਤੀਬਰ ਪ੍ਰਯੋਗਾਂ ਬਾਅਦ ਉਨ੍ਹਾਂ ਦਾ ਸਰੀਰ ਕਈ ਪੈਮਾਨਿਆਂ ‘ਤੇ 18 ਸਾਲ ਦੇ ਨੌਜਵਾਨ ਵਾਂਗ ਕੰਮ ਕਰ ਰਿਹਾ ਹੈ। ਹੁਣ ਉਹ ਆਰਟੀਫਿਸ਼ੀਅਲ ਇੰਟੈਲੀਜੈਂਸ (AI) ਦੀ ਮਦਦ ਲੈ ਰਹੇ ਹਨ ਤੇ ਲੈਬ ਵਿੱਚ ਆਪਣੇ ਅੰਗਾਂ ਦੇ ਕਲੋਨ ਬਣਾ ਰਹੇ ਹਨ ਤਾਂ ਜੋ ਨਵੀਆਂ ਦਵਾਈਆਂ ਦਾ ਟੈਸਟ ਸੁਰੱਖਿਅਤ ਢੰਗ ਨਾਲ ਕੀਤਾ ਜਾ ਸਕੇ। ਉਨ੍ਹਾਂ ਨੇ ਤਰਕ ਦਿੱਤਾ ਕਿ ਜੇ ਹਾਈਡ੍ਰਾ ਤੇ ਜੈਲੀਫਿਸ਼ ਵਰਗੇ ਜੀਵ ਅਮਰ ਰਹਿ ਸਕਦੇ ਨੇ ਤਾਂ ਵਿਗਿਆਨ ਦੀ ਮਦਦ ਨਾਲ ਇਨਸਾਨ ਵੀ ਅਮਰਤਾ ਪ੍ਰਾਪਤ ਕਰ ਸਕਦਾ ਹੈ।
ਜੌਨਸਨ ਦੇ ਇਸ ਪ੍ਰੋਜੈਕਟ ਨੂੰ ‘ਬਲੂਪ੍ਰਿੰਟ’ ਕਿਹਾ ਜਾਂਦਾ ਹੈ ਜੋ ਉਮਰ ਘਟਾਉਣ ਤੇ ਅਮਰਤਾ ਵੱਲ ਕੇਂਦਰਿਤ ਹੈ। ਵਿਗਿਆਨੀਆਂ ਵਿੱਚ ਇਸ ਨੂੰ ਲੈ ਕੇ ਮਿਸ਼ਰਤ ਵਿਚਾਰ ਹਨ – ਕੁਝ ਇਸ ਨੂੰ ਵਿਗਿਆਨਕ ਪ੍ਰਗਤੀ ਮੰਨਦੇ ਨੇ ਤੇ ਕੁਝ ਅਸੰਭਵ। ਇਹ ਦਾਅਵਾ ਵਿਗਿਆਨ ਤੇ ਤਕਨਾਲੋਜੀ ਦੇ ਖੇਤਰ ਵਿੱਚ ਨਵੀਂ ਚਰਚਾ ਛੇੜ ਰਿਹਾ ਹੈ।
