Multi-vehicle collision in South Africa; at least 21 people dead

ਦੱਖਣੀ ਅਫਰੀਕਾ ‘ਚ ਕਈ ਵਾਹਨਾਂ ਦੀ ਟੱਕਰ, ਘੱਟੋ-ਘੱਟ 21 ਲੋਕਾਂ ਦੀ ਮੌਤ

ਕੇਪ ਟਾਊਨ (ਆਵਾਜ਼ਿ ਕੌਮ ਬਿਊਰੋ)-ਦੱਖਣੀ ਅਫਰੀਕਾ ਵਿੱਚ ਕਈ ਵਾਹਨਾਂ ਦੀ ਟੱਕਰ ਵਿੱਚ ਘੱਟੋ-ਘੱਟ 21 ਲੋਕਾਂ ਦੀ ਮੌਤ ਹੋ ਗਈ। ਰਾਸ਼ਟਰੀ ਆਵਾਜਾਈ ਏਜੰਸੀ ਅਤੇ ਸਥਾਨਕ ਅਧਿਕਾਰੀਆਂ ਨੇ ਸੋਮਵਾਰ ਨੂੰ ਇਸ ਸਬੰਧੀ ਜਾਣਕਾਰੀ ਦਿੱਤੀ। ਰੋਡ ਟ੍ਰੈਫਿਕ ਮੈਨੇਜਮੈਂਟ ਕਾਰਪੋਰੇਸ਼ਨ ਨੇ ਸੋਸ਼ਲ ਮੀਡੀਆ ਪਲੇਟਫਾਰਮ ਐਕਸ ‘ਤੇ ਇੱਕ ਪੋਸਟ ਵਿੱਚ ਕਿਹਾ ਕਿ ਹਾਦਸੇ ਵਿੱਚ ਦੋ ਮਿੰਨੀ ਬੱਸ ਟੈਕਸੀਆਂ ਅਤੇ ਇੱਕ ਹੋਰ ਵਾਹਨ ਸ਼ਾਮਲ ਸਨ। ਇਸ ਵਿੱਚ ਕਿਹਾ ਗਿਆ ਹੈ ਕਿ ਇਹ ਹਾਦਸਾ ਕੇਪ ਟਾਊਨ ਤੋਂ ਲਗਭਗ 380 ਕਿਲੋਮੀਟਰ ਪੂਰਬ ਵਿੱਚ ਪੱਛਮੀ ਕੇਪ ਸੂਬੇ ਦੇ ਪ੍ਰਿੰਸ ਅਲਬਰਟ ਅਤੇ ਲੀਯੂ-ਗਾਮਕਾ ਕਸਬਿਆਂ ਵਿਚਕਾਰ ਹੋਇਆ। ਸੂਬਾਈ ਆਵਾਜਾਈ ਵਿਭਾਗ, ਵੈਸਟਰਨ ਕੇਪ ਮੋਬਿਲਿਟੀ ਦੀ ਬੁਲਾਰਨ ਮੁਨੀਰਾ ਅਲੀ ਦੇ ਅਨੁਸਾਰ ਇਹ ਹਾਦਸਾ ਐਤਵਾਰ ਰਾਤ 11:30 ਵਜੇ ਦੇ ਕਰੀਬ N1 ਹਾਈਵੇਅ ‘ਤੇ ਵਾਪਰਿਆ। ਵਿਭਾਗ ਨੇ ਕਿਹਾ ਕਿ ਕਈ ਹੋਰ ਲੋਕ ਵੀ ਗੰਭੀਰ ਜ਼ਖਮੀ ਹੋਏ ਹਨ ਅਤੇ ਉਨ੍ਹਾਂ ਨੂੰ ਨੇੜਲੇ ਹਸਪਤਾਲਾਂ ਵਿੱਚ ਲਿਜਾਇਆ ਗਿਆ ਹੈ। ਸਥਾਨਕ ਅਧਿਕਾਰੀਆਂ ਨੇ ਕਿਹਾ ਕਿ ਹਾਦਸੇ ਦਾ ਸਹੀ ਕਾਰਨ ਅਜੇ ਪਤਾ ਨਹੀਂ ਲੱਗ ਸਕਿਆ ਹੈ ਅਤੇ ਪੁਲਿਸ ਜਾਂਚ ਕਰ ਰਹੀ ਹੈ।