International Panthic Dal Questions SGPC & Akal Takht Secretariat: ‘Was Badal’s Panth Rattan Title Physically Returned or Just Announced? No Clarity Even After One Year’

ਇੰਟਰਨੈਸ਼ਨਲ ਪੰਥਕ ਦਲ ਨੇ SGPC ਤੇ ਅਕਾਲ ਤਖ਼ਤ ਸਕੱਤਰੇਤ ਨੂੰ ਘੇਰਿਆ: ‘ਬਾਦਲ ਦਾ ਪੰਥ ਰਤਨ ਫਖਰ-ਏ-ਕੌਮ ਖ਼ਿਤਾਬ ਅਸਲ ਵਿੱਚ ਵਾਪਸ ਆਇਆ ਜਾਂ ਸਿਰਫ਼ ਐਲਾਨ ਹੋਇਆ? ਇੱਕ ਸਾਲ ਬਾਅਦ ਵੀ ਸਪੱਸ਼ਟ ਜਵਾਬ ਨਹੀਂ’

ਲੰਡਨ/ ਬਰਮਿੰਘਮ — (ਵਿਸ਼ੇਸ਼ ਰਿਪੋਰਟ ਆਵਾਜਿ ਕੌਮ ਬਿਊਰੋ) ਇੰਟਰਨੈਸ਼ਨਲ ਪੰਥਕ ਦਲ ਵੱਲੋਂ 2 ਦਸੰਬਰ 2024 ਨੂੰ ਸ੍ਰੀ ਅਕਾਲ ਤਖ਼ਤ ਸਾਹਿਬ ਤੋਂ ਜਾਰੀ ਹੋਏ ਇਤਿਹਾਸਕ ਹੁਕਮਨਾਮਿਆਂ ਦੀ ਪਾਲਣਾ ’ਤੇ ਵੱਡੀ ਚਿੰਤਾ ਜ਼ਾਹਰ ਕਰਦਿਆਂ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ (SGPC) ਅਤੇ ਸ੍ਰੀ ਅਕਾਲ ਤਖ਼ਤ ਸਾਹਿਬ ਦੇ ਸਕੱਤਰੇਤ ਤੋਂ ਤੁਰੰਤ ਸਪੱਸ਼ਟੀਕਰਣ ਦੀ ਮੰਗ ਕੀਤੀ ਗਈ ਹੈ ਕਿ ਕੀ ਮਰਹੂਮ ਪ੍ਰਕਾਸ਼ ਸਿੰਘ ਬਾਦਲ ਨੂੰ ਦਿੱਤਾ ਗਿਆ ‘ਫਖਰ-ਏ-ਕੌਮ’ ਅਤੇ ‘ਪੰਥ ਰਤਨ’ ਦਾ ਖ਼ਿਤਾਬ ਅਸਲ ਵਿੱਚ ਵਾਪਸ ਹੋ ਚੁੱਕਾ ਹੈ ਜਾਂ ਨਹੀਂ।
ਇਹ ਫੈਸਲਾ ਇੰਟਰਨੈਸ਼ਨਲ ਪੰਥਕ ਦਲ ਦੀ ਮਹੱਤਵਪੂਰਨ ਮੀਟਿੰਗ ਦੌਰਾਨ ਲਿਆ ਗਿਆ, ਜਿਸ ਵਿੱਚ ਅੰਤਰਰਾਸ਼ਟਰੀ ਚੀਫ ਆਰਗੇਨਾਈਜ਼ਰ ਪਰਮਜੀਤ ਸਿੰਘ ਢਾਡੀ, ਪ੍ਰਧਾਨ ਭਾਈ ਰਘਬੀਰ ਸਿੰਘ ਵਾਲਸਲ, ਮੁੱਖ ਬੁਲਾਰੇ ਅਤੇ ਜਨਰਲ ਸਕੱਤਰ ਭਾਈ ਕਪਤਾਨ ਸਿੰਘ, ਸੀਨੀਅਰ ਪ੍ਰਧਾਨ ਭਾਈ ਰਘਬੀਰ ਸਿੰਘ ਬੀਰ੍ਹਾ, ਅਤੇ ਚੀਫ ਆਰਗੇਨਾਈਜ਼ਰ ਭਾਈ ਰਘਬੀਰ ਸਿੰਘ ਮਾਲੜੀ ਸਮੇਤ ਕਈ ਆਗੂ ਸ਼ਾਮਲ ਸਨ।

⸻
ਖ਼ਾਸ ਪਿਛੋਕੜ — ਦੋ ਦਸੰਬਰ 2024 ਕੀ ਵਾਪਰਿਆ ਸੀ?
