Over 105,000 people relocated ahead of the cyclonic storm; 19 trains cancelled
ਚੱਕਰਵਾਤੀ ਤੂਫ਼ਾਨ ਤੋਂ ਪਹਿਲਾਂ 1.05 ਲੱਖ ਤੋਂ ਵੱਧ ਲੋਕਾਂ ਨੂੰ ਕੀਤਾ ਗਿਆ ਸ਼ਿਫਟ, 19 ਰੇਲ ਗੱਡੀਆਂ ਰੱਦ
ਭੁਵਨੇਸ਼ਵਰ (ਆਵਾਜ਼ਿ ਕੌਮ ਬਿਊਰੋ)- ਓਡਿਸ਼ਾ ਸਰਕਾਰ ਨੇ ਸੰਵੇਦਨਸ਼ੀਲ ਇਲਾਕਿਆਂ ਵਿਚੋਂ 1.05 ਲੱਖ ਤੋਂ ਵੱਧ ਲੋਕਾਂ ਨੂੰ ਸੁਰੱਖਿਅਤ ਥਾਵਾਂ ’ਤੇ ਪਹੁੰਚਾਇਆ ਹੈ ਅਤੇ ਪ੍ਰਸ਼ਾਸਨ ਨੇ ਚੱਕਰਵਾਤ ‘ਅਕਵਾਨ’ ਨਾਲ ਨਜਿੱਠਣ ਲਈ ਆਪਣੀਆਂ ਜੰਗੀ ਪੱਧਰ ਦੀਆਂ ਤਿਆਰੀਆਂ ਤੇਜ਼ ਕਰ ਦਿੱਤੀਆਂ ਹਨ। ਮੁੱਖ ਸਕੱਤਰ ਅਨੂ ਗਰਗ ਨੇ ਵੀਰਵਾਰ ਨੂੰ ਦੱਸਿਆ ਕਿ ਲੋਕਾਂ ਨੂੰ ਸੁਰੱਖਿਅਤ ਥਾਵਾਂ ’ਤੇ ਪਹੁੰਚਾਉਣ ਦੀ ਮੁਹਿੰਮ ਜਾਰੀ ਹੈ। ਇਸ ਤਹਿਤ ਚੱਕਰਵਾਤ ਦੇ ਖ਼ਤਰੇ ਵਾਲੇ ਇਲਾਕਿਆਂ, ਨੀਵੇਂ ਖੇਤਰਾਂ ਅਤੇ ਜ਼ਮੀਨ ਖਿਸਕਣ ਦੇ ਖ਼ਤਰੇ ਵਾਲੇ ਪਹਾੜੀ ਇਲਾਕਿਆਂ ਵਿਚ ਰਹਿਣ ਵਾਲੇ ਲੋਕਾਂ ਨੂੰ ਸੁਰੱਖਿਅਤ ਥਾਵਾਂ ’ਤੇ ਭੇਜਿਆ ਜਾ ਰਿਹਾ ਹੈ। ਇਨ੍ਹਾਂ ਵਿਚ ਗਜਪਤੀ ਅਤੇ ਕੰਧਮਾਲ ਜ਼ਿਲਿਆਂ ਦੇ ਪਹਾੜੀ ਇਲਾਕਿਆਂ ਵਿਚ ਸਥਿਤ 6,109 ਸੰਵੇਦਨਸ਼ੀਲ ਥਾਵਾਂ ਅਤੇ ਜ਼ਮੀਨ ਖਿਸਕਣ ਦੀ ਸੰਭਾਵਨਾ ਵਾਲੇ ਖੇਤਰਾਂ ’ਤੇ ਖ਼ਾਸ ਧਿਆਨ ਦਿੱਤਾ ਗਿਆ ਹੈ। ਮੌਸਮ ਵਿਗਿਆਨ ਵਿਭਾਗ ਨੇ ਸੰਕੇਤ ਦਿੱਤਾ ਹੈ ਕਿ ਚੱਕਰਵਾਤ ਦਾ ਸੰਭਾਵੀ ਰਸਤਾ ਪੁਰੀ ਅਤੇ ਗੋਪਾਲਪੁਰ ਵਿਚਾਲੇ ਹੋ ਸਕਦਾ ਹੈ, ਜਿਸ ਦੇ ਚੱਲਦਿਆਂ ਸਰਕਾਰ ਨੇ ਚੌਕਸੀ ਵਧਾ ਦਿੱਤੀ ਹੈ। ਮਛੇਰਿਆਂ ਨੂੰ ਸਮੁੰਦਰ ਵਿਚ ਨਾ ਜਾਣ ਦੀ ਸਲਾਹ ਦਿੱਤੀ ਗਈ ਹੈ, ਜਦਕਿ ਕਲਿੰਗ ਘਾਟੀ ਅਤੇ ਗਜਲਬਾੜੀ ਸੜਕਾਂ ’ਤੇ ਆਵਾਜਾਈ ਸੀਮਤ ਕਰ ਦਿੱਤੀ ਗਈ ਹੈ। ਵਿਸ਼ੇਸ਼ ਰਾਹਤ ਕਮਿਸ਼ਨਰ ਦਫ਼ਤਰ ਵਿਖੇ ਤਿਆਰੀਆਂ ਦੀ ਸਮੀਖਿਆ ਕਰਨ ਤੋਂ ਬਾਅਦ ਗਰਗ ਨੇ ਦੱਸਿਆ ਕਿ ਹੁਣ ਤੱਕ ਸੁਰੱਖਿਅਤ ਥਾਵਾਂ ’ਤੇ ਪਹੁੰਚਾਏ ਗਏ 1,05,304 ਲੋਕਾਂ ਵਿਚੋਂ 45,364 ਲੋਕ ਗੰਜਾਮ ਜ਼ਿਲੇ ਤੋਂ ਅਤੇ 18,000 ਲੋਕ ਗਜਪਤੀ ਜ਼ਿਲੇ ਤੋਂ ਹਨ। ਇਨ੍ਹਾਂ ਨੂੰ 1,224 ਚੱਕਰਵਾਤ ਅਤੇ ਰਾਹਤ ਕੈਂਪਾਂ ਵਿਚ ਠਹਿਰਾਇਆ ਗਿਆ ਹੈ। ਚੱਕਰਵਾਤ ‘ਅਕਵਾਨ’ ਕਾਰਨ ਈਸਟ ਕੋਸਟ ਰੇਲਵੇ ਅਤੇ ਸਾਊਥ ਈਸਟ ਰੇਲਵੇ ਅਧੀਨ ਆਉਂਦੇ ਕਈ ਰੂਟਾਂ ‘ਤੇ ਰੇਲ ਸੇਵਾਵਾਂ ਪ੍ਰਭਾਵਿਤ ਹੋਈਆਂ ਹਨ। ਯਾਤਰੀਆਂ ਦੀ ਸੁਰੱਖਿਆ ਨੂੰ ਧਿਆਨ ਵਿੱਚ ਰੱਖਦੇ ਹੋਏ, 19 ਰੇਲ ਗੱਡੀਆਂ ਰੱਦ ਕਰ ਦਿੱਤੀਆਂ ਗਈਆਂ ਹਨ। ਇਨ੍ਹਾਂ ਵਿੱਚ 19 ਨਵੰਬਰ ਲਈ ਸ਼ਾਲੀਮਾਰ-ਪੁਰੀ ਐਕਸਪ੍ਰੈਸ ਅਤੇ ਭੰਜਪੁਰ-ਪੁਰੀ ਐਕਸਪ੍ਰੈਸ ਸ਼ਾਮਲ ਹਨ। 20 ਨਵੰਬਰ ਨੂੰ ਪੁਰੀ-ਭੰਜਪੁਰ, ਬਾਂਗਰੀਪੋਸੀ-ਪੁਰੀ, ਹਾਵੜਾ-ਪੁਰੀ ਵੰਦੇ ਭਾਰਤ ਅਤੇ ਟਾਟਾਨਗਰ-ਬ੍ਰਹਮਪੁਰ ਵੰਦੇ ਭਾਰਤ ਐਕਸਪ੍ਰੈਸ ਗੱਡੀਆਂ ਵੀ ਰੱਦ ਰਹਿਣਗੀਆਂ। ਇਸ ਤੋਂ ਇਲਾਵਾ, ਜਲੇਸ਼ਵਰ-ਪੁਰੀ ਮੇਮੂ, ਟਾਟਾਨਗਰ-ਬਦਾਮਪਹਾੜ ਮੇਮੂ, ਬਾਲਾਸੋਰ-ਗੋਪੀਨਾਥਪੁਰ ਨੀਲਗਿਰੀ ਮੇਮੂ, ਭੰਜਪੁਰ-ਰੂਪਸਾ ਮੇਮੂ ਅਤੇ ਬਾਰੀਪਾਦਾ-ਬਾਂਗਰੀਪੋਸੀ ਮੇਮੂ ਵਰਗੀਆਂ ਸੇਵਾਵਾਂ ਵੀ ਪ੍ਰਭਾਵਿਤ ਹੋਣਗੀਆਂ। ਰੇਲਵੇ ਨੇ ਯਾਤਰੀਆਂ ਨੂੰ ਅਪੀਲ ਕੀਤੀ ਹੈ ਕਿ ਉਹ ਆਪਣੀ ਯਾਤਰਾ ਸ਼ੁਰੂ ਕਰਨ ਤੋਂ ਪਹਿਲਾਂ ਆਪਣੀਆਂ ਰੇਲ ਗੱਡੀਆਂ ਦੀ ਸਥਿਤੀ (ਸਟੇਟਸ) ਜ਼ਰੂਰ ਚੈੱਕ ਕਰ ਲੈਣ। ਚੱਕਰਵਾਤ ਕਾਰਨ ਪੈਦਾ ਹੋਣ ਵਾਲੇ ਖ਼ਤਰਿਆਂ—ਜਿਵੇਂ ਕਿ ਤੇਜ਼ ਹਵਾਵਾਂ, ਦਰੱਖਤ ਡਿੱਗਣ ਦੀ ਸੰਭਾਵਨਾ ਅਤੇ ਰੇਲਵੇ ਲਾਈਨਾਂ ‘ਤੇ ਮਲਬਾ ਜਮ੍ਹਾਂ ਹੋਣਾ—ਨੂੰ ਦੇਖਦੇ ਹੋਏ ਇਨ੍ਹਾਂ ਰੇਲ ਗੱਡੀਆਂ ਨੂੰ ਰੱਦ ਕਰਨਾ ਸੁਰੱਖਿਆ ਦੇ ਲਿਹਾਜ਼ ਨਾਲ ਇੱਕ ਜ਼ਰੂਰੀ ਕਦਮ ਹੈ।

