Horrific accident in Nanded: Tempo carrying pilgrims falls into a 100-foot-deep gorge; 3 dead

ਨਾਂਦੇੜ ‘ਚ ਭਿਆਨਕ ਹਾਦਸਾ: 100 ਫੁੱਟ ਡੂੰਘੀ ਖੱਡ ‘ਚ ਡਿੱਗਾ ਸ਼ਰਧਾਲੂਆਂ ਨਾਲ ਭਰਿਆ ਟੈਂਪੂ, 3 ਦੀ ਮੌਤ

ਨਾਂਦੇੜ (ਆਵਾਜ਼ਿ ਕੌਮ ਬਿਊਰੋ)- ਮਹਾਰਾਸ਼ਟਰ ਦੇ ਨੰਦੇੜ ਜ਼ਿਲ੍ਹੇ ਵਿੱਚ ਇੱਕ ਟੈਂਪੂ ਦੇ ਲਗਭਗ 100 ਫੁੱਟ ਡੂੰਘੀ ਖੱਡ ਵਿੱਚ ਡਿੱਗਣ ਨਾਲ ਤਿੰਨ ਲੋਕਾਂ ਦੀ ਮੌਤ ਹੋ ਗਈ ਅਤੇ ਤਿੰਨ ਹੋਰ ਜ਼ਖਮੀ ਹੋ ਗਏ। ਪੁਲਸ ਨੇ ਸ਼ਨੀਵਾਰ ਨੂੰ ਇਸ ਘਟਨਾ ਦੀ ਜਾਣਕਾਰੀ ਦਿੱਤੀ। ਇੱਕ ਅਧਿਕਾਰੀ ਨੇ ਦੱਸਿਆ ਕਿ ਇਹ ਹਾਦਸਾ ਸ਼ੁੱਕਰਵਾਰ ਸਵੇਰੇ 5 ਵਜੇ ਦੇ ਕਰੀਬ ਮਾਹੁਰ ਤਹਿਸੀਲ ਦੇ ਕੇਰੋਲੀ ਘਾਟ ‘ਤੇ ਵਾਪਰਿਆ ਹੈ। ਜਿਸ ਸਮੇਂ ਹਾਦਸਾ ਵਾਪਰਿਆ, ਉਸ ਸਮੇਂ ਯਵਤਮਾਲ ਤੋਂ ਸ਼ਰਧਾਲੂਆਂ ਨੂੰ ਲੈ ਕੇ ਜਾ ਰਿਹਾ ਟੈਂਪੂ ਇੱਕ ਮੋੜ ਤੋਂ ਲੰਘ ਰਿਹਾ ਸੀ। ਪੁਲਸ ਦੇ ਅਨੁਸਾਰ, ਟੈਂਪੂ ਘਾਟ ਤੋਂ ਹੇਠਾਂ ਉਤਰ ਰਿਹਾ ਸੀ, ਜਦੋਂ ਇੱਕ ਵਾਹਨ ਕਥਿਤ ਤੌਰ ‘ਤੇ ਸਾਹਮਣੇ ਤੋਂ ਤੇਜ਼ ਰਫ਼ਤਾਰ ਨਾਲ ਗਲਤ ਦਿਸ਼ਾ ਵਿੱਚ ਆਇਆ ਅਤੇ ਟੈਂਪੂ ਚਾਲਕ ਦੀਆਂ ਅੱਖਾਂ ਵਿਚ ਉਸ ਦੀਆਂ ਹੈੱਡਲਾਈਟਾਂ ਦੀ ਸਿੱਧੀ ਰੌਸ਼ਨੀ ਪਈ, ਜਿਸ ਨਾਲ ਉਸ ਨੂੰ ਕੁਝ ਦਿਖਾਈ ਨਹੀਂ ਦਿੱਤਾ। ਡਰਾਈਵਰ ਨੇ ਗੱਡੀ ਤੋਂ ਬਚਣ ਲਈ ਟੈਂਪੂ ਨੂੰ ਮੋੜਨ ਦੀ ਕੋਸ਼ਿਸ਼ ਕੀਤੀ। ਹਾਲਾਂਕਿ, ਮੋੜ ‘ਤੇ ਮਜ਼ਬੂਤ ​​ਸੁਰੱਖਿਆ ਦੀਵਾਰ ਜਾਂ ਕਰੈਸ਼ ਬੈਰੀਅਰ ਨਾ ਹੋਣ ਕਾਰਨ ਟੈਂਪੂ ਡੂੰਘੀ ਖੱਡ ਵਿੱਚ ਡਿੱਗ ਗਿਆ। ਇਸ ਹਾਦਸੇ ਦੌਰਾਨ ਬਾਬਾਰਾਓ ਗਿਆਨੋਬਾ ਟੇਕਮ (60), ਰਾਹੁਲ ਸੁਧਾਕਰਰਾਓ ਠਾਕਰੇ (25), ਅਤੇ ਪ੍ਰੀਤਮ ਰਾਮਰਾਓ ਪ੍ਰਧਾਨ (38), ਜੋ ਕਿ ਟੈਂਪੂ ਦੇ ਪਿਛਲੇ ਖੁੱਲ੍ਹੇ ਹਿੱਸੇ ਵਿੱਚ ਬੈਠੇ ਸਨ, ਖੱਡ ਵਿੱਚ ਡਿੱਗ ਗਏ। ਅਧਿਕਾਰੀ ਨੇ ਦੱਸਿਆ ਕਿ ਠਾਕਰੇ ਅਤੇ ਪ੍ਰਧਾਨ ਦੀ ਮੌਕੇ ‘ਤੇ ਮੌਤ ਹੋ ਗਈ, ਜਦੋਂ ਕਿ ਤੀਜਾ ਵਿਅਕਤੀ ਇਲਾਜ ਦੌਰਾਨ ਜ਼ਖ਼ਮਾਂ ਦੀ ਤਾਬ ਨਾ ਝੱਲਦਾ ਹੋਇਆ ਦਮ ਤੋੜ ਗਿਆ। ਡਰਾਈਵਰ ਕੈਬਿਨ ਵਿੱਚ ਬੈਠੇ ਪ੍ਰਤੀਕ ਅਰਵਿੰਦ ਅਡਕੀਨ (26), ਦੱਤਾ ਮਨੋਹਰ ਮੇਸ਼ਰਾਮ (35) ਅਤੇ ਯਸ਼ਵੰਤ ਅਰਵਿੰਦ ਪਾਟਿਲ (25) ਨੂੰ ਮਾਮੂਲੀ ਸੱਟਾਂ ਲੱਗੀਆਂ ਹਨ ਅਤੇ ਉਨ੍ਹਾਂ ਦੀ ਹਾਲਤ ਸਥਿਰ ਹੈ। ਅਧਿਕਾਰੀ ਨੇ ਦੱਸਿਆ ਕਿ ਟੈਂਪੂ ਅਤੇ ਪੀੜਤਾਂ ਨੂੰ ਰੱਸੀਆਂ ਅਤੇ ਕਰੇਨ ਦੀ ਮਦਦ ਨਾਲ ਖਾਈ ਵਿੱਚੋਂ ਬਾਹਰ ਕੱਢਿਆ ਗਿਆ।