Mastermind of Rs 113 crore crypto fraud arrested in UAE, now preparations to bring him to India begin

113 ਕਰੋੜ ਦੀ ਕ੍ਰਿਪਟੋ ਠੱਗੀ ਦਾ ਮਾਸਟਰਮਾਈਂਡ UAE ‘ਚ ਗ੍ਰਿਫ਼ਤਾਰ, ਹੁਣ ਭਾਰਤ ਲਿਆਉਣ ਦੀ ਤਿਆਰੀ ਸ਼ੁਰੂ

ਦੁਬਈ (ਆਵਾਜ਼ਿ ਕੌਮ ਬਿਊਰੋ)- ਕ੍ਰਿਪਟੋ ਕਰੰਸੀ ਫਰਾਡ ਮਾਮਲੇ ਵਿੱਚ ਕਰੀਬ 8 ਸਾਲਾਂ ਬਾਅਦ ਇੱਕ ਵੱਡੀ ਸਫ਼ਲਤਾ ਮਿਲੀ ਹੈ। 113 ਕਰੋੜ ਰੁਪਏ ਤੋਂ ਵੱਧ ਦੀ ਠੱਗੀ ਦੇ ਮੁੱਖ ਦੋਸ਼ੀ ਅਮਿਤ ਲਖਨਪਾਲ ਨੂੰ ਯੂ.ਏ.ਈ. (UAE) ਵਿੱਚ ਗ੍ਰਿਫ਼ਤਾਰ ਕਰ ਲਿਆ ਗਿਆ ਹੈ। ਉਸ ‘ਤੇ ਨਿਵੇਸ਼ਕਾਂ ਨੂੰ ਜ਼ਿਆਦਾ ਮੁਨਾਫ਼ੇ ਦਾ ਲਾਲਚ ਦੇ ਕੇ ਕਰੋੜਾਂ ਰੁਪਏ ਠੱਗਣ ਦੇ ਦੋਸ਼ ਹਨ। ਦੋਸ਼ੀ ਨੂੰ 1 ਸਤੰਬਰ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ ਸੀ, ਜਿਸ ਤੋਂ ਬਾਅਦ ਹੁਣ ਭਾਰਤ ਸਰਕਾਰ ਨੇ ਉਸ ਨੂੰ ਯੂ.ਏ.ਈ. ਤੋਂ ਵਾਪਸ ਲਿਆਉਣ (ਹਵਾਲਗੀ) ਦੀ ਕਾਨੂੰਨੀ ਪ੍ਰਕਿਰਿਆ ਸ਼ੁਰੂ ਕਰ ਦਿੱਤੀ ਹੈ। ਦੋਸ਼ੀ ਅਮਿਤ ਲਖਨਪਾਲ ਖ਼ਿਲਾਫ਼ ਠਾਣੇ ਪੁਲਸ ਦੀ ਬੇਨਤੀ ‘ਤੇ ਰੈੱਡ ਨੋਟਿਸ ਜਾਰੀ ਕੀਤਾ ਗਿਆ ਸੀ। ਇਨਫੋਰਸਮੈਂਟ ਡਾਇਰੈਕਟੋਰੇਟ (ED) ਨੇ ਹਾਲ ਹੀ ਵਿੱਚ ਉਸ ਦੇ ਖ਼ਿਲਾਫ਼ ਜਾਂਚ ਤੇਜ਼ ਕੀਤੀ ਸੀ ਅਤੇ ਉਸ ਦੇ ਯੂ.ਏ.ਈ. ਵਿੱਚ ਹੋਣ ਦੀ ਜਾਣਕਾਰੀ ਮਿਲੀ ਸੀ। ਇਹ ਜਾਣਕਾਰੀ ਯੂ.ਏ.ਈ. ਦੇ ਅਧਿਕਾਰੀਆਂ ਨਾਲ ਸਾਂਝੀ ਕੀਤੀ ਗਈ, ਜਿਸ ਤੋਂ ਬਾਅਦ ਉਸ ਦੀ ਗ੍ਰਿਫ਼ਤਾਰੀ ਸੰਭਵ ਹੋ ਸਕੀ। ਇਸ ਪੂਰੇ ਘੁਟਾਲੇ ਦਾ ਖੁਲਾਸਾ ਸਾਲ 2018 ਵਿੱਚ ਇਕ ਵਿਸ਼ੇਸ਼ ਸਟਿੰਗ ਆਪ੍ਰੇਸ਼ਨ ‘ਆਪ੍ਰੇਸ਼ਨ ਬਿਟਕੁਆਇਨ’ (Operation Bitcoin) ਰਾਹੀਂ ਹੋਇਆ ਸੀ। ਰਿਪੋਰਟਰ ਵੱਡੇ ਨਿਵੇਸ਼ਕ ਬਣ ਕੇ ਠਾਣੇ ਸਥਿਤ ਫਲਿੰਟਸਟੋਨ ਗਰੁੱਪ ਦੇ ਦਫ਼ਤਰ ਪਹੁੰਚੇ ਸਨ, ਜੋ ਮਨੀ ਟ੍ਰੇਡ ਕੁਆਇਨ (MTC) ਨਾਲ ਜੁੜੀ ਕੰਪਨੀ ਸੀ। ਸਟਿੰਗ ਆਪ੍ਰੇਸ਼ਨ ਦੌਰਾਨ ਕੰਪਨੀ ਦੇ ਅਧਿਕਾਰੀਆਂ ਨੇ ਨਿਵੇਸ਼ਕਾਂ ਨੂੰ 4 ਤੋਂ 6 ਮਹੀਨਿਆਂ ਵਿੱਚ 10 ਤੋਂ 20 ਗੁਣਾ ਤੱਕ ਰਿਟਰਨ ਮਿਲਣ ਦਾ ਦਾਅਵਾ ਕੀਤਾ ਸੀ। ਈ.ਡੀ. ਦੀ ਜਾਂਚ ਅਨੁਸਾਰ ਅਗਸਤ 2017 ਤੋਂ ਅਪ੍ਰੈਲ 2018 ਦਰਮਿਆਨ ਲੋਕਾਂ ਨੂੰ ਇੱਕ ਅਜਿਹੀ ਅਣ-ਅਧਿਕਾਰਤ ਕ੍ਰਿਪਟੋਕਰੰਸੀ ਵਿੱਚ ਨਿਵੇਸ਼ ਲਈ ਤਿਆਰ ਕੀਤਾ ਗਿਆ, ਜਿਸ ਨੂੰ ਕਿਸੇ ਸਰਕਾਰੀ ਸੰਸਥਾ ਤੋਂ ਮਾਨਤਾ ਨਹੀਂ ਮਿਲੀ ਸੀ। ਇਸ ਨਾਲ ਨਿਵੇਸ਼ਕਾਂ ਦਾ ਕਰੀਬ 113.10 ਕਰੋੜ ਰੁਪਏ ਦਾ ਨੁਕਸਾਨ ਹੋਇਆ। ਲਖਨਪਾਲ ਨੇ ਦਿੱਲੀ, ਪੁਣੇ ਅਤੇ ਨਾਸਿਕ ਵਿੱਚ ਸੈਮੀਨਾਰ ਕੀਤੇ, ਜਿੱਥੇ ਉਸ ਨੇ ਖੁਦ ਨੂੰ ਵਿੱਤ ਮੰਤਰਾਲੇ ਦਾ ਅਧਿਕਾਰੀ ਦੱਸਿਆ। ਇਸ ਤੋਂ ਇਲਾਵਾ ਨਿਵੇਸ਼ਕਾਂ ਨੂੰ ਕੈਰੇਬੀਅਨ ਦੇਸ਼ ਦੀ ਨਾਗਰਿਕਤਾ ਦਿਵਾਉਣ ਅਤੇ ਕ੍ਰਿਪਟੋਕਰੰਸੀ ਨੂੰ ਕੁਝ ਦੇਸ਼ਾਂ ਵਿੱਚ ਕਾਨੂੰਨੀ ਕਰੰਸੀ ਦੀ ਮਾਨਤਾ ਮਿਲਣ ਦੇ ਝੂਠੇ ਦਾਅਵੇ ਵੀ ਕੀਤੇ ਗਏ। ਜੂਨ 2018 ‘ਚ ਖੁਲਾਸੇ ਤੋਂ ਬਾਅਦ ਠਾਣੇ ਪੁਲਸ ਨੇ ਮਾਮਲਾ ਦਰਜ ਕੀਤਾ ਸੀ, ਪਰ ਲਖਨਪਾਲ ਭਾਰਤ ਤੋਂ ਫਰਾਰ ਹੋ ਗਿਆ ਸੀ। ਉਸ ਨੇ ਐਂਟੀਗੁਆ ਅਤੇ ਬਾਰਬੁਡਾ ਦੇ ਪਾਸਪੋਰਟ ਹਾਸਲ ਕਰ ਲਏ ਸਨ ਅਤੇ ਦੁਬਈ ਵਿੱਚ ਵੱਖਰੀ ਪਛਾਣ ਨਾਲ ਰਹਿ ਰਿਹਾ ਸੀ। ਹਾਲ ਹੀ ਵਿੱਚ 12 ਅਗਸਤ ਨੂੰ ਈ.ਡੀ. ਨੇ ਕਈ ਟਿਕਾਣਿਆਂ ‘ਤੇ ਛਾਪੇਮਾਰੀ ਕਰਕੇ ਕਰੀਬ 1 ਕਰੋੜ ਰੁਪਏ ਕੈਸ਼, ਡਿਜੀਟਲ ਡਿਵਾਈਸਾਂ ਅਤੇ ਅਹਿਮ ਦਸਤਾਵੇਜ਼ ਬਰਾਮਦ ਕੀਤੇ ਸਨ। ਹੁਣ ਉਸ ਨੂੰ ਭਾਰਤ ਲਿਆ ਕੇ ਅਗਲੇਰੀ ਕਾਨੂੰਨੀ ਕਾਰਵਾਈ ਕੀਤੀ ਜਾਵੇਗੀ।