New debate on Islamist network in Britain, Khalid Hassan warns government

ਬ੍ਰਿਟੇਨ ’ਚ ਇਸਲਾਮਵਾਦੀ ਨੈੱਟਵਰਕ ’ਤੇ ਨਵੀਂ ਬਹਿਸ, ਖਾਲਿਦ ਹਸਨ ਨੇ ਸਰਕਾਰ ਨੂੰ ਚੇਤਾਇਆ

ਲੰਡਨ (ਆਵਾਜ਼ਿ ਕੌਮ ਬਿਊਰੋ)- ਬ੍ਰਿਟਿਸ਼-ਮਿਸਰ ਅੱਤਵਾਦ ਵਿਰੋਧੀ ਮਾਹਿਰ ਖਾਲਿਦ ਹਸਨ ਨੇ ਦਾਅਵਾ ਕੀਤਾ ਹੈ ਕਿ ਲੰਡਨ ਹੁਣ ਦੋਹਾ (ਕਤਰ) ਅਤੇ ਇਸਤਾਂਬੁਲ ਦੇ ਨਾਲ ਮੁਸਲਿਮ ਬ੍ਰਦਰਹੁੱਡ ਦੇ ਸਭ ਤੋਂ ਅਹਿਮ ਗਲੋਬਲ ਕੇਂਦਰਾਂ ਵਿਚ ਸ਼ਾਮਲ ਹੋ ਗਿਆ ਹੈ। ਇਕ ਇੰਟਰਵਿਊ ਵਿਚ ਉਨ੍ਹਾਂ ਕਿਹਾ ਕਿ ਬ੍ਰਿਟੇਨ ਦੀ ਉਦਾਰਵਾਦੀ ਲੋਕਤੰਤਰੀ ਪ੍ਰਣਾਲੀ, ਪ੍ਰਗਟਾਵੇ ਦੀ ਆਜ਼ਾਦੀ ਅਤੇ ਖੁੱਲ੍ਹੇ ਅਦਾਰਿਆਂ ਦਾ ਲਾਭ ਉਠਾ ਕੇ ਸੰਗਠਨ ਨੇ ਆਪਣਾ ਪ੍ਰਭਾਵ ਵਧਾਇਆ ਹੈ। ਇਕ ਰਿਪੋਰਟ ਵਿਚ ਕਿਹਾ ਗਿਆ ਹੈ ਕਿ ਹਾਲਾਂਕਿ ਉਨ੍ਹਾਂ ਦੇ ਇਨ੍ਹਾਂ ਦਾਅਵਿਆਂ ਦੀ ਸੁਤੰਤਰ ਤੌਰ ’ਤੇ ਪੁਸ਼ਟੀ ਨਹੀਂ ਹੋਈ ਅਤੇ ਇਨ੍ਹਾਂ ’ਤੇ ਵੱਖ-ਵੱਖ ਮਾਹਿਰਾਂ ਦੀ ਰਾਇ ਵੀ ਵੱਖਰੀ ਹੈ। ਮਾਹਿਰ ਦਾ ਕਹਿਣਾ ਹੈ ਕਿ ਸੰਗਠਨ ਸਿਰਫ ਧਾਰਮਿਕ ਆਧਾਰ ’ਤੇ ਹੀ ਲੋਕਾਂ ਨੂੰ ਨਹੀਂ ਜੋੜਦਾ, ਸਗੋਂ ਅਜਿਹੇ ਸਿੱਖਿਆ ਮਾਹਿਰਾਂ, ਸਮਾਜਿਕ ਵਰਕਰਾਂ ਅਤੇ ਹੋਰ ਪ੍ਰਭਾਵਸ਼ਾਲੀ ਵਿਅਕਤੀਆਂ ਤੋਂ ਵੀ ਸਹਿਯੋਗ ਲੈਂਦਾ ਹੈ ਜੋ ਉਸ ਦੇ ਉਦੇਸ਼ਾਂ ਨੂੰ ਅੱਗੇ ਵਧਾਉਣ ਵਿਚ ਮਦਦ ਕਰ ਸਕਦੇ ਹਨ। ਉਨ੍ਹਾਂ ਅਨੁਸਾਰ ਇਸੇ ਰਣਨੀਤੀ ਕਾਰਨ ਸੰਗਠਨ ਜਨਤਕ ਤੌਰ ’ਤੇ ਘੱਟ ਦਿਖਾਈ ਦਿੰਦਾ ਹੈ ਪਰ ਵੱਖ-ਵੱਖ ਅਦਾਰਿਆਂ ਵਿਚ ਉਸ ਦਾ ਪ੍ਰਭਾਵ ਮਹਿਸੂਸ ਕੀਤਾ ਜਾ ਸਕਦਾ ਹੈ। ਇੰਟਰਵਿਊ ਵਿਚ ਹਸਨ ਨੇ ਦਾਅਵਾ ਕੀਤਾ ਕਿ ਬ੍ਰਿਟੇਨ ਦੀਆਂ ਕੁੱਝ ਯੂਨੀਵਰਸਿਟੀਆਂ ਵਿਚ ਮੱਧ-ਪੂਰਬੀ ਅਧਿਐਨ ਨਾਲ ਜੁੜੇ ਅਜਿਹੇ ਸਿੱਖਿਆ ਮਾਹਿਰ ਕੰਮ ਕਰ ਰਹੇ ਹਨ ਜਿਨ੍ਹਾਂ ਦੇ ਸੰਗਠਨ ਨਾਲ ਸਬੰਧ ਰਹੇ ਹਨ। ਉਨ੍ਹਾਂ ਇਹ ਵੀ ਦੋਸ਼ ਲਾਇਆ ਕਿ ਕੁੱਝ ਮੀਡੀਆ ਮੰਚਾਂ ’ਤੇ ਵੀ ਸੰਗਠਨ ਨਾਲ ਜੁੜੇ ਲੋਕਾਂ ਨੂੰ ਜਗ੍ਹਾ ਮਿਲੀ ਹੈ। ਉਨ੍ਹਾਂ ਬੀ. ਬੀ. ਸੀ. ਅਰਬੀ ਨਾਲ ਜੁੜੇ ਕੁੱਝ ਵਿਅਕਤੀਆਂ ’ਤੇ ਵੀ ਸਵਾਲ ਉਠਾਏ। ਹਾਲਾਂਕਿ ਇਨ੍ਹਾਂ ਦੋਸ਼ਾਂ ’ਤੇ ਸਬੰਧਤ ਅਦਾਰਿਆਂ ਵੱਲੋਂ ਇਸ ਰਿਪੋਰਟ ਵਿਚ ਕੋਈ ਪ੍ਰਤੀਕਿਰਿਆ ਸ਼ਾਮਲ ਨਹੀਂ ਹੈ ਅਤੇ ਇਨ੍ਹਾਂ ਦਾਅਵਿਆਂ ਦੀ ਸੁਤੰਤਰ ਪੁਸ਼ਟੀ ਮੁਹੱਈਆ ਨਹੀਂ ਹੈ। ਮਾਹਿਰ ਦੇ ਅਨੁਸਾਰ ਸੰਗਠਨ ਦੇ ਵਿੱਤੀ ਸਰੋਤ ਮੁੱਖ ਤੌਰ ’ਤੇ ਜ਼ਕਾਤ, ਅਮੀਰ ਦਾਨੀਆਂ ਅਤੇ ਚੈਰਿਟੀ ਸੰਸਥਾਵਾਂ ਤੋਂ ਆਉਣ ਵਾਲੇ ਧਨ ਨਾਲ ਜੁੜੇ ਹੋਏ ਹਨ। ਉਨ੍ਹਾਂ ਦਾ ਦਾਅਵਾ ਹੈ ਕਿ ਮਨੁੱਖੀ ਸਹਾਇਤਾ ਲਈ ਮਿਲਣ ਵਾਲੇ ਕੁੱਝ ਸਰੋਤਾਂ ਦਾ ਇਕ ਹਿੱਸਾ ਸੰਗਠਨਾਤਮਕ ਸਰਗਰਮੀਆਂ ’ਤੇ ਵੀ ਖਰਚ ਕੀਤਾ ਜਾਂਦਾ ਹੈ। ਇਨ੍ਹਾਂ ਦਾਅਵਿਆਂ ਦੀ ਵੀ ਸੁਤੰਤਰ ਪੁਸ਼ਟੀ ਨਹੀਂ ਹੋਈ।