ਦੋ ਦਸੰਬਰ 2024 ਦਾ ਦਿਨ ਸਿੱਖ ਇਤਿਹਾਸ ਵਿੱਚ ਇੱਕ ਮੋੜਵਾਂ ਦਿਨ ਬਣਿਆ ਸੀ, ਕਿਉਂਕਿ ਸ੍ਰੀ ਅਕਾਲ ਤਖ਼ਤ ਸਾਹਿਬ ਨੇ ਪੰਥ ਦੀ ਸਾਂਝੀ ਮੰਗ ਦੇ ਅਧਾਰ ’ਤੇ ਮਰਹੂਮ ਪ੍ਰਕਾਸ਼ ਸਿੰਘ ਬਾਦਲ ਨੂੰ ਦਿੱਤਾ ਗਿਆ ਪੰਥ ਰਤਨ ‘ਫਖਰ-ਏ-ਕੌਮ’ ਖ਼ਿਤਾਬ ਵਾਪਸ ਲੈਣ ਦਾ ਐਲਾਨ ਕੀਤਾ ਸੀ।
ਇਹ ਫੈਸਲਾ ਉਸ ਸਮੇਂ ਹੋਇਆ ਜਦੋਂ ਸ਼੍ਰੋਮਣੀ ਅਕਾਲੀ ਦਲ ਬਾਦਲ ਨੇ ਵੀ ਜਥੇਦਾਰ ਸਾਹਿਬ ਅੱਗੇ ਕਈ ਗਲਤੀਆਂ ਮੰਨੀਆਂ ਸਨ। ਪਰ ਬਾਅਦ ਵਿੱਚ ਮੀਡੀਆ ਵਿਚ ਉਹਨਾਂ ਨੇ ਇਸ ਤੋਂ ਮੁੱਕਰ ਜਾਣਾ, ਪੰਥਕ ਧਿਰਾਂ ਵਿੱਚ ਵੱਡੇ ਸੰਦੇਹ ਦਾ ਕਾਰਣ ਬਣਿਆ।
⸻
ਵੱਡਾ ਸਵਾਲ — ਕੀ ਖ਼ਿਤਾਬ ਵਾਪਸ ਲਿਆ ਗਿਆ, ਜਾਂ ਸਿਰਫ਼ ਐਲਾਨ ਹੋਇਆ?
ਮੀਟਿੰਗ ਦੌਰਾਨ ਇੰਟਰਨੈਸ਼ਨਲ ਪੰਥਕ ਦਲ ਨੇ ਕਿਹਾ ਕਿ—
“ਦੱਸਿਆ ਗਿਆ ਕਿ ਖ਼ਿਤਾਬ ਵਾਪਸ ਲਿਆ ਗਿਆ, ਪਰ ਕੀ ਬਾਦਲ ਪਰਿਵਾਰ ਨੇ ਉਹ ਮੈਡਲ ਅਤੇ ਦਸਤਾਵੇਜ਼ ਅਸਲ ਵਿੱਚ ਸ੍ਰੀ ਅਕਾਲ ਤਖ਼ਤ ਸਾਹਿਬ ਨੂੰ ਵਾਪਸ ਕੀਤਾ ਹੈ? ਇਹ ਗੱਲ ਅਜੇ ਵੀ ਅਸਪੱਸ਼ਟ ਹੈ।”
ਆਗੂਆਂ ਨੇ ਸ਼੍ਰੋਮਣੀ ਕਮੇਟੀ ਦੇ ਪ੍ਰਧਾਨ ਹਰਜਿੰਦਰ ਸਿੰਘ ਧਾਮੀ ਅਤੇ ਅਕਾਲ ਤਖ਼ਤ ਸਾਹਿਬ ਦੇ ਸਕੱਤਰੇਤ ਤੋਂ ਬੇਨਤੀ ਕੀਤੀ ਹੈ ਕਿ:
ਪੂਰੀ ਸੰਗਤ ਨੂੰ ਖੁੱਲ੍ਹ ਕੇ ਦੱਸਿਆ ਜਾਵੇ:

• ਕੀ ਖ਼ਿਤਾਬ ਅਧਿਕਾਰਕ ਤੌਰ ’ਤੇ ਤਖ਼ਤ ਸਾਹਿਬ ਵਾਪਸ ਆ ਗਿਆ ਹੈ?
