China makes history! Electric passenger aircraft completes successful flight
ਚੀਨ ਨੇ ਰਚਿਆ ਇਤਿਹਾਸ ! ਇਲੈਕਟ੍ਰਿਕ ਯਾਤਰੀ ਜਹਾਜ਼ ਨੇ ਸਫਲਤਾਪੂਰਵਕ ਭਰੀ ਉਡਾਣ
Beijing, (ਆਵਾਜ਼ਿ ਕੌਮ ਬਿਊਰੋ)-ਚੀਨ ਨੇ ਕਮਰਸ਼ੀਅਲ ਐਵੀਏਸ਼ਨ ਖੇਤਰ ਵਿੱਚ ਵੱਡੀ ਪ੍ਰਾਪਤੀ ਹਾਸਲ ਕਰਦਿਆਂ ਆਪਣੇ 19 ਸੀਟਾਂ ਵਾਲੇ ਇਲੈਕਟ੍ਰਿਕ ਯਾਤਰੀ ਜਹਾਜ਼ ‘CE-25A’ ਦੀ ਪਹਿਲੀ ਮਾਨਵਯੁਕਤ ਉਡਾਣ ਸਫ਼ਲਤਾਪੂਰਵਕ ਪੂਰੀ ਕਰ ਲਈ ਹੈ। ਚੀਨ ਦੇ ਸ਼ਾਨਡੋਂਗ ਪ੍ਰਾਂਤ ਵਿੱਚ 14 ਨਵੰਬਰ ਨੂੰ ਕੀਤੇ ਗਏ ਇਸ ਪਰੀਖਣ ਦੌਰਾਨ 10 ਟਨ ਵਜ਼ਨੀ ਇਸ ਜਹਾਜ਼ ਨੇ 3 ਕ੍ਰੂ ਮੈਂਬਰਾਂ (2 ਪਾਇਲਟ ਅਤੇ 1 ਫਲਾਈਟ-ਟੈਸਟ ਇੰਜੀਨੀਅਰ) ਨਾਲ ਉਡਾਣ ਭਰੀ। ਇਸ ਸਫ਼ਲ ਪ੍ਰੀਖਣ ਨਾਲ ਬੈਟਰੀ ਨਾਲ ਚੱਲਣ ਵਾਲੇ ਜਹਾਜ਼ਾਂ ਨੂੰ ਵਪਾਰਕ ਹਵਾਬਾਜ਼ੀ ਵਿੱਚ ਸ਼ਾਮਲ ਕਰਨ ਵੱਲ ਇੱਕ ਮਹੱਤਵਪੂਰਨ ਕਦਮ ਪੁੱਟਿਆ ਗਿਆ ਹੈ। ਚੀਨੀ ਰਾਜ ਬ੍ਰੌਡਕਾਸਟਰ CCTV ਅਤੇ ਚੀਨ ਦੀ ਸਰਕਾਰੀ ਖ਼ਬਰ ਏਜੰਸੀ ਸ਼ਿਨਹੂਆ ਅਨੁਸਾਰ, ਉਡਾਣ ਪ੍ਰੀਖਣ ਕੁੱਲ 57 ਮਿੰਟ ਅਤੇ 46 ਸੈਕੰਡ ਤੱਕ ਚੱਲਿਆ, ਜਿਸ ਦੌਰਾਨ ਜਹਾਜ਼ 16 ਮਿੰਟ ਅਤੇ 38 ਸੈਕੰਡ ਹਵਾ ਵਿੱਚ ਰਿਹਾ ਅਤੇ 60.4 ਕਿਲੋਮੀਟਰ ਦੀ ਦੂਰੀ ਤੈਅ ਕੀਤੀ। ਪ੍ਰੀਖਣ ਦੌਰਾਨ ਜਹਾਜ਼ ਦੀਆਂ ਸਮੁੱਚੀਆਂ ਪ੍ਰਣਾਲੀਆਂ ਨੇ ਆਮ ਵਾਂਗ ਕੰਮ ਕੀਤਾ ਅਤੇ ਸਾਰੇ ਪ੍ਰਦਰਸ਼ਨ ਪੈਰਾਮੀਟਰ ਉਮੀਦਾਂ ਮੁਤਾਬਕ ਰਹੇ। ਇਸ ਮਾਨਵਯੁਕਤ ਉਡਾਣ ਤੋਂ ਪਹਿਲਾਂ 2 ਫਰਵਰੀ 2026 ਨੂੰ ਜਹਾਜ਼ ਦੀ ਪਹਿਲੀ ਮਾਨਵ-ਰਹਿਤ ਉਡਾਣ ਅਤੇ 19 ਹੋਰ ਮਾਨਵ-ਰਹਿਤ ਪ੍ਰੀਖਣ ਸਫ਼ਲਤਾਪੂਰਵਕ ਕੀਤੇ ਗਏ ਸਨ। ਚੀਨ ਦੀ ਸਰਕਾਰੀ ਕੰਪਨੀ ‘ਕਮਰਸ਼ੀਅਲ ਏਅਰਕ੍ਰਾਫਟ ਕਾਰਪੋਰੇਸ਼ਨ ਆਫ਼ ਚੀਨ’ (COMAC) ਨੇ ਪ੍ਰਮੁੱਖ ਬੈਟਰੀ ਨਿਰਮਾਤਾ CATL