“Talks Between Sonia Gandhi and Penguin Break Down Over Editorial Changes to Her Memoir”

ਸੋਨੀਆ ਗਾਂਧੀ ਦੀ ਕਿਤਾਬ ’ਤੇ ਪੈਂਗੁਇਨ ਨਾਲ ਟੁੱਟੀ ਗੱਲ, ਭਾਰਤੀ ਐਡੀਸ਼ਨ ਤੋਂ ਪਿੱਛੇ ਹਟਿਆ ਪ੍ਰਕਾਸ਼ਕ

ਨਵੀਂ ਦਿੱਲੀ – ਕਾਂਗਰਸ ਦੀ ਸੀਨੀਅਰ ਆਗੂ ਸੋਨੀਆ ਗਾਂਧੀ ਦੀ ਆਉਣ ਵਾਲੀ ਯਾਦਗਾਰੀ ਕਿਤਾਬ ‘Belonging: A Journey of Love’ ਆਪਣੇ ਪ੍ਰਕਾਸ਼ਨ ਤੋਂ ਪਹਿਲਾਂ ਹੀ ਚਰਚਾ ਵਿੱਚ ਆ ਗਈ ਹੈ। ਕਿਤਾਬ ਦੇ ਭਾਰਤੀ ਐਡੀਸ਼ਨ ਨੂੰ ਲੈ ਕੇ Penguin Random House India ਅਤੇ ਸੋਨੀਆ ਗਾਂਧੀ ਵਿਚਕਾਰ ਐਡੀਟੋਰੀਅਲ ਤਬਦੀਲੀਆਂ ਸਬੰਧੀ ਸਹਿਮਤੀ ਨਹੀਂ ਬਣ ਸਕੀ।

ਜਾਣਕਾਰੀ ਮੁਤਾਬਕ ਪ੍ਰਕਾਸ਼ਕ ਵੱਲੋਂ ਮੈਨੂਸਕ੍ਰਿਪਟ ਵਿੱਚ ਕੁਝ ਐਡੀਟੋਰੀਅਲ ਤਬਦੀਲੀਆਂ ਅਤੇ ਕੁਝ ਹਿੱਸਿਆਂ ਨੂੰ ਹਟਾਉਣ ਦੀ ਮੰਗ ਕੀਤੀ ਗਈ ਸੀ। ਸੋਨੀਆ ਗਾਂਧੀ ਵੱਲੋਂ ਇਨ੍ਹਾਂ ਤਬਦੀਲੀਆਂ ਨੂੰ ਸਵੀਕਾਰ ਨਾ ਕੀਤੇ ਜਾਣ ਤੋਂ ਬਾਅਦ ਪ੍ਰਕਾਸ਼ਨ ਸਬੰਧੀ ਗੱਲਬਾਤ ਅੱਗੇ ਨਹੀਂ ਵਧੀ। ਇਸ ਤੋਂ ਬਾਅਦ Penguin India ਨੇ ਭਾਰਤੀ ਐਡੀਸ਼ਨ ਨੂੰ ਪ੍ਰਕਾਸ਼ਿਤ ਕਰਨ ਤੋਂ ਪਿੱਛੇ ਹਟਣ ਦਾ ਫੈਸਲਾ ਕੀਤਾ।

ਹਾਲਾਂਕਿ ਇਸ ਘਟਨਾਕ੍ਰਮ ਦਾ ਕਿਤਾਬ ਦੇ ਕੌਮਾਂਤਰੀ ਪ੍ਰਕਾਸ਼ਨ ’ਤੇ ਅਸਰ ਨਹੀਂ ਪੈ ਰਿਹਾ। ‘Belonging: A Journey of Love’ ਦਾ ਅੰਤਰਰਾਸ਼ਟਰੀ ਐਡੀਸ਼ਨ 10 ਨਵੰਬਰ 2026 ਨੂੰ ਜਾਰੀ ਹੋਣ ਦੀ ਤਿਆਰੀ ਵਿੱਚ ਹੈ ਅਤੇ ਅਮਰੀਕਾ ਵਿੱਚ ਇਸ ਨੂੰ Alfred A. Knopf ਵੱਲੋਂ ਪ੍ਰਕਾਸ਼ਿਤ ਕੀਤਾ ਜਾਣਾ ਹੈ।

ਭਾਰਤ ਵਿੱਚ ਕਿਤਾਬ ਦੇ ਪ੍ਰਕਾਸ਼ਨ ਅਤੇ ਵੰਡ ਦੇ ਅਧਿਕਾਰਾਂ ਨੂੰ ਲੈ ਕੇ ਹੋਰ ਪ੍ਰਕਾਸ਼ਕਾਂ ਵੱਲੋਂ ਦਿਲਚਸਪੀ ਦਿਖਾਏ ਜਾਣ ਦੀ ਜਾਣਕਾਰੀ ਹੈ। HarperCollins India ਦਾ ਨਾਮ ਵੀ ਇਸ ਸਬੰਧੀ ਚੱਲ ਰਹੀਆਂ ਗੱਲਬਾਤਾਂ ਵਿੱਚ ਸਾਹਮਣੇ ਆ ਰਿਹਾ ਹੈ।

ਸੋਨੀਆ ਗਾਂਧੀ ਦੀ ਇਹ ਕਿਤਾਬ ਉਨ੍ਹਾਂ ਦੀ ਨਿੱਜੀ ਜ਼ਿੰਦਗੀ ਅਤੇ ਲੰਬੇ ਸਿਆਸੀ ਸਫ਼ਰ ਨਾਲ ਜੁੜੇ ਕਈ ਪੱਖਾਂ ਨੂੰ ਸਾਹਮਣੇ ਲਿਆਉਣ ਦੀ ਉਮੀਦ ਹੈ। ਕਿਤਾਬ ਵਿੱਚ ਰਾਜੀਵ ਗਾਂਧੀ ਨਾਲ ਉਨ੍ਹਾਂ ਦਾ ਵਿਆਹ, ਨੇਹਰੂ-ਗਾਂਧੀ ਪਰਿਵਾਰ ਨਾਲ ਤਜਰਬੇ ਅਤੇ ਭਾਰਤੀ ਸਿਆਸਤ ਵਿੱਚ ਉਨ੍ਹਾਂ ਦੀ ਭੂਮਿਕਾ ਨਾਲ ਸਬੰਧਤ ਵੇਰਵੇ ਹੋਣ ਦੀ ਗੱਲ ਕਹੀ ਜਾ ਰਹੀ ਹੈ।

ਇਸ ਤੋਂ ਇਲਾਵਾ ਇੰਦਰਾ ਗਾਂਧੀ ਅਤੇ ਰਾਜੀਵ ਗਾਂਧੀ ਦੀਆਂ ਹੱਤਿਆਵਾਂ ਤੋਂ ਬਾਅਦ ਦੇ ਨਿੱਜੀ ਤਜਰਬਿਆਂ ਅਤੇ ਭਾਰਤ ਵਿੱਚ ਪਿਛਲੇ ਕਈ ਦਹਾਕਿਆਂ ਦੌਰਾਨ ਆਏ ਸਮਾਜਿਕ ਤੇ ਸਿਆਸੀ ਬਦਲਾਵਾਂ ਬਾਰੇ ਵੀ ਸੋਨੀਆ ਗਾਂਧੀ ਦਾ ਨਜ਼ਰੀਆ ਕਿਤਾਬ ਵਿੱਚ ਦਰਜ ਹੋਣ ਦੀ ਉਮੀਦ ਹੈ।

Penguin ਵੱਲੋਂ ਭਾਰਤੀ ਐਡੀਸ਼ਨ ਤੋਂ ਪਿੱਛੇ ਹਟਣ ਦੇ ਫੈਸਲੇ ਨੇ ਕਿਤਾਬ ਦੀ ਰਿਲੀਜ਼ ਤੋਂ ਪਹਿਲਾਂ ਹੀ ਸਿਆਸੀ ਅਤੇ ਸਾਹਿਤਕ ਹਲਕਿਆਂ ਵਿੱਚ ਚਰਚਾ ਛੇੜ ਦਿੱਤੀ ਹੈ। ਦੂਜੇ ਪਾਸੇ Penguin ਵੱਲੋਂ ਇਹ ਸਪਸ਼ਟੀਕਰਨ ਦਿੱਤਾ ਗਿਆ ਹੈ ਕਿ ਉਹ ਇਸ ਸਮੇਂ ਸੋਨੀਆ ਗਾਂਧੀ ਦੀ ਇਸ memoir ਦਾ ਭਾਰਤੀ ਪ੍ਰਕਾਸ਼ਕ ਨਹੀਂ ਹੈ।