• ਜੇ ਨਹੀਂ, ਤਾਂ SGPC ਨੇ ਇੱਕ ਸਾਲ ਵਿੱਚ ਇਸ ਹੁਕਮਨਾਮੇ ਦੀ ਪਾਲਣਾ ਕਿਉਂ ਨਹੀਂ ਕਰਵਾਈ?
  ⸻
  ਸ਼੍ਰੋਮਣੀ ਕਮੇਟੀ ’ਤੇ ਗੰਭੀਰ ਇਲਜ਼ਾਮ
  ਭਾਈ ਕਪਤਾਨ ਸਿੰਘ ਨੇ ਕਿਹਾ—
  “ਸ੍ਰੀ ਅਕਾਲ ਤਖ਼ਤ ਸਾਹਿਬ ਦੇ ਫ਼ੈਸਲਿਆਂ ਨੂੰ ਲਾਗੂ ਕਰਵਾਉਣਾ SGPC ਦਾ ਫ਼ਰਜ਼ ਹੈ। ਪਰ ਇੱਕ ਸਾਲ ਬਾਅਦ ਵੀ ਕੁਝ ਸਪੱਸ਼ਟ ਨਹੀਂ। ਇਸ ਲਈ SGPC ਪ੍ਰਧਾਨ ਹਰਜਿੰਦਰ ਸਿੰਘ ਧਾਮੀ ਪੰਥ ਦੇ ਸਾਹਮਣੇ ਜਵਾਬਦੇਹ ਹਨ।”
  ਉਹਨਾਂ ਨੇ ਇਹ ਵੀ ਕਿਹਾ ਕਿ ਜੇ ਸ਼੍ਰੋਮਣੀ ਕਮੇਟੀ ਇਸ ਮਾਮਲੇ ’ਤੇ ਚੁੱਪ ਹੈ, ਤਾਂ ਇਹ ਪੰਥ ਵਿੱਚ ਸੰਦੇਹ ਨੂੰ ਹੋਰ ਮਜ਼ਬੂਤ ਕਰਦਾ ਹੈ।
  ⸻
  ਸਾਬਕਾ ਜਥੇਦਾਰ ਗਿਆਨੀ ਰਘਬੀਰ ਸਿੰਘ ਦੀ ਭੂਮਿਕਾ ’ਤੇ ਵੀ ਨਿਸ਼ਾਨਾ
  ਇੰਟਰਨੈਸ਼ਨਲ ਪੰਥਕ ਦਲ ਦੇ ਆਗੂਆਂ ਨੇ ਸਾਬਕਾ ਜਥੇਦਾਰ ਗਿਆਨੀ ਰਘਬੀਰ ਸਿੰਘ ਦੀ ਕਰਵਾਈ ਨੂੰ ਪੰਥਕ ਪੱਖੋਂ ਨਿਰਾਸ਼ਾਜਨਕ ਕਰਾਰ ਦਿੱਤਾ। ਉਹਨਾਂ ਨੇ ਕਿਹਾ ਕਿ—
• ਉਹ ਕਦੇ ਭਗੌੜੇ ਦਲ ਨਾਲ, ਤੇ ਕਦੇ ਪੰਜ ਮੈਂਬਰੀ ਕਮੇਟੀ ਨਾਲ — ਦੋਹਾਂ ਪਾਸਿਆਂ ਖੜ੍ਹੇ ਰਹੇ।
• ਇੰਗਲੈਂਡ ਵਿੱਚ ਜਥੇਬੰਦੀਆਂ ਨਾਲ ਕੀਤੇ ਵਾਅਦੇ ਪੰਜਾਬ ਵਾਪਸੀ ’ਤੇ ਪੂਰੇ ਨਹੀਂ ਕੀਤੇ।
• ਅਪਣੇ ਅਹੁਦੇ ਨੂੰ ਬਚਾਉਣ ਲਈ ਉਹਦੇ ਫ਼ੈਸਲੇ ਡਗਮਗ ਰਹੇ।
• ਹੁਣ ਉਹਦੀ ਸਥਿਤੀ ਵੀ ਅਸਥਿਰ ਹੈ ਅਤੇ ਵਿਦੇਸ਼ਾਂ ਵਿੱਚ ਲੰਬੀ ਛੁੱਟੀ ਵੀ ਮਿੱਲ ਚੁੱਕੀ ਹੈ।
  ਆਗੂਆਂ ਨੇ ਕਿਹਾ—
