Dispute over 10 rupees in Hyderabad; auto-rickshaw driver beaten to death

ਹੈਦਰਾਬਾਦ ‘ਚ 10 ਰੁਪਏ ਨੂੰ ਲੈ ਕੇ ਹੋਇਆ ਝਗੜਾ, ਕੁੱਟ-ਕੁੱਟ ਮਾਰ ‘ਤਾ ਆਟੋ ਚਾਲਕ

ਹੈਦਰਾਬਾਦ (ਆਵਾਜ਼ਿ ਕੌਮ ਬਿਊਰੋ)-ਹੈਦਰਾਬਾਦ ਦੇ ਰਾਜੇਂਦਰਨਗਰ ਥਾਣਾ ਖੇਤਰ ਦੇ ਵੱਟਪੱਲੀ ਵਿੱਚ ਐਤਵਾਰ ਸ਼ਾਮ ਨੂੰ 10 ਰੁਪਏ ਦੇ ਟੁੱਟੇ ਪੈਸੇ ਨੂੰ ਲੈ ਕੇ ਹੋਏ ਝਗੜੇ ਨੇ ਖੂਨੀ ਰੂਪ ਧਾਰਨ ਕਰ ਲਿਆ। ਇਸ ਦੌਰਾਨ ਲੋਕਾਂ ਦੇ ਇੱਕ ਸਮੂਹ ਨੇ ਇੱਕ ਆਟੋ ਚਾਲਕ ਨੂੰ ਕਥਿਤ ਤੌਰ ‘ਤੇ ਕੁੱਟ-ਕੁੱਟ ਕੇ ਮਾਰ ਦਿੱਤਾ। ਘਟਨਾ ਤੋਂ ਤੁਰੰਤ ਬਾਅਦ ਪੁਲਸ ਅਤੇ ਸਥਾਨਕ ਏਆਈਐਮਆਈਐਮ ਆਗੂ ਮੌਕੇ ‘ਤੇ ਪਹੁੰਚ ਗਏ। ਪੁਲਸ ਨੇ ਮਾਮਲਾ ਦਰਜ ਕਰ ਲਿਆ ਅਤੇ ਇਸ ਮਾਮਲੇ ਦੀ ਜਾਂਚ ਕਰਨੀ ਸ਼ੁਰੂ ਕਰ ਦਿੱਤੀ। ਏਆਈਐਮਆਈਐਮ ਬਹਾਦਰਪੁਰਾ ਦੇ ਵਿਧਾਇਕ ਮੁਹੰਮਦ ਮੁਬੀਨ ਨੇ ਮ੍ਰਿਤਕ ਦੀ ਪਛਾਣ ਮੁਹੰਮਦ ਮੁਕਰਮ ਵਜੋਂ ਕੀਤੀ, ਜੋ ਕਿ ਉਸੇ ਇਲਾਕੇ ਦਾ ਵਸਨੀਕ ਸੀ। ਮਾਮਲੇ ਦੀ ਜਾਂਚ ਦੌਰਾਨ ਉਨ੍ਹਾਂ ਕਿਹਾ, “ਇਹ ਘਟਨਾ ਰਾਜੇਂਦਰਨਗਰ ਪੁਲਸ ਸਟੇਸ਼ਨ ਦੀ ਹੱਦ ਅਧੀਨ ਵੱਟਪੱਲੀ ਵਿੱਚ ਵਾਪਰੀ ਹੈ। ਮੁਹੰਮਦ ਮੁਕਰਮ ਨਾਮਕ ਇੱਕ ਆਟੋ ਡਰਾਈਵਰ, ਜੋ ਕਿ ਇਸੇ ਇਲਾਕੇ ਵਿੱਚ ਰਹਿੰਦਾ ਸੀ, ਦੀ ਕੱਲ੍ਹ ਰਾਤ ਬੇਰਹਿਮੀ ਨਾਲ ਹੱਤਿਆ ਕਰ ਦਿੱਤੀ ਗਈ।” ਘਟਨਾ ਬਾਰੇ ਦੱਸਦੇ ਵਿਧਾਇਕ ਨੇ ਦੋਸ਼ ਲਗਾਇਆ ਕਿ ਲੜਾਈ ਪੈਸੇ ਵਾਪਸ ਲੈਣ ਦੇ ਮਾਮੂਲੀ ਮੁੱਦੇ ‘ਤੇ ਸ਼ੁਰੂ ਹੋਈ ਅਤੇ ਬਾਅਦ ਵਿੱਚ ਹਿੰਸਾ ਵਿੱਚ ਬਦਲ ਗਈ। ਉਨ੍ਹਾਂ ਨੇ ਦੋਸ਼ ਲਾਇਆ, “ਲੜਾਈ ਸਿਰਫ਼ 10 ਰੁਪਏ ਦੇ ਟੁੱਟੇ ਪੈਸੇ ਨੂੰ ਲੈ ਕੇ ਸੀ। ਉਸਨੇ 10 ਰੁਪਏ ਦੇ ਕਿਰਾਏ ਲਈ 200 ਰੁਪਏ ਦਾ ਨੋਟ ਦਿੱਤਾ ਸੀ। ਅਜ਼ੀਮ ਨਾਮ ਦੇ ਇੱਕ ਵਿਅਕਤੀ, ਜੋ ਕਿ ਇੱਕ ਨਿਊਜ਼ ਰਿਪੋਰਟਰ ਹੋਣ ਦਾ ਦਾਅਵਾ ਕਰਦਾ ਸੀ, ਨੇ ਉਸ ਨਾਲ ਗਾਲੀ-ਗਲੋਚ ਕੀਤਾ ਅਤੇ ਫਿਰ ਆਪਣੇ ਛੇ ਜਾਂ ਅੱਠ ਸਾਥੀਆਂ ਨੂੰ ਬੁਲਾ ਕੇ ਉਸਦੀ ਪਤਨੀ ਅਤੇ ਬੱਚਿਆਂ ਦੇ ਸਾਹਮਣੇ ਗਲੀ ਦੇ ਵਿਚਕਾਰ ਕੁੱਟ-ਕੁੱਟ ਕੇ ਹੱਤਿਆ ਕਰ ਦਿੱਤੀ।” ਮੁਬੀਨ ਨੇ ਅੱਗੇ ਦੋਸ਼ ਲਗਾਇਆ ਕਿ ਦੋਸ਼ੀ ਇਲਾਕੇ ਵਿੱਚ ਜਾਣੇ-ਪਛਾਣੇ ਗੜਬੜ ਕਰਨ ਵਾਲੇ ਹਨ। ਉਨ੍ਹਾਂ ਨੇ ਕਿਹਾ, “ਅਜ਼ੀਮ, ਸ਼ੋਏਬ ਅਤੇ ਉਨ੍ਹਾਂ ਦੇ ਸਾਥੀ ਹਿਸਟਰੀਸ਼ੀਟਰ ਹਨ ਅਤੇ ਵੱਟਪੱਲੀ ਖੇਤਰ ਵਿੱਚ ਗੁੰਡਾਗਰਦੀ ਕਰ ਰਹੇ ਹਨ। ਇਹ ਇੱਕ ਮਹੀਨੇ ਵਿੱਚ ਉਸੇ ਗਲੀ ‘ਤੇ ਦੂਜਾ ਕਤਲ ਹੈ।”