Ukrainian President Zelensky’s plane attacked! Norwegian PM confirms

ਯੂਕ੍ਰੇਨੀ ਰਾਸ਼ਟਰਪਤੀ ਜ਼ੇਲੇਂਸਕੀ ਦੇ ਜਹਾਜ਼ ‘ਤੇ ਹੋ ਗਿਆ ਹਮਲਾ ! ਨਾਰਵੇ ਦੇ PM ਨੇ ਕੀਤੀ ਪੁਸ਼ਟੀ

Ukrain, (ਆਵਾਜ਼ਿ ਕੌਮ ਬਿਊਰੋ)-ਨਾਰਵੇ ਦੇ ਪ੍ਰਧਾਨ ਮੰਤਰੀ ਯੋਨਾਸ ਗਾਰ ਸਟੋਅਰ ਨੇ ਇੱਕ ਸਨਸਨੀਖੇਜ਼ ਖ਼ੁਲਾਸਾ ਕਰਦਿਆਂ ਦੱਸਿਆ ਹੈ ਕਿ ਯੂਕ੍ਰੇਨ ਦੇ ਰਾਸ਼ਟਰਪਤੀ ਵੋਲੋਦੀਮੀਰ ਜ਼ੇਲੇਂਸਕੀ ਦਾ ਜਹਾਜ਼ ਮੋਲਡੋਵਾ ਤੋਂ ਟੇਕਆਫ਼ ਕਰਨ ਸਮੇਂ ਡ੍ਰੋਨ ਹਮਲੇ ਦੀ ਚਪੇਟ ‘ਚ ਆਉਣ ਤੋਂ ਵਾਲ-ਵਾਲ ਬਚਿਆ। ਜ਼ੇਲੇਂਸਕੀ ਨਾਰਵੇ ਦੇ ਰਾਜਾ ਹਾਰਾਲਡ ਪੰਜਵੇਂ ਦੇ ਅੰਤਿਮ ਸੰਸਕਾਰ ਵਿੱਚ ਸ਼ਾਮਲ ਹੋਣ ਲਈ ਓਸਲੋ ਜਾ ਰਹੇ ਸਨ। ਪ੍ਰਧਾਨ ਮੰਤਰੀ ਸਟੋਅਰ ਨੇ ਕਿਹਾ, “ਜਦੋਂ ਉਨ੍ਹਾਂ ਦਾ ਜਹਾਜ਼ ਮੋਲਡੋਵਾ ਤੋਂ ਰਵਾਨਾ ਹੋ ਰਿਹਾ ਸੀ, ਤਾਂ ਉਹ ਇੱਕ ਡ੍ਰੋਨ ਨਾਲ ਟਕਰਾਉਣ ਹੀ ਵਾਲਾ ਸੀ। ਇਹ ਉਹ ਡਰਾਉਣਾ ਸੱਚ ਹੈ, ਜਿਸ ਦਾ ਜ਼ੇਲੇਂਸਕੀ ਰੋਜ਼ਾਨਾ ਸਾਹਮਣਾ ਕਰਦੇ ਹਨ।” ਨਾਰਵੇ ਦੇ ਵਿੱਤ ਮੰਤਰੀ ਜੈਂਸ ਸਟੋਲਟਨਬਰਗ ਨੇ ਵੀ ਪੁਸ਼ਟੀ ਕੀਤੀ ਕਿ ਓਸਲੋ ਪਹੁੰਚਣ ਤੋਂ ਬਾਅਦ ਹੋਈ ਬੈਠਕ ਦੌਰਾਨ ਜ਼ੇਲੇਂਸਕੀ ਨੇ ਖ਼ੁਦ ਇਸ ਘਟਨਾ ਅਤੇ ਆਪਣੀ ਉਡਾਣ ‘ਚ ਹੋਈ ਦੇਰੀ ਬਾਰੇ ਜਾਣਕਾਰੀ ਦਿੱਤੀ ਸੀ। ਮੰਗਲਵਾਰ ਨੂੰ ਮੋਲਡੋਵਾ ਦੇ ਏਅਰਸਪੇਸ ‘ਚ 2 ਰੂਸੀ ਡ੍ਰੋਨਾਂ ਦੇ ਦਾਖਲ ਹੋਣ ਕਾਰਨ ਚਿਸੀਨਾਊ ਏਅਰਪੋਰਟ ‘ਤੇ ਫਲਾਈਟਾਂ ਦੀ ਆਵਾਜਾਈ ਕੁਝ ਸਮੇਂ ਲਈ ਰੋਕ ਦਿੱਤੀ ਗਈ ਸੀ। ਮੋਲਡੋਵਾ ਦੇ ਰਾਸ਼ਟਰਪਤੀ ਮਾਇਆ ਸੈਂਡੂ ਨੇ ਇਸ ਘਟਨਾ ਦੀ ਸਖ਼ਤ ਨਿੰਦਾ ਕਰਦਿਆਂ ਇਸ ਨੂੰ ਨਾਗਰਿਕਾਂ ਦੀ ਸੁਰੱਖਿਆ ਲਈ ਗੰਭੀਰ ਖ਼ਤਰਾ ਦੱਸਿਆ। ਯੂਕ੍ਰੇਨੀ ਰਾਸ਼ਟਰਪਤੀ ਦਫ਼ਤਰ ਦੇ ਸਰੋਤਾਂ ਨੇ ਦੱਸਿਆ ਕਿ ਮੋਲਡੋਵਾ ਅਤੇ ਰੋਮਾਨੀਆ ਦੇ ਏਅਰਸਪੇਸ ‘ਚ ਰੂਸੀ ਡ੍ਰੋਨ ਦਾਖਲ ਹੋਣ ਕਾਰਨ ਹਵਾਈ ਅਲਰਟ ਜ਼ਰੂਰ ਜਾਰੀ ਕੀਤਾ ਗਿਆ ਸੀ ਅਤੇ ਫਲਾਈਟ ‘ਚ ਦੇਰੀ ਹੋਈ ਸੀ, ਪਰ ਜਹਾਜ਼ ਨੂੰ ਸਿੱਧਾ ਨਿਸ਼ਾਨਾ ਬਣਾਏ ਜਾਣ ਦੇ ਦਾਅਵੇ ਨੂੰ ਕੁਝ ਹੱਦ ਤੱਕ ਵਧਾ-ਚੜ੍ਹਾ ਕੇ ਦੱਸਿਆ ਗਿਆ ਹੈ। ਇਸ ਖ਼ਤਰੇ ਦੇ ਬਾਵਜੂਦ ਜ਼ੇਲੇਂਸਕੀ ਮੰਗਲਵਾਰ ਦੇਰ ਰਾਤ ਸੁਰੱਖਿਅਤ ਓਸਲੋ ਪਹੁੰਚ ਗਏ ਤੇ ਬੁੱਧਵਾਰ ਨੂੰ ਉਨ੍ਹਾਂ ਨੇ ਦੁਨੀਆ ਦੇ ਹੋਰ ਵੱਡੇ ਆਗੂਆਂ ਨਾਲ ਮਿਲ ਕੇ ਨਾਰਵੇ ਦੇ ਰਾਜਾ ਹਾਰਾਲਡ ਪੰਜਵੇਂ ਨੂੰ ਸ਼ਰਧਾਂਜਲੀ ਭੇਟ ਕੀਤੀ ਅਤੇ ਨਾਰਵੇ ਵੱਲੋਂ ਮਿਲ ਰਹੀ ਫ਼ੌਜੀ ਤੇ ਹਵਾਈ ਮਦਦ ਲਈ ਧੰਨਵਾਦ ਕੀਤਾ।