  “ਜਥੇਦਾਰ ਨੂੰ ਜੋ ਰੋਲ ਨਿਭਾਉਣਾ ਸੀ, ਉਹ ਉਹ ਨਹੀਂ ਕਰ ਸਕੇ ਅਤੇ ਅੱਜ ਸਿੱਖ ਕੌਮ ਉਸਦਾ ਭੁਗਤਾਨ ਕਰ ਰਹੀ ਹੈ।”
  ⸻
  ਪੰਥਕ ਧਿਰਾਂ ਲਈ ਵੱਡਾ ਸੁਨੇਹਾ — ਪਹਿਲਾਂ ਏਕਤਾ, ਫਿਰ ਚੋਣ
  ਆਗੂਆਂ ਨੇ ਤਰਨਤਾਰਨ ਦੀ ਜ਼ਿਮਨੀ ਚੋਣ ਦਾ ਜ਼ਿਕਰ ਕਰਦਿਆਂ ਕਿਹਾ ਕਿ ਪੰਥਕ ਏਕਤਾ ਦੇ ਬਾਵਜੂਦ ਇਕੱਠ ਨਹੀਂ ਦਿਖਿਆ ਗਿਆ ਜੋ ਚਿੰਤਾਜਨਕ ਹੈ।
  ਉਹਨਾਂ ਨੇ ਸਪੱਸ਼ਟ ਕਿਹਾ—
  “ਬੰਦੀਆਂ ਦੀ ਰਿਹਾਈ, ਪੰਜਾਬ ਦੇ ਪਾਣੀ, ਰਾਜਧਾਨੀ — ਇਹ ਸਾਰੇ ਸਿਆਸੀ ਮੁੱਦੇ ਹਨ।
  ਇਹਨਾਂ ਦਾ ਹੱਲ ਪੰਜਾਬ ਵਿਧਾਨ ਸਭਾ ਵਿੱਚੋਂ ਹੀ ਨਿਕਲੇਗਾ।
  ਪਰ ਇਸ ਲਈ ਪੰਥਕ ਏਕਤਾ ਲਾਜ਼ਮੀ ਹੈ।”
  ਉਹਨਾਂ ਨੇ ਕਿਹਾ ਕਿ ਜੇ ਏਕਤਾ ਨਹੀਂ,
  “ਤਾਂ ਚੋਣ ਨਾਂ ਲੜੀ ਜਾਣਾ ਬਿਹਤਰ ਹੈ।”
  ⸻
  ਨਤੀਜਾ — ਪੰਥ ਉਡੀਕ ਵਿੱਚ, SGPC ਅਤੇ ਤਖ਼ਤ ਸਾਹਿਬ ਦੇ ਜਵਾਬ ਦੀ ਲੋੜ
  ਮੀਟਿੰਗ ਦੇ ਅੰਤ ਵਿੱਚ ਭਾਈ ਕਪਤਾਨ ਸਿੰਘ ਨੇ ਕਿਹਾ—
  “ਖ਼ਿਤਾਬ ਵਾਪਸ ਲੈਣ ਨਾਲ ਦੋ ਦਸੰਬਰ ਇਤਿਹਾਸ ਬਣ ਗਿਆ।
  ਪਰ ਜੇ ਹੁਕਮਨਾਮੇ ਲਾਗੂ ਨਾ ਹੋਣ, ਤਾਂ ਪੰਥ ਨੂੰ ਗੁੰਮਰਾਹ ਰੱਖਣ ਦੇ ਜ਼ਿੰਮੇਵਾਰ SGPC ਅਤੇ ਅਕਾਲ ਤਖ਼ਤ ਸਾਹਿਬ ਦਾ ਪ੍ਰਸ਼ਾਸਨ ਬਣਦਾ ਹੈ।”
  ਪੰਥਕ ਜਥੇਬੰਦੀਆਂ ਨੇ ਸਪੱਸ਼ਟ ਕਰ ਦਿੱਤਾ ਕਿ ਉਹ ਸੰਗਤ ਨੂੰ ਅਸਲ ਸਥਿਤੀ ਜਾਣਨ ਦਾ ਅਧਿਕਾਰ ਦਿਵਾਉਣਗੇ ਅਤੇ ਇਸ ਮਾਮਲੇ ਨੂੰ ਅਗੇ ਵਧਾਉਣ ਲਈ ਜਲਦ ਨਵੀਆਂ ਮੀਟਿੰਗਾਂ ਵੀ ਬੁਲਾਈਆਂ ਜਾਣਗੀਆਂ।