ਅਤੇ ਸ਼ੰਘਾਈ ਜਿਆਓ ਟੋਂਗ ਯੂਨੀਵਰਸਿਟੀ ਦੇ ਸਹਿਯੋਗ ਨਾਲ ਇਸ ਜਹਾਜ਼ ਨੂੰ ਤਿਆਰ ਕੀਤਾ ਹੈ। ਜਹਾਜ਼ ਦਾ ਅਧਿਕਤਮ ਟੇਕ-ਆਫ਼ ਵਜ਼ਨ 10 ਟਨ ਹੈ ਅਤੇ ਇਸ ਵਿੱਚ 19 ਯਾਤਰੀਆਂ ਦੇ ਬੈਠਣ ਦੀ ਸਮਰੱਥਾ ਹੈ। ਇਸ ਜਹਾਜ਼ ਦੀ ਕਰੂਜ਼ਿੰਗ ਰਫ਼ਤਾਰ 300 ਕਿਲੋਮੀਟਰ ਪ੍ਰਤੀ ਘੰਟਾ, ਕਰੂਜ਼ਿੰਗ ਉੱਚਾਈ 2,400 ਮੀਟਰ ਅਤੇ ਅਧਿਕਤਮ ਰੇਂਜ 400 ਕਿਲੋਮੀਟਰ ਤੈਅ ਕੀਤੀ ਗਈ ਹੈ। ਰਵਾਇਤੀ ਈਂਧਨ ਨਾਲ ਚੱਲਣ ਵਾਲੇ ਇੰਜਣਾਂ ਦੀ ਬਜਾਏ CE-25A ਵਿੱਚ ‘ਡਿਸਟ੍ਰੀਬਿਊਟਿਡ ਇਲੈਕਟ੍ਰਿਕ ਡਕਟਿਡ-ਫੈਨ ਪ੍ਰੋਪਲਸ਼ਨ ਸਿਸਟਮ’ ਦੀ ਵਰਤੋਂ ਕੀਤੀ ਗਈ ਹੈ। ਵਿੰਗਸ ‘ਤੇ ਲੱਗੇ ਕਈ ਇਲੈਕਟ੍ਰਿਕ ਫੈਨ ਬੈਟਰੀ ਸਿਸਟਮ ਤੋਂ ਊਰਜਾ ਲੈ ਕੇ ਜਹਾਜ਼ ਨੂੰ ਅੱਗੇ ਵਧਾਉਣ ਲਈ ਲੋੜੀਂਦੀ ਥ੍ਰਸਟ ਪੈਦਾ ਕਰਦੇ ਹਨ। ਇਸ ਜਹਾਜ਼ ਨੂੰ ਚੀਨ ਦੇ CCAR-25 ਟ੍ਰਾਂਸਪੋਰਟ-ਕੈਟੇਗਰੀ ਏਅਰਵਰਥੀਨੈੱਸ ਨਿਯਮਾਂ ਅਧੀਨ ਵਿਕਸਤ ਕੀਤਾ ਜਾ ਰਿਹਾ ਹੈ। ਸਿਵਲ ਐਵੀਏਸ਼ਨ ਐਡਮਿਨਿਸਟ੍ਰੇਸ਼ਨ ਆਫ਼ ਚੀਨ (CAAC) ਨੇ ਇਸ ਦੇ ਟਾਈਪ ਸਰਟੀਫਿਕੇਟ ਲਈ ਅਰਜ਼ੀ ਪ੍ਰਵਾਨ ਕਰ ਲਈ ਹੈ, ਜੋ ਕਿ ਭਵਿੱਖ ਵਿੱਚ ਵਪਾਰਕ ਉਡਾਣਾਂ ਸ਼ੁਰੂ ਕਰਨ ਲਈ ਇੱਕ ਅਹਿਮ ਪੜਾਅ ਹੈ। ਇਹ ਪ੍ਰੋਜੈਕਟ ਛੋਟੇ ਖੇਤਰੀ ਯਾਤਰੀ ਪਰਿਵਹਨ ਲਈ ਇਲੈਕਟ੍ਰਿਕ ਐਵੀਏਸ਼ਨ ਖੇਤਰ ਵਿੱਚ ਵੱਡੀ ਕ੍ਰਾਂਤੀ ਲਿਆਉਣ ਦਾ ਰਾਹ ਪੱਧਰਾ ਕਰੇਗਾ। ਇੱਥੇ ਦੱਸ ਦਈਏ ਕਿ ਇਸ ਤਕਨੀਕ ‘ਤੇ ਭਾਰਤ ਵਿਚ ਵੀ ਕੰਮ ਚੱਲ ਰਿਹਾ ਹੈ। ਬੰਗਲੁਰੂ ਵਿੱਚ ਵਿਗਿਆਨਕ ਅਤੇ ਉਦਯੋਗਿਕ ਖੋਜ ਪ੍ਰੀਸ਼ਦ ਦੀ ਰਾਸ਼ਟਰੀ ਏਰੋਸਪੇਸ ਪ੍ਰਯੋਗਸ਼ਾਲਾਵਾਂ ਦੋ-ਸੀਟਰ ਇਲੈਕਟ੍ਰਿਕ ਹੰਸਾ ਸਿਖਲਾਈ ਜਹਾਜ਼ ਵਿਕਸਤ ਕਰ ਰਹੀਆਂ ਹਨ ਅਤੇ ਚੇਨਈ ਸਥਿਤ ਯੂਬੀਫਲਾਈ ਟੈਕਨਾਲੋਜੀਜ਼ ਤਿੰਨ-ਸੀਟਰ ਈ-ਪਲੇਨ E200X ਵਿਕਸਤ ਕਰ ਰਹੀਆਂ ਹਨ।

