Youth Congress burns pages of Manusmriti, protests outside RSS headquarters

ਯੂਥ ਕਾਂਗਰਸ ਨੇ ਮਨੂਸਮ੍ਰਿਤੀ ਦੇ ਪੰਨੇ ਸਾੜੇ, RSS ਦੇ ਮੁੱਖ ਦਫਤਰ ਦੇ ਬਾਹਰ ਰੋਸ ਮੁਜ਼ਾਹਰਾ

ਨਵੀਂ ਦਿੱਲੀ (ਆਵਾਜ਼ਿ ਕੌਮ ਬਿਊਰੋ)-ਭਾਰਤੀ ਯੂਥ ਕਾਂਗਰਸ (ਆਈ. ਵਾਈ. ਸੀ.) ਦੇ ਵਰਕਰਾਂ ਨੇ ਇੱਥੇ ਝੰਡੇਵਾਲਾਨ ’ਚ ਰਾਸ਼ਟਰੀ ਸਵੈਮਸੇਵਕ ਸੰਘ (ਆਰ.ਐੱਸ.ਐੱਸ.) ਮੁੱਖ ਦਫਤਰ ਦੇ ਬਾਹਰ ਰੋਸ ਮੁਜ਼ਾਹਰਾ ਕੀਤਾ। ਉਨ੍ਹਾਂ ਭਾਜਪਾ ਅਤੇ ਸੰਘ ਦੀ ਵਿਚਾਰਧਾਰਾ ਨੂੰ ‘ਪੱਖਪਾਤੀ ਅਤੇ ਜਾਤੀਵਾਦੀ’ ਦੱਸਿਆ ਅਤੇ ਇਸ ਦੌਰਾਨ ਕੁਝ ਵਰਕਰਾਂ ਨੇ ਮਨੂਸਮ੍ਰਿਤੀ ਦੇ ਪੰਨੇ ਵੀ ਸਾੜੇ। ਯੂਥ ਕਾਂਗਰਸ ਦੇ ਰਾਸ਼ਟਰੀ ਪ੍ਰਧਾਨ ਉਦੇ ਭਾਨੂ ਚਿਬ ਨੇ ਪ੍ਰਦਰਸ਼ਨ ਦੀ ਅਗਵਾਈ ਕੀਤੀ। ਉਨ੍ਹਾਂ ਦੇ ਹੱਥ ’ਚ ਸੰਵਿਧਾਨ ਦੀ ਇਕ ਕਾਪੀ ਸੀ ਅਤੇ ਉਨ੍ਹਾਂ ਯੂਥ ਕਾਂਗਰਸ ਦੇ ਹੋਰ ਵਰਕਰਾਂ ਨਾਲ ਮਿਲ ਕੇ ਮਨੂਸਮ੍ਰਿਤੀ ਦੇ ਖਿਲਾਫ ਨਾਅਰੇ ਲਾਏ। ਤਸਵੀਰਾਂ ’ਚ ਪ੍ਰਦਰਸ਼ਨਕਾਰੀਆਂ ਨੂੰ ਸੰਵਿਧਾਨ ਦੀ ਪ੍ਰਸਤਾਵਨਾ ਦੀਆਂ ਕਾਪੀਆਂ, ਮਨੂਸਮ੍ਰਿਤੀ ਦਾ ਵਿਰੋਧ ਕਰਨ ਵਾਲੇ ਪੋਸਟਰ ਅਤੇ ਇਸ ਪ੍ਰਾਚੀਨ ਗ੍ਰੰਥ ਦੀਆਂ ਕਾਪੀਆਂ ਫੜੇ ਹੋਏ ਦੇਖਿਆ ਗਿਆ। ਕੁਝ ਪ੍ਰਦਰਸ਼ਨਕਾਰੀਆਂ ਨੂੰ ਮਨੂਸਮ੍ਰਿਤੀ ਦੇ ਪੰਨੇ ਸਾੜਦੇ ਹੋਏ ਦੇਖਿਆ ਗਿਆ, ਜਦਕਿ ਅੱਧੇ ਸੜੇ ਹੋਏ ਪੰਨੇ ਅਤੇ ‘ਮਨੂਸਮ੍ਰਿਤੀ ਨੂੰ ਨਕਾਰੋ’ ਲਿਖੇ ਪੋਸਟਰ ਜ਼ਮੀਨ ’ਤੇ ਪਏ ਸਨ। ਚਿਬ ਨੇ ਦੋਸ਼ ਲਾਇਆ ਕਿ ਦੇਸ਼ ’ਚ ਸੰਵਿਧਾਨ ਦੀ ਵਿਚਾਰਧਾਰਾ ਅਤੇ ਭਾਜਪਾ-ਸੰਘ ਦੀ ਵਿਚਾਰਧਾਰਾ ਵਿਚਾਲੇ ਲੜਾਈ ਚੱਲ ਰਹੀ ਹੈ। ਉਨ੍ਹਾਂ ਦਾਅਵਾ ਕੀਤਾ ਕਿ ਭਾਜਪਾ-ਸੰਘ ਦੀ ਵਿਚਾਰਧਾਰਾ ਮਨੂਸਮ੍ਰਿਤੀ ਤੋਂ ਪ੍ਰੇਰਿਤ ਹੈ ਅਤੇ ‘ਦਲਿਤ-ਵਿਰੋਧੀ’ ਹੈ। ਚਿਬ ਨੇ ਕਿਹਾ, ‘‘ਇਹ ਦੇਸ਼ ਸੰਵਿਧਾਨ ਨਾਲ ਚੱਲੇਗਾ, ਮਨੂਸਮ੍ਰਿਤੀ ਨਾਲ ਨਹੀਂ।’’ ਉਨ੍ਹਾਂ ਉੱਤਰਾਖੰਡ ’ਚ ਕਾਂਗਰਸ ਪ੍ਰਧਾਨ ਮੱਲਿਕਾਰਜੁਨ ਖੜਗੇ ਦੇ ਇਕ ਪ੍ਰੋਗਰਾਮ ਤੋਂ ਬਾਅਦ ਮੰਚ ਦੇ ਕਥਿਤ ‘ਸ਼ੁੱਧੀਕਰਨ’ ਦੀ ਵੀ ਆਲੋਚਨਾ ਕੀਤੀ।